റെയിൽവേയ്ക്ക് ഒരു ബിഗ് സല്യൂട്ട്; തൃക്കരിപ്പൂരിൽ നിർത്താത്ത വണ്ടികൾക്ക് സ്റ്റോപ്പുണ്ടെന്ന് അധികൃതരുടെ 'അത്ഭുത' കണ്ടുപിടുത്തം!

തൃക്കരിപ്പൂർ: തൃക്കരിപ്പൂർ റെയിൽവേ സ്റ്റേഷന്റെ യാത്രാദുരിതങ്ങൾക്കും ആവശ്യങ്ങൾക്കും നേരെ റെയിൽവേ അധികൃതരുടെ ഭാഗത്തുനിന്നും ഉണ്ടായ അവിശ്വസനീയമായ പ്രതികരണം യാത്രക്കാരിൽ അമർഷം ഇരമ്പുന്നു. 

സ്റ്റേഷനിലെ അടിസ്ഥാന സൗകര്യക്കുറവുകൾ പരിഹരിക്കണമെന്നും ദീർഘദൂര ട്രെയിനുകൾക്ക് സ്റ്റോപ്പ് അനുവദിക്കണമെന്നും ആവശ്യപ്പെട്ട് നൽകിയ നിവേദനത്തിനാണ് റെയിൽവേയുടെ ഭാഗത്തുനിന്ന് പരിഹാസ്യമായ മറുപടി ലഭിച്ചത്.

നിലവിൽ സ്റ്റോപ്പില്ലാത്ത നിരവധി എക്സ്പ്രസ് ട്രെയിനുകൾക്ക് തൃക്കരിപ്പൂരിൽ സ്റ്റോപ്പ് അനുവദിച്ചിട്ടുണ്ടെന്ന മട്ടിലാണ് റെയിൽവേ അധികൃതർ മറുപടി നൽകിയിരിക്കുന്നത്. യാഥാർത്ഥ്യവുമായി യാതൊരു ബന്ധവുമില്ലാത്ത ഈ ഔദ്യോഗിക മറുപടി പുറത്തുവന്നതോടെ സോഷ്യൽ മീഡിയയിലും പൊതുസമൂഹത്തിലും വലിയ പരിഹാസമാണ് ഉയരുന്നത്. ട്രെയിനുകളുടെ സമയക്രമമോ സ്റ്റോപ്പുകളോ പരിശോധിക്കാതെ യാന്ത്രികമായി തയാറാക്കിയ ഈ മറുപടി ജനങ്ങളോടുള്ള വെല്ലുവിളിയാണെന്ന് നാട്ടുകാരും യാത്രക്കാരുടെ സംഘടനകളും കുറ്റപ്പെടുത്തുന്നു.

വർഷങ്ങളായി യാത്രാക്ലേശം അനുഭവിക്കുന്ന തൃക്കരിപ്പൂർ സ്റ്റേഷന്റെ വികസന കാര്യത്തിൽ റെയിൽവേ പുലർത്തുന്ന അനാസ്ഥയുടെയും ഉത്തരവാദിത്തമില്ലായ്മയുടെയും ഒടുവിലത്തെ ഉദാഹരണമായാണ് ഈ സംഭവത്തെ യാത്രക്കാർ വിലയിരുത്തുന്നത്. വിഷയത്തിൽ ജനപ്രതിനിധികൾ ഇടപെടണമെന്നും അടിയന്തരമായി തിരുത്തൽ നടപടികൾ സ്വീകരിക്കണമെന്നുമാണ് നാട്ടുകാരുടെ ശക്തമായ ആവശ്യം.