അകമ്പടി വാഹനം കൂട്ടി: പൊലീസിനോട് ക്ഷുഭിതനായി മുഖ്യമന്ത്രി, അധിക സുരക്ഷ വേണ്ടെന്ന് കർശന നിലപാടുമായി വി.ഡി. സതീശൻ,

തിരുവനന്തപുരം: ഔദ്യോഗിക യാത്രകളിൽ അധിക സുരക്ഷയോ വാഹനവ്യൂഹമോ ഏർപ്പെടുത്തരുതെന്ന തന്റെ കർശന നിർദേശം ലംഘിച്ചതിൽ ഉന്നത പൊലീസ് ഉദ്യോഗസ്ഥനോട് അതൃപ്തി വ്യക്തമാക്കി മുഖ്യമന്ത്രി വി.ഡി. സതീശൻ.

ഇന്ന് രാവിലെ തിരുവനന്തപുരം കവടിയാറിൽ സംഘടിപ്പിച്ച പൊതുപരിപാടിയിൽ പങ്കെടുക്കാൻ എത്തിയപ്പോഴാണ് നാടകീയ സംഭവങ്ങൾ അരങ്ങേറിയത്. മുഖ്യമന്ത്രി സഞ്ചരിച്ച വാഹനത്തിന് മുന്നിലെ പൈലറ്റ് വാഹനത്തിന് പുറമെ മറ്റൊരു പൊലീസ് ജീപ്പ് കൂടി അകമ്പടിയായി വിന്യസിച്ചതാണ് അദ്ദേഹത്തിന്റെ അതൃപ്തിക്ക് ഇടയാക്കിയത്. 

ചടങ്ങിനെത്തിയ ശേഷം കാറിൽ നിന്ന് പുറത്തിറങ്ങിയ ഉടൻ തന്നെ മുഖ്യമന്ത്രി അവിടെയുണ്ടായിരുന്ന ഡെപ്യൂട്ടി കമ്മീഷണറോട് (ഡി.സി.പി) തന്റെ അമർഷം നേരിട്ട് അറിയിക്കുകയും നിലപാട് ആവർത്തിക്കുകയും ചെയ്തു. ജനങ്ങൾക്ക് യാതൊരു തരത്തിലുള്ള ബുദ്ധിമുട്ടും ഉണ്ടാക്കുന്ന രീതിയിലുള്ള സുരക്ഷാക്രമീകരണങ്ങൾ തന്റെ യാത്രാവേളകളിൽ ഉണ്ടാകരുതെന്ന് അധികാരമേൽക്കുന്നതിന് മുൻപ് തന്നെ വി.ഡി. സതീശൻ വ്യക്തമാക്കിയിരുന്നു.

 മുഖ്യമന്ത്രിയുടെ ഔദ്യോഗിക യാത്രകളിൽ സാധാരണയായി കാണാറുള്ള പൈലറ്റ്, എസ്കോർട്ട് വാഹനങ്ങൾക്ക് പുറമെ മറ്റ് അധിക വാഹനങ്ങൾ പാടില്ലെന്നും, റോഡുകളിൽ അനാവശ്യമായി ഗതാഗത നിയന്ത്രണം ഏർപ്പെടുത്തി പൊതുജനങ്ങളെ ബുദ്ധിമുട്ടിക്കരുതെന്നും അദ്ദേഹം ഉന്നത പൊലീസ് മേധാവികൾക്ക് കൃത്യമായ നിർദേശം നൽകിയിരുന്നതാണ്.

വി.ഐ.പി യാത്രകൾ മൂലമുണ്ടാകുന്ന ഗതാഗതക്കുരുക്കുകൾക്കെതിരെ പൊതുസമൂഹത്തിൽ നിലനിൽക്കുന്ന വിമർശനങ്ങൾ കണക്കിലെടുത്താണ് മുഖ്യമന്ത്രി ഇത്തരം ഒരു ശൈലീമാറ്റത്തിന് തുടക്കമിട്ടത്. 

എന്നാൽ, ഉന്നത പദവികൾ വഹിക്കുന്നവരുടെ സുരക്ഷ മുൻനിർത്തി എസ്കോർട്ട് സംവിധാനം പൂർണമായും ഒഴിവാക്കാൻ സാധിക്കില്ലെന്ന നിലപാടിലാണ് പൊലീസ് അധികൃതർ. ഈ സാഹചര്യത്തിലും ജനപക്ഷ സമീപനം ഉയർത്തിപ്പിടിച്ച് അധിക സുരക്ഷ കർശനമായി നിരസിച്ച മുഖ്യമന്ത്രിയുടെ നിലപാട് ഇതിനോടകം വലിയ ശ്രദ്ധ നേടിയിട്ടുണ്ട്.