ഡബ്ലിൻ: രാജ്യത്ത് പ്രഖ്യാപിച്ചിരിക്കുന്ന പൊതുമേഖലാ പണിമുടക്ക് തികച്ചും അനാവശ്യമാണെന്നും വ്യാവസായിക നടപടികൾക്ക് നിലവിൽ യാതൊരു അടിസ്ഥാനവുമില്ലെന്നും അയർലൻഡ് പ്രധാനമന്ത്രി (താവോസീച്ച്) മീഹോൾ മാർട്ടിൻ.
വേതന വർധനവുമായി ബന്ധപ്പെട്ട് സർക്കാർ അർത്ഥവത്തായ നിർദ്ദേശങ്ങൾ മുന്നോട്ടുവെച്ചില്ലെന്ന് ആരോപിച്ച് ഒക്ടോബർ 14-ന് മൂന്ന് ലക്ഷത്തിലധികം ജീവനക്കാർ പണിമുടക്കിലേക്ക് നീങ്ങുന്ന പശ്ചാത്തലത്തിലാണ് പ്രധാനമന്ത്രി നിലപാട് വ്യക്തമാക്കിയത്.
തൊഴിലാളികൾ സമരത്തിന് ഇറങ്ങുന്നത് എന്ത് സംഭവിച്ചാലും സമരം ചെയ്യണമെന്ന മുൻവിധിയോടെയാണെന്ന പ്രധാനമന്ത്രിയുടെ മുൻ പ്രസ്താവനയ്ക്കെതിരെ ഐറിഷ് നഴ്‌സസ് ആൻഡ് മിഡ്‌വൈവ്‌സ് ഓർഗനൈസേഷൻ (INMO) രംഗത്തെത്തിയിരുന്നു. ഈ പരാമർശം "പ്രകോപനപരവും അനുചിതവുമാണെന്ന്" ഐഎൻഎംഒ ജനറൽ സെക്രട്ടറി ഫിൽ നി ഷീഗ്ദ പ്രതികരിച്ചു. എന്നാൽ, ഡൺ ബ്രിയിലെ ഭവന പദ്ധതി സന്ദർശനത്തിനിടെ സംസാരിച്ച മീഹോൾ മാർട്ടിൻ തന്റെ വാക്കുകളെ ന്യായീകരിച്ചു. താൻ പ്രകോപനം ഉണ്ടാക്കുന്ന വ്യക്തിയല്ലെന്നും, അഭിമുഖത്തിലെ വാക്കുകൾ പൂർണ്ണമായി മനസ്സിലാക്കണമെന്നും അദ്ദേഹം വ്യക്തമാക്കി.
ബജറ്റിൽ ഗണ്യമായ നികുതിയിളവുകൾ അനുവദിച്ചിട്ടുണ്ടെന്നും പൊതുസേവന വേതനത്തിനായി 1.2 ബില്യൺ യൂറോ നീക്കിവെച്ചിട്ടുണ്ടെന്നും പ്രധാനമന്ത്രി ചൂണ്ടിക്കാട്ടി. ചർച്ചകൾക്ക് അനുകൂലമായ അന്തരീക്ഷം നിലനിൽക്കെ സമരം ചെയ്യുന്നത് പൊതുജനങ്ങളെ ബുദ്ധിമുട്ടിക്കുമെന്നും അദ്ദേഹം പറഞ്ഞു. പാർലമെന്റ് മന്ദിരമായ ലെയ്ൻസ്റ്റർ ഹൗസിന് മുന്നിൽ പിക്കറ്റ് ലൈൻ തീർക്കാനുള്ള തീരുമാനത്തിൽ നിന്നും സംഘടനകൾ പിന്മാറണമെന്നും അദ്ദേഹം ആവശ്യപ്പെട്ടു.
അതിനിടെ, വേതന കാര്യത്തിൽ സർക്കാർ അനുകൂല നിലപാട് സ്വീകരിച്ചില്ലെങ്കിൽ ഒക്ടോബർ 21-ന് വീണ്ടും പണിമുടക്ക് നടത്തുമെന്ന് പ്രമുഖ ട്രേഡ് യൂണിയനായ എസ്ഐപിടിയു (SIPTU) മുന്നറിയിപ്പ് നൽകി. ജീവിതച്ചെലവ് ക്രമാതീതമായി ഉയർന്ന സാഹചര്യത്തിൽ ന്യായമായ വേതന വർധനവ് ഉറപ്പാക്കണമെന്ന് സംഘടനയുടെ ഡെപ്യൂട്ടി ജനറൽ സെക്രട്ടറി അഡ്രിയാൻ കെയ്ൻ ആവശ്യപ്പെട്ടു.
എന്നാൽ യൂണിയനുകളുടെ നീക്കം പൂർണ്ണമായും ഒഴിവാക്കാമായിരുന്ന ഒന്നാണെന്ന് പൊതുചെലവ് മന്ത്രി ജാക്ക് ചേംബേഴ്സ് പ്രതികരിച്ചു. മാസങ്ങളായി സർക്കാർ ചർച്ചകൾക്ക് തയ്യാറായിട്ടും യൂണിയനുകൾ സംഘർഷത്തിലേക്ക് നീങ്ങുകയാണെന്ന് അദ്ദേഹം കുറ്റപ്പെടുത്തി. സമരത്തിൽ പങ്കെടുക്കുന്ന ജീവനക്കാരുടെ വേതനം വെട്ടിക്കുറയ്ക്കുന്നത് സംബന്ധിച്ച് നിലവിലെ ചട്ടങ്ങൾക്കനുസൃതമായ നടപടികൾ സ്വീകരിക്കുമെന്നും മന്ത്രി വ്യക്തമാക്കി.
2008-ലെ സാമ്പത്തിക മാന്ദ്യത്തിന് ശേഷം രാജ്യം കണ്ട ഏറ്റവും വലിയ പൊതുമേഖലാ സമരത്തിനാണ് ഒക്ടോബർ 14 സാക്ഷ്യം വഹിക്കാൻ ഒരുങ്ങുന്നത്. വരും ദിവസങ്ങളിൽ ചർച്ചകൾ വഴിത്തിരിവിലെത്തിയില്ലെങ്കിൽ അയർലൻഡിലെ ഭരണ-സേവന മേഖലകൾ പൂർണ്ണമായും നിശ്ചലമാകും
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.