ദുബായ് : റോഡ് ഗതാഗത രംഗത്ത് വൻ കുതിച്ചുചാട്ടത്തിനൊരുങ്ങി യുഎഇ. ഡ്രൈവറില്ലാ വാഹനങ്ങളുടെയും ഭാവി യാത്രാ സാങ്കേതികവിദ്യകളുടെയും പരീക്ഷണങ്ങൾക്കായി മധ്യപൂർവദേശത്തെ തന്നെ ഏറ്റവും ആധുനികവും സ്മാർട്ടുമായ 'ദുബായ് മൊബിലിറ്റി ലാബ്സ്' പ്രവർത്തനമാരംഭിച്ചു. ദുബായ് റോഡ്സ് ആന്റ് ട്രാൻസ്പോർട്ട് അതോറിറ്റിയും (ആർടിഎ), ദുബായ് ഇന്റഗ്രേറ്റഡ് ഇക്കണോമിക് സോൺസ് അതോറിറ്റിയും (ഡിഐഇഇഡി) സഹകരിച്ചാണ് ദുബായ് സിലിക്കൺ ഒയാസിസിൽ ഈ പരീക്ഷണ കേന്ദ്രമൊരുക്കിയിരിക്കുന്നത്.
2030-നകം നഗരത്തിലെ ആകെ യാത്രകളുടെ 25 ശതമാനവും നിർമിതബുദ്ധി (എഐ) അധിഷ്ഠിത ഓട്ടോണമസ് വാഹനങ്ങളിലേക്ക് മാറ്റുക എന്ന ദുബായുടെ ലക്ഷ്യത്തിന് പദ്ധതി ഏറെ കരുത്തുപകരുമെന്ന് ആർടിഎ ഡയറക്ടർ ജനറലും എക്സിക്യൂട്ടീവ് ഡയറക്ടർ ബോർഡ് ചെയർമാനുമായ മത്തർ അൽ തായർ പറഞ്ഞു. പുതിയ സാങ്കേതികവിദ്യകൾ വികസിപ്പിക്കുന്നതിനും പരീക്ഷിക്കുന്നതിനും രാജ്യന്തര തലത്തിലുള്ള കമ്പനികൾക്കും എൻജിനീയർമാർക്കും വിദഗ്ധർക്കും ഈ കേന്ദ്രം വലിയ അവസരമൊരുക്കും.
സിലിക്കൺ ഒയാസിസ് മുതൽ അൽ ഖുദ്ര വരെയുള്ള പൊതു റോഡുകളിലും പ്രത്യേകം സജ്ജീകരിച്ച നിയന്ത്രിത മേഖലകളിലുമായി 248 ട്രാഫിക് സാഹചര്യങ്ങളാണ് ഇവിടെ പരീക്ഷണവിധേയമാക്കുന്നത്. നഗരത്തിലെ സങ്കീർണ്ണമായ ഗതാഗത സാഹചര്യങ്ങളോട് ഡ്രൈവറില്ലാ വാഹനങ്ങളിലെ സെൻസറുകളും തീരുമാനമെടുക്കാനുള്ള സംവിധാനങ്ങളും എങ്ങനെ പ്രതികരിക്കുന്നുവെന്ന് ഇതിലൂടെ കൃത്യമായി വിലയിരുത്താനാകും. പരീക്ഷണങ്ങൾക്ക് നേതൃത്വം നൽകുന്ന കമ്പനികൾക്കായി മൂന്ന് ലൈറ്റ്-ഇൻഡസ്ട്രിയൽ യൂണിറ്റുകളും 60 കിലോവാട്ടിന്റെ മൂന്ന് ഇലക്ട്രിക് വാഹന ചാർജിങ് കേന്ദ്രങ്ങളും സജ്ജീകരിച്ചിട്ടുണ്ട്.
ഓട്ടോണമസ് സാങ്കേതികവിദ്യാ രംഗത്ത് പ്രവർത്തിക്കുന്ന ആഗോള പ്രമുഖരായ വീറെഡ്, പൊണി.എഐ, ടെസ്ല എന്നീ കമ്പനികളുടെ വാഹനങ്ങളുടെ പരീക്ഷണം ദുബായ് മൊബിലിറ്റി ലാബിൽ വിജയകരമായി പൂർത്തിയാക്കിക്കഴിഞ്ഞു. കേന്ദ്രത്തിന്റെ ആദ്യ മൂന്ന് വർഷത്തെ ദൈനംദിന പ്രവർത്തനങ്ങൾക്കും സുരക്ഷാ മേൽനോട്ടത്തിനുമായി രാജ്യന്തര ഏജൻസിയായ 'ഡെക്ര'യെ ആണ് ആർടിഎ ചുമതലപ്പെടുത്തിയിരിക്കുന്നത്.
ഭാവി വ്യവസായങ്ങളുടെയും ആഗോള നിക്ഷേപങ്ങളുടെയും പ്രധാന കേന്ദ്രമായി ദുബായിയെ മാറ്റാൻ ഈ നീക്കം ഏറെ സഹായിക്കുമെന്ന് ദുബായ് ഇന്റഗ്രേറ്റഡ് ഇക്കണോമിക് സോൺസ് അതോറിറ്റി എക്സിക്യൂട്ടീവ് ചെയർമാൻ ഡോ. മുഹമ്മദ് അൽ സർൂണി വ്യക്തമാക്കി. ദുബായ് ഇക്കണോമിക് അജൻഡ ഡി33-ന്റെ ലക്ഷ്യങ്ങൾ കൈവരിക്കുന്നതിൽ ഇത് നിർണായക പങ്കുവഹിക്കും.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.