റോബോട്ടിക് വാലറ്റ് പാർക്കിങ് സംവിധാനവുമായി ലണ്ടൻ ഗാറ്റ്‌വിക് എയർപോർട്ട്, യാത്രക്കാര്‍ എയര്‍പോര്‍ട്ടില്‍ ഇറങ്ങിയാ ല്‍ ഉടന്‍ റോബോട്ട് കാര്‍ എടുത്തു കൊണ്ട് പോകും

ലണ്ടൻ: വിമാനയാത്രക്കാർക്ക് പാർക്കിങ് കൂടുതൽ എളുപ്പമാക്കുന്നതിനായി യുകെയിലാദ്യമായി പൂർണ്ണ ഓട്ടോമേറ്റഡ് 'റോബോട്ടിക് വാലറ്റ് പാർക്കിങ്' (Robotic Valet Parking) സംവിധാനം അവതരിപ്പിച്ച് ലണ്ടൻ ഗാറ്റ്‌വിക് എയർപോർട്ട് (London Gatwick Airport). 

ഫ്രഞ്ച് ഡീപ് ടെക് കമ്പനിയായ 'സ്റ്റാൻലി റോബോട്ടിക്സുമായി' (Stanley Robotics) പങ്കാളിത്തത്തിലാണ് വിമാനത്താവളത്തിലെ സൗത്ത് ടെർമിനലിൽ ഈ അത്യാധുനിക സേവനം ഔദ്യോഗികമായി ആരംഭിച്ചത്. യാത്രക്കാർക്ക് ഹ്യൂമൻ വാലറ്റുകളുടെ സഹായമില്ലാതെ തന്നെ പൂർണ്ണമായും ഡിജിറ്റലായി വാഹനങ്ങൾ പാർക്ക് ചെയ്യാനും തിരികെ ലഭിക്കാനും ഈ സാങ്കേതികവിദ്യ സഹായിക്കും.

പ്രവർത്തനം ഇങ്ങനെ:
എയർപോർട്ടിലെത്തുന്ന യാത്രക്കാർ തങ്ങളുടെ വാഹനം സൗത്ത് ടെർമിനലിന് സമീപമുള്ള പ്രത്യേക 'പാർക്കിങ് സ്യൂട്ടിലേക്ക്' (Private Enclosed Cabin) ഓടിച്ചുകയറ്റിയ ശേഷം ലഗേജുകളുമായി പുറത്തിറങ്ങാം. തുടർന്ന് ക്യാബിന് പുറത്തുള്ള ടച്ച് സ്ക്രീനിൽ ബുക്കിങ് സ്ഥിരീകരിക്കാൻ ക്യുആർ കോഡ് സ്കാൻ ചെയ്യണം. ഈ ഘട്ടത്തിൽ കാറിന്റെ കീ മറ്റാർക്കും കൈമാറേണ്ടതില്ല, അത് യാത്രക്കാരുടെ പക്കൽ തന്നെ സൂക്ഷിക്കാം.

യാത്രക്കാർ ക്യാബിൻ വിടുന്നതോടെ, അത്യാധുനിക സെൻസറുകളും റഡാറുകളുമുള്ള റോബോട്ട് വാഹനം ടയറുകൾക്ക് അടിയിലൂടെ മെല്ലെ ഉയർത്തി പുറത്തെ സുരക്ഷിതമായ ഔട്ട്ഡോർ പാർക്കിങ് ഏരിയയിലേക്ക് മാറ്റും. യാത്ര കഴിഞ്ഞ തിരിച്ചെത്തുമ്പോഴും ക്യുആർ കോഡ് സ്കാൻ ചെയ്താൽ റോബോട്ട് വാഹനം ക്യാബിനിൽ കൃത്യമായി തിരികെ എത്തിച്ചു നൽകും. യാത്രക്കാരുടെ ഫ്ലൈറ്റ് നമ്പറുകൾ ട്രാക്ക് ചെയ്താണ് റോബോട്ടുകൾ വാഹനങ്ങൾ റെഡിയാക്കി വെക്കുന്നത്. 

20% അധികം സംഭരണ ശേഷി
റോബോട്ടുകൾക്ക് വാഹനത്തിന്റെ വാതിലുകൾ തുറക്കേണ്ടതില്ലാത്തതിനാൽ വളരെ കുറഞ്ഞ സ്ഥല പരിമിതിയിൽ കൃത്യതയോടെ വാഹനങ്ങൾ അടുത്തടുത്ത് പാർക്ക് ചെയ്യാൻ സാധിക്കും. ഇത് സാധാരണ സെൽഫ്-പാർക്ക് ഏരിയയേക്കാൾ 20 ശതമാനത്തോളം കൂടുതൽ വാഹനങ്ങൾ ഒരേ സ്ഥലത്ത് ഉൾക്കൊള്ളിക്കാൻ വിമാനത്താവളത്തിന് സഹായകരമാകുന്നു എന്ന് ഗാറ്റ്‌വിക് അധികൃതർ വ്യക്തമാക്കി. 

ചില നിയന്ത്രണങ്ങൾ
നിലവിൽ 5 ദിവസമോ അതിൽ കൂടുതലോ യാത്ര ചെയ്യുന്നവർക്ക് മാത്രമാണ് ഈ സേവനം ലഭ്യമാക്കിയിട്ടുള്ളത്, ഇതിനായി അഞ്ച് ദിവസത്തേക്ക് ഏകദേശം £109 ആണ് ചാർജ്. റോബോട്ടിക് പാർക്കിങ് സംവിധാനം 95% വാഹന മോഡലുകളിലും അനുയോജ്യമാണ്. എങ്കിലും റൂഫ് ബോക്സുകളുള്ള എസ്‌യുവികൾ, ഉയരം വളരെ കുറഞ്ഞ സ്പോർട്സ് കാറുകൾ, വലിയ വാനുകൾ (ഉദാഹരണത്തിന് Renault Trafic, Range Rover Sport Hybrid) എന്നിവ ഈ റോബോട്ട് സംവിധാനത്തിന് അനുയോജ്യമല്ല. 

ഈ പുതിയ സംവിധാനം എയർപോർട്ട് ജീവനക്കാരുടെ തൊഴിലവസരങ്ങളെ ബാധിക്കില്ലെന്നും യാത്രക്കാരുടെ അനുഭവം കൂടുതൽ ലളിതമാക്കാൻ വേണ്ടിയുള്ളതാണെന്നും ഗാറ്റ്‌വിക് എയർപോർട്ട് പ്രൊഡക്ട്സ് ആൻഡ് മാർക്കറ്റിങ് മേധാവി ഒലിവർ ബെഡ്ഫോർഡ് പ്രതികരിച്ചു.