ഫ്ലൈദുബായ് ആക്രമണം: കോക്പിറ്റിലെ നിർണായക നിമിഷങ്ങൾ വെളിപ്പെടുത്തി ഇന്ത്യൻ പൈലറ്റ്

ദുബായ്: ഫ്ലൈദുബായ് വിമാനത്തിലെ കോക്പിറ്റ് ആക്രമണവുമായി ബന്ധപ്പെട്ട് പുതിയ വിവരങ്ങൾ പുറത്ത്. ആക്രമണത്തിൽ പരിക്കേറ്റ ഇന്ത്യൻ ക്യാപ്റ്റൻ സ്മിത് മച്ച്ഛർ, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായുള്ള ഫോൺ സംഭാഷണത്തിൽ ആക്രമണ സമയത്ത് കോക്പിറ്റിൽ നടന്ന കാര്യങ്ങൾ വിശദമായി വെളിപ്പെടുത്തി. ഒമാൻ സ്വദേശിയായ കോപൈലറ്റ് പ്രാർഥിക്കണമെന്ന് പറഞ്ഞതിന് പിന്നാലെയാണ് ആക്രമണം ആരംഭിച്ചതെന്ന് മച്ച്ഛർ പറഞ്ഞു.

കോപൈലറ്റ് പ്രാർഥിക്കാനായി എഴുന്നേറ്റുനിന്നതിന് പിന്നാലെ ഏതാനും മിനിറ്റുകൾക്കകം പിന്നിൽനിന്ന് തലയ്ക്ക് ശക്തമായ അടിയേറ്റതായി മച്ച്ഛർ പറഞ്ഞു. തുടർച്ചയായി ആക്രമണം ഉണ്ടായതോടെ കാഴ്ച മങ്ങുകയും നിലതെറ്റുകയും ചെയ്തു. വിമാനത്തിന്റെ നിയന്ത്രണം നഷ്ടപ്പെടുന്ന സാഹചര്യം ഉണ്ടായതായും, താൻ അതീവ ഗുരുതരമായ അവസ്ഥയിലായിരുന്നിട്ടും കോക്പിറ്റ് വാതിൽ തുറക്കാൻ ശ്രമിച്ചതായും അദ്ദേഹം വിശദീകരിച്ചു.

വാതിൽ തുറന്നതോടെ യാത്രക്കാരും ജീവനക്കാരും കോക്പിറ്റിലേക്ക് എത്തി ആക്രമണകാരിയെ കീഴടക്കുകയായിരുന്നു. തുടർന്ന് വിമാനത്തിലുണ്ടായിരുന്ന മറ്റൊരു പൈലറ്റ് നിയന്ത്രണം ഏറ്റെടുക്കുകയും വിമാനം സൗദി അറേബ്യയിലെ തബൂക്കിൽ സുരക്ഷിതമായി ഇറക്കുകയും ചെയ്തു. വിമാനത്തിലുണ്ടായിരുന്ന 182 പേരുടെ സുരക്ഷ ഉറപ്പാക്കുന്നതിൽ മച്ച്ഛറിന്റെ ഇടപെടൽ നിർണായകമായിരുന്നുവെന്നാണ് പുറത്തുവരുന്ന വിവരങ്ങൾ.

അതേസമയം, യുഎഇ അധികൃതരുടെ അന്വേഷണത്തിൽ കോപൈലറ്റ് ഹമ്മാം അൽ-ഹമ്മാമി വിമാനത്തിന്റെ എമർജൻസി ക്രാഷ് ആക്സ് ഉപയോഗിച്ചാണ് ക്യാപ്റ്റനെ ആക്രമിച്ചതെന്നും വിമാനം നിയന്ത്രിക്കാൻ ശ്രമിച്ചതെന്നും കണ്ടെത്തിയിരുന്നു. സംഭവത്തെ യുഎഇ പ്രോസിക്യൂട്ടർ ജനറൽ “ഭീകരാക്രമണശ്രമം” എന്നാണ് വിശേഷിപ്പിച്ചത്. ആക്രമണത്തിന്റെ കൃത്യമായ ലക്ഷ്യം എന്തായിരുന്നു, മറ്റാരുടെയെങ്കിലും സഹായമോ ബന്ധമോ ഉണ്ടായിരുന്നോ തുടങ്ങിയ കാര്യങ്ങളിൽ അന്വേഷണം തുടരുകയാണ്.

കോപൈലറ്റിന്റെ മുൻകാല പ്രവർത്തനങ്ങളെയും സോഷ്യൽ മീഡിയ പ്രവർത്തനങ്ങളെയും കുറിച്ചും പുതിയ റിപ്പോർട്ടുകൾ പുറത്തുവന്നിട്ടുണ്ട്. ഒമാനിൽ അദ്ദേഹത്തിന്റെ മുൻകാല വ്യോമയാന ജോലിക്കിടെ ആശങ്കകൾ ഉയർന്നിരുന്നുവെന്ന റിപ്പോർട്ടുകളുണ്ട്. എന്നാൽ ഈ വിവരങ്ങളിലെ എല്ലാ അവകാശവാദങ്ങളും അധികൃതർ ഔദ്യോഗികമായി സ്ഥിരീകരിച്ചിട്ടില്ലെന്നും, ആക്രമണത്തിന് പിന്നിലെ അന്തിമ കാരണം ഇതുവരെ വ്യക്തമാക്കിയിട്ടില്ലെന്നും റിപ്പോർട്ടുകൾ വ്യക്തമാക്കുന്നു.