അയർലൻഡിൽ പൊതുമേഖലാ പണിമുടക്ക് പിൻവലിച്ചു, ശമ്പളക്കരാറിൽ ധാരണ: 10.75 % ശമ്പള വർദ്ധനവ്

ഡബ്ലിൻ: സർക്കാർ പുതിയ വേതന വ്യവസ്ഥകൾ അംഗീകരിച്ചതിനെത്തുടർന്ന് അയർലൻഡിൽ വ്യാഴാഴ്ച നടത്താനിരുന്ന പൊതുമേഖലാ ജീവനക്കാരുടെ പണിമുടക്ക് പിൻവലിച്ചു. വർക്ക്‌പ്ലേസ് റിലേഷൻസ് കമ്മീഷനിൽ (WRC) പുലർച്ചെ 3:30 വരെ നീണ്ട മാരത്തൺ ചർച്ചകൾക്കൊടുവിലാണ് ട്രേഡ് യൂണിയനുകളും സർക്കാരും തമ്മിൽ കരട് കരാറിലെത്തിയത്.

രണ്ടര വർഷത്തിലേറെ (2 വർഷവും 9 മാസവും) നീണ്ടുനിൽക്കുന്ന പുതിയ കരാർ പ്രകാരം ജീവനക്കാർക്ക് ആകെ 10.75 ശതമാനം ശമ്പള വർദ്ധനവ് ലഭിക്കും. 2026 ജൂലൈ മുതൽ 2029 മാർച്ച് വരെയാണ് ഇതിന്റെ കാലാവധി.

കരാറിലെ പ്രധാന വ്യവസ്ഥകൾ:

• ജീവനക്കാർക്ക് പൊതുവായി 9.75 ശതമാനം ശമ്പള വർദ്ധനവും, പ്രത്യേക തസ്തികകൾക്കായുള്ള 'ലോക്കൽ ബാർഗെയിനിംഗ്' വഴി 1 ശതമാനവും വർദ്ധനവ് ലഭിക്കും.
• കുറഞ്ഞ വരുമാനമുള്ള വിഭാഗങ്ങൾക്ക് ഈ കാലയളവിൽ പരമാവധി 18.3 ശതമാനം വരെ ശമ്പളവർദ്ധനവ് ഉറപ്പാക്കുന്നു.
• കുറഞ്ഞ ശമ്പള ആനുകൂല്യങ്ങൾ ലഭിക്കുന്നതിനുള്ള പരിധി 50,000 യൂറോയിൽ നിന്ന് 60,000 യൂറോയായി ഉയർത്തി.
• സർക്കാർ ഖജനാവിന് 520 കോടി യൂറോ (5.2 ബില്യൺ യൂറോ) അധിക ബാധ്യത വരുന്ന കരാർ അഞ്ച് ബജറ്റുകളിലായി നടപ്പിലാക്കും.

പ്രധാന ശമ്പള വർദ്ധനവ് ഘട്ടങ്ങൾ:

• 2026 സെപ്റ്റംബർ 1: 2% വർദ്ധനവ് അല്ലെങ്കിൽ കുറഞ്ഞത് €1,200 (ഇതിൽ ഏതാണോ കൂടുതൽ അത്).
• 2027 ഏപ്രിൽ 1: 1% വർദ്ധനവ്.
• 2027 ഓഗസ്റ്റ് 1: 1% അല്ലെങ്കിൽ കുറഞ്ഞത് €600.
• 2027 നവംബർ: 1.5% അല്ലെങ്കിൽ കുറഞ്ഞത് €900.
• 2028 മാർച്ച് 1: 1% വർദ്ധനവ്.
• 2028 ജൂൺ 1: 1% അല്ലെങ്കിൽ കുറഞ്ഞത് €600.
• 2028 ഒക്ടോബർ 1: 1% വർദ്ധനവ്.
• 2029 മാർച്ച് 1: ലോക്കൽ ബാർഗെയിനിംഗ് രണ്ടാം ഘട്ടം (1%).
• 2029 മാർച്ച് 2: 1.25% അല്ലെങ്കിൽ കുറഞ്ഞത് €750.

ചർച്ചകൾ വിജയകരമായതോടെ പണിമുടക്കും മറ്റ് പ്രതിഷേധ പരിപാടികളും താൽക്കാലികമായി നിർത്തിവെക്കാൻ ഐറിഷ് കോൺഗ്രസ് ഓഫ് ട്രേഡ് യൂണിയൻസ് (ICTU) യൂണിയനുകളോട് ശുപാർശ ചെയ്തു. വരും ആഴ്ചകളിൽ യൂണിയൻ അംഗങ്ങൾക്കിടയിൽ കരാറിന്മേൽ വോട്ടെടുപ്പ് നടക്കും. ഡിസംബർ 7-ഓടെ വോട്ടെടുപ്പ് പൂർത്തിയാകുമെന്നാണ് പ്രതീക്ഷിക്കുന്നത്.

പൊതുമേഖലാ ജീവനക്കാർക്ക്, പ്രത്യേകിച്ച് കുറഞ്ഞ വേതനം വാങ്ങുന്നവർക്ക് ജീവിതച്ചെലവ് നേരിടാൻ സഹായിക്കുന്ന സന്തുലിതവും ന്യായവുമായ കരാറാണിതെന്ന് പബ്ലിക് എക്സ്പെൻഡിച്ചർ മന്ത്രി ജാക്ക് ചേംബേഴ്സും ധനമന്ത്രി സൈമൺ ഹാരിസും പ്രതികരിച്ചു.