തിരുവനന്തപുരം: തിരുവനന്തപുരം കോർപ്പറേഷൻ ശാസ്തമംഗലം വാർഡ് കൗൺസിലർ ആർ. ശ്രീലേഖയുടെ രാജി പ്രഖ്യാപനത്തെത്തുടർന്നുണ്ടായ തർക്കങ്ങൾ ഒത്തുതീർപ്പിലേക്ക് നീങ്ങുന്നതായി സൂചന. ബിജെപി നേതൃത്വം അടിയന്തരമായി ഇടപെട്ട് നടത്തിയ അനുനയ ശ്രമങ്ങൾ ഫലം കണ്ടെന്നാണ് ലഭിക്കുന്ന വിവരം. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ ഉൾപ്പെടെയുള്ള മുതിർന്ന നേതാക്കൾ ശ്രീലേഖയുമായി നേരിട്ട് ചർച്ച നടത്തിയിരുന്നു.
കോർപ്പറേഷൻ ഭരണവുമായി ബന്ധപ്പെട്ട തർക്കങ്ങളാണ് ശ്രീലേഖയെ രാജി തീരുമാനത്തിലേക്ക് നയിച്ചത്. വ്യക്തിപരമായ കാരണങ്ങളാലാണ് രാജിയെന്ന് വിശദീകരിച്ചിരുന്നെങ്കിലും, ബിജെപി നേതൃത്വവുമായി വിവിധ വിഷയങ്ങളിൽ അഭിപ്രായഭിന്നതകൾ നിലനിന്നിരുന്നതായി റിപ്പോർട്ടുണ്ടായിരുന്നു. കോർപ്പറേഷൻ തിരഞ്ഞെടുപ്പിന് ശേഷം മേയർ സ്ഥാനം നൽകാത്തതിൽ അവർക്ക് അതൃപ്തിയുണ്ടായിരുന്നു. പ്രചാരണഘട്ടത്തിൽ ശ്രീലേഖയെ മുൻനിർത്തി മുന്നേറിയെങ്കിലും പിന്നീട് വി.വി. രാജേഷിനെ മേയറാക്കാൻ ബിജെപി തീരുമാനിക്കുകയായിരുന്നു. തുടർന്ന് നടന്ന നിയമസഭാ തിരഞ്ഞെടുപ്പിൽ വട്ടിയൂർക്കാവിൽ ബിജെപി സ്ഥാനാർഥിയായി മത്സരിച്ചെങ്കിലും മൂന്നാം സ്ഥാനത്താണ് എത്തിയത്. പ്രതീക്ഷിച്ച വോട്ടുകൾ സമാഹരിക്കാനായില്ലെന്ന ആക്ഷേപവും ഇതോടൊപ്പം ഉയർന്നു.
രാജിവെക്കാനുള്ള തീരുമാനം അറിയിച്ച് കൗൺസിലർ വാട്‌സാപ് ഗ്രൂപ്പിലിട്ട സന്ദേശം പിന്നീട് ഡിലീറ്റ് ചെയ്തിട്ടുണ്ട്. കോർപ്പറേഷനുമായി ബന്ധപ്പെട്ട എല്ലാ വിഷയങ്ങളും നേതാക്കൾ ചർച്ചയിൽ ബോധ്യപ്പെടുത്തിയതായി ബിജെപി വൃത്തങ്ങൾ വ്യക്തമാക്കി.
ഒരു സ്വതന്ത്രന്റെ പിന്തുണയോടെയാണ് ബിജെപി തിരുവനന്തപുരം കോർപ്പറേഷൻ ഭരിക്കുന്നത്. അതിനാൽ ശ്രീലേഖയുടെ രാജി ബിജെപിയുടെ ഭരണ നിലനില്പിനെ പ്രതിസന്ധിയിലാക്കിയിരുന്നു. ബിജെപി നടത്തിയ ഇടപെടലോടെ രാജി തീരുമാനത്തിൽ നിന്ന് അവർ പിന്മാറുന്നത് നേതൃത്വത്തിന് വലിയ ആശ്വാസമാകുകയാണ്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.