അയർലണ്ടിലെ പൊതു ആശുപത്രികളിലെ കാത്തിരിപ്പ് പട്ടികയിൽ ആദ്യമായി 1 മില്യൺ കടന്നു

അയർലണ്ട്: അയർലണ്ടിലെ പൊതുആശുപത്രികളിൽ ചികിത്സയ്ക്കായി കാത്തിരിക്കുന്ന രോഗികളുടെ എണ്ണം ചരിത്രത്തിലാദ്യമായി 1 മില്യൺ കടന്നു. ഒരു മാസത്തിനിടെ ഏകദേശം 5,000 രോഗികൾ കൂടി പട്ടികയിൽ ഇടംപിടിച്ചതോടെയാണ് ആകെ എണ്ണം ഈ പരിധി പിന്നിട്ടത്.

നാഷണൽ ട്രീറ്റ്‌മെന്റ് പർച്ചേസ് ഫണ്ട് (NTPF) ഇന്ന് പുറത്തുവിട്ട സെപ്റ്റംബർ മാസത്തെ ഏറ്റവും പുതിയ കണക്കുകൾ പ്രകാരം, ആശുപത്രി ചികിത്സയ്ക്കായി കാത്തിരിക്കുന്നവരുടെ എണ്ണം 1,000,226 ആയി ഉയർന്നു.

ഇതിൽ പകുതിയിലധികം പേരും കൺസൾട്ടന്റിനെ ആദ്യമായി കാണുന്നതിനുള്ള ഔട്ട്‌പേഷ്യന്റ് വിഭാഗത്തിലെ അപ്പോയിന്റ്‌മെന്റിനായി കാത്തിരിക്കുകയാണ്. ഇത്തരത്തിൽ കാത്തിരിക്കുന്നവരുടെ എണ്ണം 692,524 ആണ്.

ഓഗസ്റ്റ് മാസത്തിൽ ആകെ കാത്തിരിപ്പ് പട്ടികയിൽ 995,299 രോഗികളായിരുന്നു ഉണ്ടായിരുന്നത്. സെപ്റ്റംബറിൽ ഇത് 4,927 പേർ വർധിച്ചു.

ചികിത്സയ്ക്ക് അനുയോജ്യമല്ലാത്തതിനാൽ പട്ടികയിൽനിന്ന് മാറ്റിനിർത്തിയവർ

ചികിത്സയ്ക്ക് തൽക്കാലം അനുയോജ്യമല്ലെന്ന് കണക്കാക്കി 'സസ്പെൻഡഡ്' വിഭാഗത്തിൽ ഉൾപ്പെടുത്തിയ 40,472 രോഗികളെ പുതിയ കണക്കുകളിൽ ഉൾപ്പെടുത്തിയിട്ടില്ല.

സാമൂഹിക സാഹചര്യങ്ങൾ കാരണമോ, അല്ലെങ്കിൽ എച്ച്എസ്ഇയുടെ (HSE) ആഭ്യന്തര ചികിത്സാ സംവിധാനത്തിലൂടെയോ പുറത്തുള്ള ആശുപത്രികളിലൂടെയോ, സ്വകാര്യ ആശുപത്രികൾ ഉൾപ്പെടെ, ചികിത്സ ലഭ്യമാക്കുന്നതിനുള്ള നടപടികളുടെ ഭാഗമായോ ഇവരെ ഈ വിഭാഗത്തിൽ ഉൾപ്പെടുത്തിയിട്ടുണ്ട്.

നട്ടെല്ല് ശസ്ത്രക്രിയയ്ക്കായി കാത്തിരിക്കുന്നത് 174 കുട്ടികൾ

ചിൽഡ്രൻസ് ഹെൽത്ത് അയർലണ്ടിൽ (Children’s Health Ireland) സെപ്റ്റംബർ അവസാനത്തോടെ 174 കുട്ടികൾ നട്ടെല്ല് ശസ്ത്രക്രിയയ്ക്കായി കാത്തിരിക്കുകയാണെന്നും കണക്കുകൾ വ്യക്തമാക്കുന്നു.

കാത്തിരിപ്പ് പട്ടികയിൽ ചില പുരോഗതികളുണ്ടെന്ന് ആരോഗ്യവകുപ്പ്

സെപ്റ്റംബർ മാസത്തെ കണക്കുകളിൽ ചില അനുകൂല സൂചനകളുണ്ടെന്ന് ആരോഗ്യവകുപ്പ് അറിയിച്ചു. ജൂലൈ അവസാനത്തോടെ താരതമ്യം ചെയ്യുമ്പോൾ, ആശുപത്രിയിൽ പ്രവേശിപ്പിച്ചുള്ള ചികിത്സയ്ക്കും ഒരുദിവസത്തെ ചികിത്സയ്ക്കുമായി (Inpatient/Day Cases) കാത്തിരിക്കുന്ന രോഗികളുടെ എണ്ണത്തിൽ തുടർച്ചയായ കുറവുണ്ടായതായി വകുപ്പ് ചൂണ്ടിക്കാട്ടി.

എന്നാൽ, രോഗികളുടെ ആവശ്യം വർധിക്കുന്നതും പുതിയ റഫറലുകൾ കൂടുന്നതും കാത്തിരിപ്പ് പട്ടികയിൽ സമ്മർദം സൃഷ്ടിക്കുന്നുണ്ടെന്നും ആരോഗ്യവകുപ്പ് വ്യക്തമാക്കി.

അക്യൂട്ട് ആശുപത്രികളിൽ ചികിത്സാ പ്രവർത്തനങ്ങൾ ഗണ്യമായി വർധിപ്പിച്ചിട്ടുണ്ടെങ്കിലും, രോഗികളുടെ വർധിച്ചുവരുന്ന ആവശ്യവും റഫറലുകളുടെ എണ്ണവും കാരണം കാത്തിരിപ്പ് പട്ടികയിലെ കുറവ് പ്രതീക്ഷിച്ച വേഗത്തിൽ സാധ്യമാകുന്നില്ലെന്നും വകുപ്പ് അറിയിച്ചു.