ന്യുയോർക്ക്: അമേരിക്കയും ഇസ്രായേലും നടത്തിയ സംയുക്ത ആക്രമണത്തില് തകർന്ന ഇറാനിലെ ആശുപത്രിയുടെ അവശിഷ്ടങ്ങള്ക്കിടയില് നിന്നാണ് ഇറാന്റെ പരമോന്നത നേതാവ് മൊജ്തബ ഖമനെയിയെ പുറത്തെടുത്തതെന്ന് ന്യൂയോർക്ക് പോസ്റ്റിന്റെ റിപ്പോർട്ട്.
നേരത്തെ നടന്ന ആക്രമണങ്ങളില് പരിക്കേറ്റ് ചികിത്സയില് കഴിയുകയായിരുന്നു മൊജ്തബ ഖമനെയി എന്നാണ് മൊഹ്സെൻ ഹൈദരിയുടെ വെളിപ്പെടുത്തല്. ഇതിനിടെ ടെഹ്രാനിലെ മൂന്ന് ആശുപത്രികള്ക്ക് നേരെ ബോംബാക്രമണം ഉണ്ടായി. മൂന്നാമത്തെ ആശുപത്രിയിലായിരുന്നു
മൊജ്തബ ഖമനെയി ഉണ്ടായിരുന്നത്. അവിടെ തകർന്ന കെട്ടിടങ്ങള്ക്കിടയില് നിന്നാണ് അദ്ദേഹത്തെ പുറത്തെടുത്തതെന്നാണ് മൊഹ്സെൻ ഹൈദരിയുടെ വാക്കുകള്. ഇതിന് ശേഷം ഖമനെയിയെ രഹസ്യ കേന്ദ്രത്തിലേക്ക് മാറ്റിയെന്നും പിന്നീട് അദ്ദേഹത്തെ ആരും പൊതുവേദിയില് കണ്ടിട്ടില്ലെന്നും റിപ്പോർട്ടില് വ്യക്തമാക്കി.
ഇറാന്റെ പുതിയ പരമോന്നത നേതാവായി മൊജ്തബ ഖമനെയിയെ തെരഞ്ഞെടുത്തതിനെക്കുറിച്ചും ഹൈദരി അഭിമുഖത്തില് സംസാരിച്ചു. ഇറാനിയൻ സ്റ്റേറ്റ് ടെലിവിഷനില് വാർത്ത വരുന്നത് വരെ തന്നെ തെരഞ്ഞെടുത്ത കാര്യം മൊജ്തബ ഖമനെയിക്ക് അറിയില്ലായിരുന്നുവെന്നാണ് ഹൈദരി പറയുന്നത്.
ഇറാന്റെ പരമോന്നത നേതാവിനെ തെരഞ്ഞെടുക്കാൻ ചുമതലയുള്ള അസംബ്ലി ഓഫ് എക്സ്പെർട്സിനും ആക്രമണത്തില് വലിയ നാശനഷ്ടങ്ങള് സംഭവിച്ചിരുന്നു. ഇതിന് ശേഷം അസംബ്ലി അംഗങ്ങള് ഒരു രഹസ്യ മുറിയില് വെച്ച് കടലാസിലാണ് തങ്ങളുടെ വോട്ടുകള് രേഖപ്പെടുത്തിയത്. മൊജ്തബ ഖമനെയിയുടെ പേര് ആദ്യം നിർദേശിച്ചത് താനാണെന്നും ഹൈദരി അവകാശപ്പെട്ടു.
"ശത്രുക്കളുടെ നിലപാട് പരിഗണിക്കുമ്പോള്, ആയത്തുള്ള മൊജ്തബ ഖമനെയിയെ അല്ലാതെ മറ്റൊരാളെയും ഇറാൻ്റെ നേതാവായി ഞങ്ങള് തിരഞ്ഞെടുക്കില്ല. മൊജ്തബ ഖമേനി പൂർണ ആരോഗ്യവാനാണെന്നും രാജ്യത്തെ നയിക്കാൻ പ്രാപ്തനാണെന്നും ഞങ്ങള്ക്ക് വിവരം ലഭിച്ചിരുന്നു. രാജ്യത്തെ നയിക്കാനുള്ള മതപരമായ യോഗ്യതയും നീതിബോധവും കഴിവും അദ്ദേഹത്തിനുണ്ടെന്ന് ഞങ്ങള് ഉറപ്പുവരുത്തി"-
മൊഹ്സെൻ ഹൈദരി പറഞ്ഞു. യോഗത്തില് പങ്കെടുത്ത 59 പേരില് 50 പേരും മൊജ്തബ ഖമനെയിക്കാണ് വോട്ട് ചെയ്തതെന്നും എട്ട് പേർ ആയത്തുള്ള അലിറേസ അറാഫിക്കും വോട്ട് ചെയ്തുവെന്നും ഒരാള് വോട്ടെടുപ്പില് നിന്ന് വിട്ടുനിന്നതായും റിപ്പോർട്ടിലുണ്ട്.
ഇറാന് നേരെ നടന്ന ശക്തമായ ആക്രമണങ്ങള്ക്ക് ശേഷം മൊജ്തബ ഖമനെയിയുടെ ആരോഗ്യനിലയെക്കുറിച്ച് വലിയ അഭ്യൂഹങ്ങള് പരന്നിരുന്നു. ആക്രമണത്തില് മൊജ്തബ ഖമനെയിയുടെ മുഖം വികൃതമായതായി യുഎസ് ഇന്റലിജൻസ് റിപ്പോർട്ടുകള് സൂചിപ്പിച്ചിരുന്നുവെന്ന റിപ്പോർട്ടുകള് പുറത്തുവന്നിരുന്നു. മൊജ്തബ ഖമനെയി ഇപ്പോഴും ജീവിച്ചിരിപ്പുണ്ടെന്നാണ് താൻ വിശ്വസിക്കുന്നതെന്ന് യുഎസ് പ്രസിഡന്റ് ഡോണാള്ഡ് ട്രംപ് പറഞ്ഞിരുന്നു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.