ഒക്ടോബർ 19 നിർണായകം: കാനഡയുടെ എണ്ണ സമ്പത്തിൽ കണ്ണ് വെച്ച് അമേരിക്ക, രാഷ്ട്രീയ പ്രതിസന്ധിക്കിടയിൽ ചർച്ചയായി ട്രംപിന്റെ സാന്നിധ്യം,

 ആൽബർട്ട: കാനഡയിലെ ഏറ്റവും വലിയ എണ്ണ ഉൽപ്പാദന കേന്ദ്രവും രാജ്യത്തെ പ്രമുഖ സാമ്പത്തിക ശക്തികേന്ദ്രവുമായ ആൽബർട്ട പ്രവിശ്യ വേർപിരിയൽ പാതയിലേക്ക് നീങ്ങുന്നു.

ഒക്ടോബർ 19-ന് കാനഡയിൽ നിന്ന് വേർപിരിയുന്നതിനുള്ള നിയമനടപടികൾ ആരംഭിക്കണമോ എന്ന വിഷയം മുൻനിർത്തി ജനങ്ങൾ വോട്ട് രേഖപ്പെടുത്തും. ഇതൊരു അന്തിമ സ്വാതന്ത്ര്യ പ്രഖ്യാപനമല്ലെങ്കിലും, കാനഡയുടെഭൂപടത്തിൽ വലിയൊരു രാഷ്ട്രീയ പോരാട്ടത്തിന് തുടക്കമിടാൻ ഈ ജനഹിത പരിശോധനയ്ക്ക് സാധിക്കും.

പ്രവിശ്യയുടെ മൊത്തം ആഭ്യന്തര ഉൽപ്പാദനത്തിന്റെ (GDP) 22 ശതമാനവും സംഭാവന ചെയ്യുന്നത് എണ്ണ-വാതക മേഖലയാണ്. രാജ്യത്ത് തന്നെ ഏറ്റവും ഉയർന്ന പ്രതിശീർഷ വരുമാനമുള്ള ആൽബർട്ടയിൽ നിന്ന് ഫെഡറൽ ഗവൺമെന്റ് വൻതോതിൽ നികുതി പിരിക്കുമ്പോൾ, തിരിച്ച് പരിസ്ഥിതി നിയമങ്ങളും കാർബൺ ടാക്സും ഏർപ്പെടുത്തി തങ്ങളുടെ പ്രകൃതിവിഭവ വികസനത്തിന് തടസ്സം നിൽക്കുന്നു എന്നതാണ് ജനങ്ങളുടെ പ്രധാന അമർഷം. തങ്ങൾ അധ്വാനിക്കുന്ന പണം മറ്റ് പ്രവിശ്യകളുടെ വികസനത്തിനായി മാറ്റി വെക്കുന്ന ഈ വ്യവസ്ഥിതിയോട് വർഷങ്ങളായി നിലനിൽക്കുന്ന വിയോജിപ്പാണ് ഇപ്പോൾ പരസ്യമായ വേർപിരിയൽ വാദത്തിലേക്ക് എത്തിച്ചിരിക്കുന്നത്.

ഈ രാഷ്ട്രീയ പ്രതിസന്ധിക്കിടയിലാണ് അമേരിക്കൻ പ്രസിഡന്റ് ഡൊണാൾഡ് ട്രംപിന്റെ സാന്നിധ്യവും ചർച്ചയാകുന്നത്. കാനഡയെ യു.എസിന്റെ 51-ാം സംസ്ഥാനമായി ട്രംപ് നിരന്തരം വിശേഷിപ്പിക്കുന്നതും, ആൽബർട്ടയിലെ എണ്ണ വിപണിയുടെ പ്രധാന ഉപഭോക്തൃ രാജ്യം അമേരിക്കയായതും പ്രവിശ്യയിലെ സ്വാതന്ത്ര്യ വാദികൾക്ക് ആവേശം നൽകുന്നുണ്ട്. എന്നിരുന്നാലും, സ്വതന്ത്ര രാജ്യമാകുന്നതും അമേരിക്കയുടെ ഭാഗമാകുന്നതും തികച്ചും വ്യത്യസ്തമായ കാര്യങ്ങളാണെന്ന് രാഷ്ട്രീയ നിരീക്ഷകർ ചൂണ്ടിക്കാണിക്കുന്നു

ഒക്ടോബർ 19-ലെ വോട്ടെടുപ്പിൽ ജനങ്ങൾ അനുകൂലമായി വോട്ട് ചെയ്താലും പെട്ടെന്നൊരു വേർപിരിയൽ സാധ്യമല്ല. കാനഡ ഭരണഘടനയും ക്ലാരറ്റി ആക്റ്റും പ്രകാരം ഫെഡറൽ ഗവൺമെന്റ്, മറ്റ് പ്രവിശ്യകൾ, പ്രദേശത്തെ തദ്ദേശീയ ജനവിഭാഗങ്ങൾ (First Nations) എന്നിവരുമായി ദീർഘകാല ചർച്ചകൾ നടത്തേണ്ടതുണ്ട്. കൂടാതെ സമുദ്രതീരമില്ലാത്ത പ്രവിശ്യയായതിനാൽ എണ്ണ കയറ്റുമതിക്കായി അയൽരാജ്യങ്ങളെ തന്നെ ആശ്രയിക്കേണ്ടി വരും. പ്രവിശ്യാ പ്രീമിയർ ഡാനിയൽ സ്മിത്ത് കാനഡയ്ക്കുള്ളിൽ തന്നെ കൂടുതൽ അധികാരങ്ങളോടെ തുടരാൻ ആഗ്രഹിക്കുമ്പോൾ, സർവേകൾ പ്രകാരം 19 ശതമാനം ആളുകൾ മാത്രമാണ് നിലവിൽ പൂർണ്ണ വേർപിരിയലിനെ പിന്തുണയ്ക്കുന്നത്.