ധവളപത്രം പുറത്തിറക്കിയതിനോട് വിയോജിപ്പ് അറിയിച്ച് കെ.എന്‍.ബാലഗോപാല്‍; ധനവകുപ്പു തന്നെ തയാറാക്കേണ്ടതിനു പകരം മറ്റൊരു സമിതിയെ ഏല്‍പിക്കുകയും അവര്‍ക്കു രേഖകള്‍ കൈമാറുകയും ചെയ്തു;

തിരുവനന്തപുരം: സംസ്ഥാനത്തിന്റെ ധനസ്ഥിതി വ്യക്തമാക്കി ധവളപത്രം പുറത്തിറക്കി സര്‍ക്കാര്‍. ധനമന്ത്രിയുടെ ചുമതലയുള്ള മുഖ്യമന്ത്രിയാണ് ധവളപത്രം നിയമസഭയില്‍ മേശപ്പുറത്തുവച്ചത്. അതേസമയം, മുന്‍ ധനമന്ത്രി കെ.എന്‍.ബാലഗോപാല്‍ വിയോജിപ്പ് അറിയിച്ചു. 

ഔദ്യോഗിക രഹസ്യങ്ങള്‍ പുറത്തുള്ള ആളുകളെ ഏല്‍പ്പിച്ചതിനെയാണ് ബാലഗോപാല്‍ എതിര്‍ത്തത്. ധനവകുപ്പു തന്നെ തയാറാക്കേണ്ടതിനു പകരം മറ്റൊരു സമിതിയെ ഏല്‍പിക്കുകയും അവര്‍ക്കു രേഖകള്‍ കൈമാറുകയും ചെയ്തത് ശരിയായ നടപടിയല്ലെന്നും കെ.എന്‍.ബാലഗോപാല്‍ പറഞ്ഞു.

ധവളപത്രം പുറത്തിറക്കുന്നതില്‍ പേടിയില്ലെന്നും സത്യം എല്ലാവരും അറിയുന്നതു നല്ലതാണെന്നും കെ.എന്‍.ബാലഗോപാല്‍ പറഞ്ഞു. ധനവകുപ്പിന്റെ രേഖകള്‍ ഓഡിറ്റ് ചെയ്യാനുള്ള അധികാരം സിഎജിക്കാണ്. രഹസ്യരേഖകള്‍ വളരെ കുറച്ച് ഉദ്യോഗസ്ഥര്‍ മാത്രമേ കാണാറുള്ളു. അത്തരം രേഖകള്‍ കമ്മിറ്റിക്കു കൊടുത്തത് സത്യപ്രതിജ്ഞാ ലംഘനമാണ്. രഹസ്യങ്ങള്‍ പുറത്തു പോകുന്നത് സര്‍ക്കാരിന്റെ പ്രവര്‍ത്തനങ്ങളെ താളം തെറ്റിക്കും. സിഎജിക്കു പോലും കൊടുക്കാത്ത രേഖകള്‍ പുറത്തു കൊടുത്തത് ചട്ടലംഘനമാണെന്നും ധനവകുപ്പ് ഉദ്യോഗസ്ഥരെ വിശ്വാസത്തിലെടുക്കണമൊയിരുന്നുവെന്നും ബാലഗോപാല്‍ പറഞ്ഞു.

പത്തുവര്‍ഷത്തെ സര്‍ക്കാരിന്റെ വരുമാന ചോര്‍ച്ചയും ധൂര്‍ത്തും ധവളപത്രത്തില്‍ ഇടംപിടിക്കും. കിഫ്ബി ഉണ്ടാക്കിയ സാമ്പത്തിക ബാധ്യത, നികുതി പിരിവിലെ പ്രശ്‌നങ്ങള്‍, കേന്ദ്രത്തില്‍ നിന്ന് പല ഇനങ്ങളിലായി ലഭിച്ചിട്ടുള്ള തുക, ഇതിന്റെ ചെലവഴിക്കല്‍, വകമാറ്റി ചെലവഴിക്കല്‍ തുടങ്ങിയ കാര്യങ്ങളും ധവളപത്രത്തിൽ വിശദമായി പ്രതിപാദിച്ചേക്കും. സര്‍ക്കാര്‍ ഖജനാവിന്റെ ഇപ്പോഴത്തെ കൃത്യമായ അവസ്ഥയും വ്യക്തമാക്കും.

വിസ്മയിപ്പിക്കുന്ന ഒരു ധവളപത്രം വരുന്നുണ്ടെന്നും അതില്‍ കഴിഞ്ഞ സര്‍ക്കാരിന്റെ കാലത്തെ സാമ്പത്തിക വീഴ്ചകള്‍ക്കുള്ള കൃത്യമായ മറുപടിയുണ്ടാകുമെന്നും മുഖ്യമന്ത്രി നിയമസഭയിൽ പറഞ്ഞിരുന്നു. കേന്ദ്രത്തില്‍ നിന്ന് മുമ്പ് എന്ത് കിട്ടി, ഇപ്പോള്‍ എന്ത് കിട്ടുന്നില്ല എന്നതിനെക്കുറിച്ചെല്ലാം ധവളപത്രത്തില്‍ വ്യക്തമാക്കുമെന്നും സതീശൻ പറഞ്ഞിരുന്നു.