ഡബ്ലിൻ-റോം വിമാനം ഫ്രാൻസിലെ സൈനിക താവളത്തിൽ പിടിച്ചിറക്കി, ഇറങ്ങാൻ വിസമ്മതിച്ച പൈലറ്റിനെതിരെ അന്വേഷണം

പാരീസ് / ഡബ്ലിൻ: വ്യാജ ബോംബ് ഭീഷണിയെത്തുടർന്ന് ഡബ്ലിനിൽ നിന്ന് ഇറ്റലിയിലെ റോമിലേക്ക് പുറപ്പെട്ട എയർ ലിംഗസ് (Aer Lingus) യാത്രാവിമാനം ഫ്രാൻസിലേക്ക് അടിയന്തരമായി തിരിച്ചുവിട്ടു. ഇതേ തുടർന്ന് നോർമണ്ടിയിലെ എവ്രൂ (Évreux) സൈനിക വ്യോമതാവളത്തിൽ വിമാനം ഇറക്കാനുള്ള നിർദ്ദേശം പൈലറ്റ് തുടക്കത്തിൽ നിരസിച്ചെന്ന ആരോപണത്തിൽ ഫ്രഞ്ച് പ്രോസിക്യൂട്ടർമാർ ഔദ്യോഗിക അന്വേഷണം ആരംഭിച്ചു.

ഇന്ന് രാവിലെ ഡബ്ലിനിൽ നിന്ന് റോമിലേക്ക് സർവീസ് നടത്തിയ EI402 വിമാനത്തിനാണ് ബോംബ് ഭീഷണി സന്ദേശം ലഭിച്ചത്. ഭീഷണിയെ തുടർന്ന് ഫ്രഞ്ച് വ്യോമസേനയുടെ രണ്ട് യുദ്ധവിമാനങ്ങൾ അകമ്പടി സേവിച്ച് വിമാനത്തെ എവ്രൂ സൈനിക താവളത്തിലേക്ക് സുരക്ഷിതമായി ലാൻഡ് ചെയ്യിക്കുകയായിരുന്നു. വിമാനത്തിലുണ്ടായിരുന്ന 151 യാത്രക്കാരും ആറ് ജീവനക്കാരും പൂർണ്ണ സുരക്ഷിതരാണ്. ബോംബ് സ്ക്വാഡ് നടത്തിയ വിശദമായ പരിശോധനയിൽ സംശയാസ്പദമായ ഒന്നും കണ്ടെത്താനായില്ല.

അടിയന്തര സാഹചര്യത്തിൽ എവ്രൂ സൈനിക താവളത്തിൽ ഇറങ്ങാൻ എയർ ട്രാഫിക് കൺട്രോൾ നിർദ്ദേശം നൽകിയെങ്കിലും, സിവിൽ വിമാനത്താവളത്തിൽ ഇറങ്ങാൻ താല്പര്യപ്പെട്ട് പൈലറ്റ് തുടക്കത്തിൽ ഇത് നിരസിച്ചതായി ഫ്രഞ്ച് മാധ്യമങ്ങൾ റിപ്പോർട്ട് ചെയ്തു. വ്യോമയാന ചട്ടങ്ങളുടെയും ഉത്തരവുകളുടെയും ലംഘനം ചൂണ്ടിക്കാട്ടിയാണ് എവ്രൂ പബ്ലിക് പ്രോസിക്യൂട്ടറുടെ ഓഫീസ് പൈലറ്റിനെതിരെ അന്വേഷണം പ്രഖ്യാപിച്ചിരിക്കുന്നത്. സംഭവത്തിൽ ഫ്രഞ്ച് അധികൃതരുമായി പൂർണ്ണമായി സഹകരിക്കുമെന്ന് എയർ ലിംഗസ് വ്യക്തമാക്കി.

കോർക്ക് വിമാനത്താവളത്തിലും സുരക്ഷാ ജാഗ്രത

ഇതിനിടെ, അയർലണ്ടിലെ കോർക്ക് വിമാനത്താവളത്തിലും ഇന്ന് രാവിലെ ഒരു വിമാനത്തിന് സമാനമായ ഭീഷണി സന്ദേശം ലഭിച്ചു. വിമാനത്തിന്റെ വിശദാംശങ്ങൾ വ്യക്തമാക്കിയിരുന്നില്ലെങ്കിലും സുരക്ഷാ മുൻകരുതലിന്റെ ഭാഗമായി അധികൃതരും ഗാർഡയും ചേർന്ന് അടിയന്തര സുരക്ഷാ പരിശോധനകൾ നടത്തി. അപകടകരമായ ഒന്നും കണ്ടെത്താത്തതിനെ തുടർന്ന് വിമാനം 90 മിനിറ്റ് വൈകി സർവീസ് പുനരാരംഭിച്ചു.

യൂറോപ്പിലുടനീളം വിമാനങ്ങൾക്ക് നേരെ തുടർച്ചയായി വരുന്ന വ്യാജ ബോംബ് സന്ദേശങ്ങളുടെ ഭാഗമായാണ് ഈ സംഭവങ്ങളെന്നാണ് സുരക്ഷാ ഏജൻസികളുടെ പ്രാഥമിക വിലയിരുത്തൽ. യൂറോപ്യൻ വ്യോമയാന മേഖലയെ ലക്ഷ്യമിട്ടുള്ള സൈബർ/ഹൈബ്രിഡ് അട്ടിമറി നീക്കങ്ങളാണോ ഇതിന് പിന്നിലെന്ന് അന്താരാഷ്ട്ര സുരക്ഷാ ഏജൻസികൾ നിരീക്ഷിച്ചുവരികയാണ്.