ഓസ്‌ട്രേലിയയിലെ ഇന്ത്യൻ സമൂഹത്തെ പ്രതിസന്ധിയിലാക്കി VFS ഗ്ലോബൽ സേവനങ്ങൾ പെട്ടെന്ന് നിർത്തിവെച്ചു; കാത്തലിക് കോൺഗ്രസ് ഓസ്‌ട്രേലിയ വിദേശകാര്യ മന്ത്രിക്ക് അടിയന്തര നിവേദനം നൽകി

ഓസ്‌ട്രേലിയയിലെ ആയിരക്കണക്കിന് ഇന്ത്യൻ പ്രവാസികളെയും OCI കാർഡുടമകളെയും കടുത്ത ആശങ്കയിലാഴ്ത്തിക്കൊണ്ട്, ജൂലൈ 1 മുതൽ VFS ഗ്ലോബൽ തങ്ങളുടെ കോൺസുലർ, പാസ്‌പോർട്ട്, വിസ സേവനങ്ങൾ അടിയന്തരമായി നിർത്തിവെച്ചിരിക്കുകയാണ്. 

സ്കൂൾ അവധിക്കാലമായ ഈ സമയത്ത് നാട്ടിലേക്ക് പോകാനിരുന്ന നിരവധി കുടുംബങ്ങളാണ് ഇതോടെ വഴിമുട്ടി നിൽക്കുന്നത്.

അടിയന്തര പ്രതിസന്ധികൾ:

1. നാട്ടിൽ മരണാനന്തര ചടങ്ങുകൾക്കോ മെഡിക്കൽ അടിയന്തിരാവസ്ഥകൾക്കോ പോകേണ്ടവർക്ക് പോലും വിസയോ പാസ്‌പോർട്ടോ പുതുക്കാൻ കഴിയുന്നില്ല.

2. പാസ്‌പോർട്ട് കാലാവധി തീരാറായ പലരുടെയും വിസ സ്റ്റാറ്റസിനെ ഇത് ബാധിക്കാൻ സാധ്യതയുണ്ട്.

3. ടിക്കറ്റുകൾ ബുക്ക് ചെയ്ത പലരുടെയും OCI, വിസ അപേക്ഷകൾ കുടുങ്ങിക്കിടക്കുകയാണ്.

ഈ സാഹചര്യത്തിൽ, ഓസ്‌ട്രേലിയയിലെ ഇന്ത്യൻ കമ്മ്യൂണിറ്റിയുടെ ആശങ്കകൾ ഉന്നയിച്ച് കാത്തലിക് കോൺഗ്രസ് ഓസ്‌ട്രേലിയ (Catholic Congress Australia) ബഹുമാനപ്പെട്ട ഇന്ത്യൻ വിദേശകാര്യ മന്ത്രി ഡോ. എസ്. ജയശങ്കറിന് അടിയന്തരമായി ഇടപെടണമെന്ന് അഭ്യർത്ഥിച്ച് കത്തയച്ചു.

ഹ്യൂമാനിറ്റേറിയൻ പരിഗണന നൽകി ഇന്ത്യൻ ഹൈക്കമ്മീഷൻ വഴിയും കൺസുലേറ്റുകൾ വഴിയും അടിയന്തര വിസ/പാസ്‌പോർട്ട് സേവനങ്ങൾക്ക് ബദൽ സംവിധാനം ഒരുക്കണമെന്നും പ്രശ്നത്തിന് എത്രയും വേഗം ശാശ്വത പരിഹാരം കാണണമെന്നും കത്തിൽ ആവശ്യപ്പെട്ടിട്ടുണ്ട്.