ഡബ്ലിൻ: അയര്‍ലണ്ടില്‍ ഡബ്ലിൻ സിറ്റി സെന്ററിലെ ക്ലിനിക്കിൽ വെച്ച് കുത്തേറ്റതിനെ തുടർന്ന് അൻപതുകാരനായ ഡോക്ടർ ആശുപത്രിയിൽ അതീവ ഗുരുതരാവസ്ഥയിൽ.
വെള്ളിയാഴ്ച രാവിലെ ഒൻപത് മണിയോടെ ഡബ്ലിൻ 8 ലെ ഉഷേഴ്സ് ഐലൻഡിലുള്ള (Usher's Island) മെഡിക്കൽ ക്ലിനിക്കിലാണ് നാടിനെ നടുക്കിയ സംഭവം അരങ്ങേറിയത്.
ചികിത്സയുടെ ഭാഗമായി രോഗിയെ പരിശോധിക്കുന്നതിനിടെയാണ് ആക്രമണം ഉണ്ടായതെന്നാണ് റിപ്പോർട്ടുകൾ. പെട്ടെന്ന് രോഗി കത്തിയുപയോഗിച്ച് ഡോക്ടറെ ആക്രമിക്കുകയായിരുന്നു.
ഗുരുതരമായി പരിക്കേറ്റ ഡോക്ടർക്ക് സംഭവസ്ഥലത്തെത്തിയ ഗാർഡ ഉദ്യോഗസ്ഥർ പ്രാഥമിക ശുശ്രൂഷ നൽകിയ ശേഷം ഉടൻ തന്നെ സെന്റ് ജെയിംസ് ആശുപത്രിയിലേക്ക് മാറ്റി. ഇദ്ദേഹത്തിന്റെ നില ഗുരുതരമായി തുടരുകയാണെന്ന് ആശുപത്രി അധികൃതർ അറിയിച്ചു.
സംഭവവുമായി ബന്ധപ്പെട്ട് അറുപതുകാരനായ ഒരാളെ കെവിൻ സ്ട്രീറ്റ് ഗാർഡയും ആംഡ് റെസ്‌പോൺസ് യൂണിറ്റും (ASU) ചേർന്ന് കൃത്യസ്ഥലത്തുനിന്നുതന്നെ അറസ്റ്റ് ചെയ്തു. പ്രതിയെ 1984-ലെ ക്രിമിനൽ ജസ്റ്റിസ് ആക്ട് സെക്ഷൻ 4 പ്രകാരം ഡബ്ലിനിലെ ഒരു ഗാർഡ സ്റ്റേഷനിൽ കസ്റ്റഡിയിൽ ചോദ്യം ചെയ്തുവരികയാണ്.
ഫോറൻസിക്, സാങ്കേതിക പരിശോധനകൾക്കായി സംഭവസ്ഥലം ഗാർഡ സീൽ ചെയ്തിട്ടുണ്ട്. സംഭവത്തെക്കുറിച്ച് കൂടുതൽ അന്വേഷണങ്ങൾ നടക്കുകയാണെന്ന് ഗാർഡ (An Garda Síochána) അറിയിച്ചു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.