ചെന്നൈ: ചെന്നൈ മെട്രോ റെയിൽ പദ്ധതിയുടെ രണ്ടാംഘട്ടത്തിലെ പൂനമല്ലി ബൈപാസ്–വടപളനി പാത പ്രധാനമന്ത്രി നരേന്ദ്ര മോദി ഇന്ന് ഉദ്ഘാടനം ചെയ്യും. ഏകദേശം 4,900 കോടി രൂപ ചെലവിൽ നിർമിച്ച പാതയുടെ ഉദ്ഘാടനം ഒക്ടോബർ 11 ഞായറാഴ്ചയാണ് നടക്കുന്നത്. രാവിലെ 11.30ഓടെ പ്രധാനമന്ത്രി മെട്രോയിൽ യാത്ര നടത്തുമെന്നാണ് ഔദ്യോഗിക പരിപാടി. പോരൂർ ബൈപാസ് സ്റ്റേഷനിൽനിന്ന് പൂനമല്ലി ബൈപാസ് സ്റ്റേഷനിലേക്കും തിരിച്ചുമാണ് യാത്ര നിശ്ചയിച്ചിരിക്കുന്നത്.
14.64 കിലോമീറ്റർ ദൈർഘ്യമുള്ള പാതയിൽ 17 സ്റ്റേഷനുകളുണ്ടെങ്കിലും തുടക്കത്തിൽ 11 സ്റ്റേഷനുകളിൽ മാത്രമായിരിക്കും യാത്രക്കാർക്ക് പ്രവേശനം. പൂനമല്ലി ബൈപാസ്, പൂനമല്ലി ബസ് ടെർമിനസ്, പൂനമല്ലി സർക്കാർ ആശുപത്രി, കരയൻചാവടി, കുമണൻചാവടി, കാട്ടുപാക്കം, അയ്യപ്പൻതാങ്ങൽ, തെള്ളിയാർകരം, പോരൂർ ബൈപാസ്, പോരൂർ ജങ്ഷൻ, വടപളനി എന്നിവയാണ് സർവീസ് ലഭിക്കുന്ന സ്റ്റേഷനുകൾ. ഇരട്ടനില ഘടനയുള്ള ഭാഗത്തെ ആറു സ്റ്റേഷനുകളിൽ തുടക്കത്തിൽ ട്രെയിനുകൾ നിർത്തില്ല.
ഉദ്ഘാടനദിനത്തിൽ യാത്രക്കാർക്കുള്ള വാണിജ്യ സർവീസ് വൈകിട്ട് നാലുമുതൽ രാത്രി ഒൻപതുവരെ നടത്തും. ഒക്ടോബർ 12 തിങ്കളാഴ്ച മുതൽ രാവിലെ ഏഴുമുതൽ രാത്രി ഒൻപതുവരെയായിരിക്കും സർവീസ്. തുടക്കത്തിൽ 15 ട്രെയിനുകളാണ് പാതയിൽ വിന്യസിക്കുക. പൂനമല്ലി ബൈപാസ്–വടപളനി യാത്രയുടെ പരമാവധി നിരക്ക് 40 രൂപയാണ്.
ഡ്രൈവറില്ലാ സർവീസുകൾക്കായി രൂപകൽപ്പന ചെയ്തിട്ടുള്ള പാതയിൽ തുടക്കത്തിൽ ജീവനക്കാരുടെ മേൽനോട്ടത്തിലായിരിക്കും ട്രെയിനുകൾ ഓടുക. ആവശ്യമായ പരിശോധനകളും സുരക്ഷാ സർട്ടിഫിക്കേഷനും പൂർത്തിയാക്കിയശേഷം 2027 മധ്യത്തോടെ ഡ്രൈവറില്ലാ സർവീസ് ആരംഭിക്കാനാണ് ചെന്നൈ മെട്രോ റെയിൽ ലിമിറ്റഡിന്റെ ലക്ഷ്യം. ചെന്നൈയുടെ പടിഞ്ഞാറൻ പ്രാന്തപ്രദേശങ്ങളിൽനിന്ന് നഗരത്തിലെ മറ്റു ഭാഗങ്ങളിലേക്കുള്ള യാത്ര കൂടുതൽ എളുപ്പമാക്കാൻ പുതിയ പാത സഹായിക്കുമെന്നാണ് പ്രതീക്ഷ.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.