പുസ്തകങ്ങൾക്കിടയിൽ അതീവ മാരകമായ കാർ ബോംബുമായി യാത്ര ചെയ്ത ട്രെയിനി സോളിസിറ്ററും കൂട്ടാളിയും ഐറിഷ് പോലീസിന്റെ പിടിയിലായി

ഡബ്ലിൻ: സർവകലാശാലാ നിയമ പുസ്തകങ്ങൾക്കിടയിൽ അതീവ മാരകമായ കാർ ബോംബുമായി യാത്ര ചെയ്ത ട്രെയിനി സോളിസിറ്ററും കൂട്ടാളിയും അയര്‍ലണ്ടില്‍ ഐറിഷ് പോലീസിന്റെ പിടിയിലായി. 

റിപ്പബ്ലിക്കൻ ഭീകര സംഘടനയായ 'ന്യൂ ഐആർഎ' (New IRA) ഡബ്ലിൻ ഘടകത്തിലെ അംഗങ്ങളായ ഇവരെ അതിർത്തിക്കടുത്തുവെച്ചാണ് പോലീസ് അത്ഭുതകരമായി പിടികൂടിയത്. നിരവധി ജീവനുകൾ രക്ഷിച്ച വൻ ഭീകരാക്രമണ വിരുദ്ധ ഓപ്പറേഷനിലാണ് ഇവർ വലയിലായത്.

ഡബ്ലിൻ സ്വദേശിയായ ഇരുപതുകളിലുള്ള യുവതിയെയും, പിന്നീട് നടത്തിയ റെയ്ഡിൽ അറസ്റ്റിലായ നാൽപ്പതുകാരനെയുമാണ് ഗാർഡ സ്പെഷ്യൽ ഡിറ്റക്ടീവ് യൂണിറ്റ് (SDU) ചോദ്യം ചെയ്യുന്നത്.

അപ്രതീക്ഷിത പരിശോധന, നടുക്കുന്ന കണ്ടെത്തൽ

കഴിഞ്ഞ ബുധനാഴ്ച ഉച്ചയ്ക്ക് ശേഷം കൗണ്ടി മൊനാഗനിലെ കാരിക്മാക്രോസിന് സമീപം എൻ2 ദേശീയപാതയിൽ വെച്ചാണ് സംശയാസ്പദമായ കാർ പോലീസ് തടഞ്ഞത്. തുടർന്ന് നടത്തിയ പരിശോധനയിലാണ് കാറിനുള്ളിൽ നിയമപഠന പുസ്തകങ്ങൾക്കിടയിൽ ഒളിപ്പിച്ച നിലയിൽ ടൈമറും ഡെറ്റണേറ്ററും ഘടിപ്പിച്ച, പൂർണ്ണ സജ്ജമായ ബോംബ് കണ്ടെത്തിയത്. വടക്കൻ അയർലൻഡിലെ ഡെറി (Derry) നഗരം ലക്ഷ്യമാക്കിയാണ് സ്ഫോടകവസ്തുക്കളുമായി ഇവർ സഞ്ചരിച്ചിരുന്നത്. തുടർന്ന് പ്രതിരോധ സേനയുടെ ബോംബ് സ്ക്വാഡ് (EOD) മണിക്കൂറുകൾ നീണ്ട പരിശ്രമത്തിനൊടുവിലാണ് ബോംബ് നിർവീര്യമാക്കിയത്.

റിപ്പബ്ലിക്കൻ വിമത ഗ്രൂപ്പായ 'ന്യൂ ഐആർഎ' (New IRA) വർഷങ്ങളായി വടക്കൻ അയർലൻഡ് അതിർത്തി കേന്ദ്രീകരിച്ചാണ് പ്രധാനമായും പ്രവർത്തിച്ചിരുന്നതെങ്കിലും, സമീപകാലത്തായി അയർലൻഡിന്റെ തലസ്ഥാനമായ ഡബ്ലിനിലും ഇവർ സാന്നിധ്യം ശക്തമാക്കുന്നതായി സുരക്ഷാ ഏജൻസികൾ വ്യക്തമാക്കുന്നു.

കടുത്ത നിയമനടപടികൾ

ഭീകരവാദ വിരുദ്ധ നിയമമായ 'ഓഫെൻസസ് എഗെയ്ൻസ്റ്റ് ദി സ്റ്റേറ്റ് ആക്ട്' പ്രകാരമാണ് പ്രതികളെ നിലവിൽ കസ്റ്റഡിയിലെടുത്തിരിക്കുന്നത്. ജൂറി ഇല്ലാത്ത പ്രത്യേക ക്രിമിനൽ കോടതിയിലാകും (Special Criminal Court) ഇവരുടെ വിചാരണ നടക്കുക.

പ്രതികൾക്കെതിരെ ചുമത്തുന്ന പ്രധാന കുറ്റങ്ങൾ:

• സ്ഫോടകവസ്തു നിരോധന നിയമം: ജീവന് ഭീഷണിയാകുന്ന രീതിയിൽ ബോംബ് കൈവശം വെക്കുകയും കടത്തുകയും ചെയ്യൽ.
• നിരോധിത സംഘടനയിലെ അംഗത്വം: നിയമവിരുദ്ധ സംഘടനയായ ന്യൂ ഐആർഎയിൽ പ്രവർത്തിക്കൽ.

അതിർത്തി കടന്നുള്ള അന്വേഷണം

പിടികൂടിയ സ്ഫോടകവസ്തുക്കൾ അയർലൻഡിൽ തന്നെയാണ് നിർമ്മിച്ചതെന്നാണ് പോലീസിന്റെ പ്രാഥമിക നിഗമനം. വടക്കൻ അയർലൻഡ് പോലീസുമായി (PSNI) ചേർന്ന് ഗാർഡ സംഘം അന്വേഷണം ഊർജ്ജിതമാക്കിയിട്ടുണ്ട്. ഡബ്ലിനിലെ ഭീകരവാദ ശൃംഖലകളെ പൂർണ്ണമായും തകർക്കാനുള്ള നീക്കത്തിലാണ് സുരക്ഷാസേന.

കൗണ്ടി മൊനാഗനിൽ അതിർത്തി കടക്കാൻ ശ്രമിച്ച കാർ ബോംബ് പിടികൂടിയ സംഭവത്തിൽ ഗാർഡ കമ്മീഷണർ ജസ്റ്റിൻ കെല്ലിയും (Justin Kelly) അയർലൻഡ് നീതിന്യായ മന്ത്രി ജിം ഒക്കലഹാനും (Jim O'Callaghan) ഔദ്യോഗിക പ്രതികരണങ്ങൾ പുറത്തുവിട്ടു. വൻ ദുരന്തം ഒഴിവാക്കിയ സുരക്ഷാ സേനകളുടെ സംയുക്ത ഓപ്പറേഷനെ ഇരു സർക്കാരുകളും പ്രകീർത്തിച്ചു.

ഈ സംഭവം കടുത്ത ആശങ്കയുണ്ടാക്കുന്ന ഒന്നാണെന്ന് നീതിന്യായ മന്ത്രി ജിം ഒക്കലഹാൻ പറഞ്ഞു. റിപ്പബ്ലിക്കൻ വിമതരിൽ നിന്നുള്ള (dissident republican activity) സുരക്ഷാ ഭീഷണി ഇപ്പഴും നിലനിൽക്കുന്നു എന്നതിന്റെ തെളിവാണ് ഇതെന്നും, എന്നാൽ പൊതുജനങ്ങൾക്ക് അപകടമുണ്ടാകുന്നതിന് മുൻപ് തന്നെ പ്രതികളെയും ബോംബും പിടികൂടാൻ സാധിച്ചതിൽ ഗാർഡയെ അഭിനന്ദിക്കുന്നതായും അദ്ദേഹം വ്യക്തമാക്കി.

അതിർത്തിക്കടുത്തുവെച്ച് പിടിച്ചെടുത്തത് "അതീവ മാരകവും വിനാശകരവുമായ വലിയൊരു സ്ഫോടകവസ്തു" (extremely significant seizure) ആണെന്ന് ഗാർഡ കമ്മീഷണർ ജസ്റ്റിൻ കെല്ലി സ്ഥിരീകരിച്ചു. കൃത്യമായ രഹസ്യവിവരത്തിന്റെ അടിസ്ഥാനത്തിൽ നടത്തിയ ഈ ഓപ്പറേഷനിലൂടെ വലിയൊരു ഭീകരാക്രമണ പദ്ധതിയാണ് തകർത്തതെന്നും അദ്ദേഹം കൂട്ടിച്ചേർത്തു.