പട്ന: ബിഹാറിലെ ജമുയിയിൽ സ്കൂൾ വിദ്യാർഥികളായ ആൺകുട്ടിയെയും പെൺകുട്ടിയെയും തടഞ്ഞുവെച്ച് സദാചാര ഗുണ്ടായിസവും ലൈംഗികാതിക്രമവും നടത്തിയ സംഭവത്തിൽ മൂന്ന് പേർ അറസ്റ്റിൽ.
വിദ്യാർഥികളെ ഉപദ്രവിക്കുന്നതിന്റെയും കൈകൂപ്പി മാപ്പപേക്ഷിക്കുന്നതിന്റെയും ദൃശ്യങ്ങൾ പകർത്തി സമൂഹമാധ്യമങ്ങളിൽ പ്രചരിപ്പിച്ചതിനെത്തുടർന്ന് വ്യാപക പ്രതിഷേധം ഉയർന്നതോടെയാണ് പൊലീസ് നടപടി.
കോച്ചിങ് ക്ലാസ് കഴിഞ്ഞ് ഫോട്ടോയെടുക്കാനായി ജമുയിയിലെ മലയോര മേഖലയിലെത്തിയ (മഡ്വ പർവതം) പത്താം ക്ലാസ് വിദ്യാർഥികളാണ് അതിക്രമത്തിന് ഇരയായത്. കുട്ടികളെ തടഞ്ഞുനിർത്തിയ അക്രമികൾ ആൺകുട്ടിയെ തള്ളിമാറ്റിയ ശേഷം പെൺകുട്ടിയെ ബലമായി കടന്നുപിടിക്കുകയും താഴെ തള്ളിയിടുകയും ചെയ്യുകയായിരുന്നു.
രക്ഷപ്പെടാൻ വഴിയില്ലാതെ ഭയന്ന വിദ്യാർഥികൾ "ഭയ്യാ, ഞങ്ങളെ വെറുതെ വിടൂ, ഇനി ഇവിടെ വരില്ല" എന്ന് കൈകൂപ്പി കേണപേക്ഷിക്കുന്ന ദൃശ്യങ്ങൾ സംഘം തന്നെ മൊബൈൽ ഫോണിൽ ചിത്രീകരിക്കുകയായിരുന്നു. ഈ വീഡിയോ പിന്നീട് സമൂഹമാധ്യമങ്ങളിൽ വ്യാപകമായി പ്രചരിപ്പിക്കപ്പെട്ടു.
ദൃശ്യങ്ങൾ ശ്രദ്ധയിൽപ്പെട്ടതോടെ ജമുയി പൊലീസ് സ്വമേധയാ കേസെടുത്ത് പ്രത്യേക അന്വേഷണ സംഘത്തിന് (SIT) രൂപം നൽകി. തുടർന്ന് നടത്തിയ അന്വേഷണത്തിലാണ് ആക്രമണത്തിന് നേതൃത്വം നൽകിയ മൂന്ന് പ്രതികളെ അറസ്റ്റ് ചെയ്തത്. പ്രതികൾക്കെതിരെ ഭാരതീയ ന്യായ സംഹിതയിലെ (BNS) വകുപ്പുകൾക്ക് പുറമെ പോക്സോ (POCSO), ഐടി നിയമ പ്രകാരവും കേസെടുത്തു.
സംഭവത്തിൽ ദേശീയ വനിതാ കമ്മീഷനും ബിഹാർ സംസ്ഥാന വനിതാ കമ്മീഷനും റിപ്പോർട്ട് തേടിയിട്ടുണ്ട്. കുട്ടികളുടെ സ്വകാര്യത സംരക്ഷിക്കുന്നതിനായി ദൃശ്യങ്ങൾ സമൂഹമാധ്യമങ്ങളിൽ നിന്ന് നീക്കം ചെയ്യാനുള്ള നടപടികൾ സൈബർ സെൽ ഊർജിതമാക്കി. ദൃശ്യങ്ങൾ ഷെയർ ചെയ്യുന്നവർക്കെതിരെയും കർശന നിയമനടപടി സ്വീകരിക്കുമെന്ന് പൊലീസ് മുന്നറിയിപ്പ് നൽകി.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.