റഷ്യയുടെ ആണവ ബോംബർ തകർന്നു വീണു; ആറ് ക്രൂ അംഗങ്ങൾ മരിച്ചു

മോസ്കോ: റഷ്യയുടെ കിഴക്കൻ മേഖലയായ അമൂർ പ്രവിശ്യയിൽ ആണവായുധ വാഹക ശേഷിയുള്ള തുപൊലേവ് ടി.യു-95 (Tu-95) സ്ട്രാറ്റജിക് ബോംബർ യുദ്ധവിമാനം തകർന്നു വീണ് ആറ് ക്രൂ അംഗങ്ങൾ മരിച്ചു. സംഭവത്തിൽ പരിക്കേറ്റ ഒരാളെ വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റിയതായി റഷ്യൻ പ്രതിരോധ മന്ത്രാലയം സ്ഥിരീകരിച്ചു.

പരീക്ഷണ പറക്കലിനിടയിൽ ക്രാസ്നോയാറോവോ ഗ്രാമത്തിന് സമീപമാണ് അപകടമുണ്ടായത്. അമൂർ പ്രവിശ്യയിലെ ‘ഉക്രെങ്ക’ വ്യോമത്താവളത്തിൽ നിന്ന് ടേക്ക് ഓഫ് ചെയ്ത ഉടനെയാണ് വിമാനം തകർന്നു വീണത്. വിമാനത്തിൽ ആയുധങ്ങൾ ഉണ്ടായിരുന്നില്ലെന്നും സാങ്കേതിക തകരാറാണ് ദുരന്തത്തിന് കാരണമെന്നുമാണ് പ്രാഥമിക നിഗമനം. സംഭവത്തിൽ ഔദ്യോഗികമായി അന്വേഷണം ആരംഭിച്ചിട്ടുണ്ട്.

കഴിഞ്ഞ വർഷം ഉക്രെയ്ൻ നടത്തിയ ‘ഓപ്പറേഷൻ സ്പൈഡർവെബ്’ ആക്രമണങ്ങളെത്തുടർന്ന്, റഷ്യ സുരക്ഷിതമായി മാറ്റിസൂക്ഷിച്ചിരുന്നതാണ് ഈ തുപൊലേവ് ടി.യു-95 ബോംബർ വിമാനം. സോവിയറ്റ് യൂണിയന്റെ കാലത്ത് രൂപകൽപ്പന ചെയ്ത ഇവ റഷ്യയുടെ സുപ്രധാന പ്രതിരോധ കരുത്തുകളിൽ ഒന്നാണ്.