സ്വാഭാവിക മരണം വരെ ജീവനെ സംരക്ഷിക്കേണ്ടത് മനുഷ്യൻ്റെ കടമ, ജീവൻ അവസാനിപ്പിക്കലല്ല കാരുണ്യം:ദയാവധത്തിൽ അതിരൂക്ഷ വിമർശനവുമായി പോപ്പ് ലിയോ,

വത്തിക്കാൻ സിറ്റി: ദയാവധവും ആത്മഹത്യാ സഹായവും വ്യാജ കാരുണ്യമാണെന്ന് മാർപ്പാപ്പ പോപ്പ് ലിയോ പ്രഖ്യാപിച്ചു.

കാനഡയും ഫ്രാൻസും ഉൾപ്പെടെയുള്ള രാജ്യങ്ങളിൽ ദയാവധം നിയമവിധേയമാക്കുന്ന വേളയിലാണ് വത്തിക്കാനിൽ വെച്ച് മാർപ്പാപ്പ ഈ പ്രസ്താവന നടത്തിയത്. ഗുരുതരമായ രോഗങ്ങൾ അനുഭവിക്കുന്നവരുടെയും വയോജനങ്ങളുടെയും ജീവൻ നിയമപരമായി അവസാനിപ്പിക്കുന്നത് മാനുഷിക മൂല്യങ്ങൾക്ക് യോജിച്ചതല്ലെന്നും ജീവന്റെ വിശുദ്ധി തകർക്കുന്നതാണെന്നും അദ്ദേഹം വ്യക്തമാക്കി.

പാശ്ചാത്യ രാജ്യങ്ങളിൽ ദയാവധത്തിന് നിയമസാധുത നൽകുകയും ഇതിന്റെ വ്യാപ്തി വർദ്ധിപ്പിക്കാൻ ശ്രമിക്കുകയും ചെയ്യുന്ന സാഹചര്യത്തിലാണ് ഈ വിഷയത്തിൽ വത്തിക്കാൻ നിലപാട് വ്യക്തമാക്കിയത്. കഠിനമായ വേദന അനുഭവിക്കുന്നവരെ മരണത്തിലേക്ക് തള്ളിവിടുന്നത് അനുകമ്പയല്ലെന്ന് പോപ്പ് ചൂണ്ടിക്കാട്ടി. ഒരു വിഷയം സർക്കാർ നിയമപരമായി ശരിവെച്ചു എന്നതുകൊണ്ട് മാത്രം അത് ധാർമ്മികമായി ശരിയാകണമെന്നില്ലെന്നും അദ്ദേഹം പറഞ്ഞു.

ഗുരുതരമായ രോഗബാധ നേരിടുന്നവർക്ക് മികച്ച രീതിയിലുള്ള പല്ലിയേറ്റീവ് പരിചരണമാണ് നൽകേണ്ടത്. വേദന സംഹാര ചികിത്സ നൽകുന്നതിനോടൊപ്പം രോഗികൾ കുടുംബത്തിനോ സമൂഹത്തിനോ ബാധ്യതയല്ലെന്ന ബോധ്യം ഉണ്ടാക്കിയെടുക്കണം. സ്വാഭാവിക മരണം വരെ ജീവനെ സംരക്ഷിക്കേണ്ടത് മനുഷ്യരാശിയുടെ കടമയാണെന്നും മാർപ്പാപ്പ ഓർമ്മിപ്പിച്ചു.

വൈകല്യങ്ങളോ കടുത്ത ആരോഗ്യപ്രശ്നങ്ങളോ നേരിടുന്നവരുടെ ജീവിതം സമൂഹത്തിന് തടസ്സമല്ലെന്ന് പോപ്പ് ലിയോ പറഞ്ഞു. അവരുടെ പ്രയാസങ്ങൾ ദൈവത്തിന് മുന്നിൽ മാനിക്കപ്പെടേണ്ട ഒന്നാണ്. ശാരീരിക ബുദ്ധിമുട്ടുകൾ അനുഭവിക്കുന്നവരെ ചേർത്തുപിടിക്കുന്ന അന്തരീക്ഷമാണ് സമൂഹത്തിൽ ഉണ്ടാകേണ്ടത്.

വൈദ്യശാസ്ത്രവും സാങ്കേതികവിദ്യയും അതിവേഗം വളരുന്ന ഈ കാലഘട്ടത്തിലും മനുഷ്യജീവിതത്തിന്റെ പ്രാഥമിക അന്തസ്സ് കാത്തുസൂക്ഷിക്കാൻ എല്ലാവരും ബാധ്യസ്ഥരാണ്. രോഗികളുടെയും വയോജനങ്ങളുടെയും ജീവന് സംരക്ഷണം നൽകാൻ ആരോഗ്യമേഖലയിൽ പ്രവർത്തിക്കുന്നവരും ഭരണാധികാരികളും തയ്യാറാകണമെന്ന് ആഹ്വാനം ചെയ്തുകൊണ്ടാണ് അദ്ദേഹത്തിന്റെ പ്രസംഗം അവസാനിച്ചത്.