വാടകവീട്ടിൽ യുവാവിനെ തലയ്ക്കടിച്ച് കൊലപ്പെടുത്തി സുഹൃത്ത്; പ്രതി പൊലീസിൽ കീഴടങ്ങി

പന്തീരാങ്കാവ് (കോഴിക്കോട്): വാടകവീട്ടിൽ യുവാവിനെ തലയ്ക്കടിച്ച് കൊലപ്പെടുത്തി സഹവാസിയായ സുഹൃത്ത്. പെരുമണ്ണ മുണ്ടുപാലം ഇരിങ്ങല്ലൂർ പുല്ലൂക്ക് ചാലിൽ ഷെരീഖ് ആണ് കൊല്ലപ്പെട്ടത്. 

മുണ്ടുപാലം പുത്തൂർ മഠം റോഡിൽ സരിഗ വിശ്രമ കേന്ദ്രത്തിനു സമീപത്തുള്ള വീട്ടിലാണ് സംഭവം.

ഷെരീഖിന്റെ സുഹൃത്തായ ഇരിങ്ങല്ലൂർ സ്വദേശി മുഹമ്മദ് അഷ്റഫാണ് മരണം സംബന്ധിച്ച് വിവരം പന്തീരാങ്കാവ് പൊലീസിൽ നേരിട്ട് എത്തി അറിയിച്ചത്. 

ഷെരീഖിനെ താൻ തലയ്ക്ക് അടിച്ച് കൊന്നിട്ടുണ്ടെന്നും മൃതദേഹം മുണ്ടു പാലത്തെ വീട്ടിലുണ്ടെന്നുമാണ് പൊലീസിനെ അറിയിച്ചത്. ഉടൻ പൊലീസ് സ്ഥലത്തെത്തി പ്രാഥമിക പരിശോധന നടത്തി.

ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി മാറ്റും. അഷ്റഫ് പൊലീസ് കസ്റ്റഡിയിലാണ്. ഇയാൾ ലഹരിക്ക് അടിമയാണോ എന്ന കാര്യം പൊലീസ് അന്വേഷിക്കുകയാണ്.