റോയൽ ബോക്സിൽ സച്ചിനും ഭാര്യ അഞ്ജലിക്കുമൊപ്പം വിമ്പിൾഡൻ കണ്ട് ആസ്വദിച്ച് ഇന്ത്യൻ ക്രിക്കറ്റ് ക്യാപ്റ്റൻ ശുഭ്മൻ ഗില്‍;

ലണ്ടൻ: സെന്റർ കോർട്ടിലെ റോയൽ ബോക്സിലിരുന്നു വിമ്പിൾഡൻ കണ്ട് ആസ്വദിച്ച് ഇന്ത്യൻ ക്രിക്കറ്റ് ക്യാപ്റ്റൻ ശുഭ്മൻ ഗില്ലും ക്രിക്കറ്റ് ഇതിഹാസം സച്ചിൻ തെൻഡുൽക്കറും. വെള്ളിയാഴ്ച ലണ്ടനിലെ ഓൾ ഇംഗ്ലണ്ട് ലോൺ ടെന്നീസ് ആൻഡ് ക്രോക്കറ്റ് ക്ലബ്ബിൽ നടന്ന പുരുഷ സിംഗിൾസ് സെമി ഫൈനൽ മത്സരമാണ് ഇരുവരും കണ്ടത്.

74 പേർക്ക് ഇരിക്കാവുന്ന റോയൽ ബോക്സിൽ ക്ഷണിക്കപ്പെടുന്നവർക്കു മാത്രമാണു പ്രവേശനം. സച്ചിൻ തെൻഡുൽക്കർ, വിരാട് കോലി, രോഹിത് ശർമ എന്നിവർക്ക് ശേഷം വിമ്പിൾഡൻ റോയൽ ബോക്സിലിരുന്ന് കളി കാണാൻ ക്ഷണം ലഭിക്കുന്ന നാലാമത്തെ ഇന്ത്യൻ ക്യാപ്റ്റനാണ് ഗിൽ.

സെന്റർ കോർട്ടിലെ റോയൽ ബോക്സിൽ സച്ചിനും ഭാര്യ അഞ്ജലിക്കുമൊപ്പം ഗില്ലിരിക്കുന്ന ചിത്രം സമൂഹമാധ്യമങ്ങളിൽ വൈറലായി. ചിത്രം പങ്കുവച്ചുകൊണ്ടുള്ള പോസ്റ്റിനു താഴെ കമന്റുകൾ നിറഞ്ഞു. ഗില്ലും സച്ചിനും ഒരുമിച്ചെത്തിയതാണ് ആരാധകരുടെ ആകാംക്ഷ വർധിപ്പിച്ചത്. സച്ചിൻ മകൾ സാറ തെൻഡുൽക്കറും ശുഭ്മൻ ഗില്ലും പ്രണയത്തിലാണെന്ന തരത്തിൽ നേരത്തെ ഗോസിപ്പുകളുണ്ടായിരുന്നു. 

ഇതു സൂചിപ്പിച്ചാണ് പലരുടെയും കമന്റുകൾ. എന്നാൽ വിമ്പിൾഡൺ വേദിയിലെ സ്ഥിരം സാന്നിധ്യമായ സച്ചിൻ, നേരത്തെ വിരാട് കോലിയുടെ കൂടെയും മത്സരം കണ്ടിട്ടുണ്ട്.

വിമ്പിൾഡൻ നേരിട്ടു കണ്ട സച്ചിൻ തെൻഡുൽക്കർ, വിരാട് കോലി, ശുഭ്‌മാൻ ഗിൽ എന്നിവരെ ഉൾപ്പെടുത്തി വിമ്പിൾഡൻ അധികൃതർ പ്രത്യേക പോസ്റ്റ് ഔദ്യോഗിക പേജിൽ പങ്കുവയ്ക്കുകയും ചെയ്തു. 

2015ൽ സച്ചിനും കോലിയും വിമ്പിൾഡനിൽ പങ്കെടുത്ത ചിത്രവും, 2026ൽ സച്ചിൻ ഗില്ലിനൊപ്പം ഇരിക്കുന്ന ചിത്രവുമാണ് പോസ്റ്റിൽ ഉൾപ്പെടുത്തിയിരിക്കുന്നത്. ‘‘സച്ചിൻ തെൻഡുൽക്കർ, വിരാട് കോലി, ശുഭ്‌മൻ ഗിൽ. ഇന്ത്യൻ ക്രിക്കറ്റ് രാജകീയതയുടെ മൂന്നു തലമുറകൾ ഒരൊറ്റ ചിത്രത്തിൽ.’’– വിമ്പിൾഡൻ എക്സിൽ കുറിച്ചു.

അതേസമയം, ഇംഗ്ലണ്ട് ക്ലബ്ബ് ക്ഷണിക്കുന്ന പ്രത്യേക അതിഥികൾക്കായി നീക്കിവച്ചിരിക്കുന്ന റോയൽ ബോക്സിൽ വെസ്റ്റിൻഡീസ് ക്രിക്കറ്റ് ഇതിഹാസം ബ്രയാൻ ലാറയും കഴിഞ്ഞദിവസം മത്സരം കാണാനുണ്ടായിരുന്നു. നെതർലൻഡ്സ് പ്രതിരോധ താരവും ലിവർപൂൾ ക്യാപ്റ്റനുമായ വിർജിൽ വാൻ ഡൈക്കും അതിഥിയായി എത്തിയിരുന്നു. ലോകകപ്പിന്റെ പ്രീ-ക്വാർട്ടറിലാണ് നെതർലൻഡ്സ് പുറത്തായത്. ബ്രിട്ടിഷ് അഭിനേതാക്കളായ ബെനഡിക്റ്റ് കംബർബാച്ച്, ഹ്യൂ ലോറി, ഡാമിയൻ ലൂയിസ് എന്നിവരും ഫാഷൻ ഡിസൈനർ ടോം ഫോർഡ്, അന്ന വിന്റൂർ എന്നിവരും റോയൽ ബോക്സിൽ ഇരുന്ന് മത്സരം വീക്ഷിച്ചു.