ഞായറാഴ്ച മുതൽ കേരളത്തിലുടനീളം പരക്കെ മഴ പെയ്യാൻ സാധ്യത; വിവിധ ജില്ലകളിൽ ഓറഞ്ച്, യെല്ലോ അലർട്ടുകൾ

തിരുവനന്തപുരം: സംസ്ഥാനത്ത് വരും ദിവസങ്ങളിൽ കാലവർഷം അതിശക്തമാകുമെന്ന് കേന്ദ്ര കാലാവസ്ഥാ വകുപ്പിന്റെ പ്രവചനം. ഞായറാഴ്ച മുതൽ കേരളത്തിലുടനീളം പരക്കെ മഴ പെയ്യാൻ സാധ്യതയുണ്ട്. വടക്കൻ കേരളത്തിൽ വരും ദിവസങ്ങളിൽ അതിശക്തമായ മഴയ്ക്കുള്ള സാധ്യത മുൻനിർത്തി വിവിധ ജില്ലകളിൽ ഓറഞ്ച്, യെല്ലോ അലർട്ടുകൾ പ്രഖ്യാപിച്ചു. 

ശക്തമായ കാറ്റിനും കടലാക്രമണത്തിനും സാധ്യതയുള്ളതിനാൽ തീരദേശവാസികളും മലയോര മേഖലയിലുള്ളവരും അതീവ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദ്ദേശിച്ചു.

ഇന്ന് തിരുവനന്തപുരം, കൊല്ലം, ആലപ്പുഴ, കണ്ണൂർ, കാസർകോട് എന്നി ജില്ലകളിൽ ശക്തമായ മഴയ്ക്കുള്ള സാധ്യതയുള്ളതിനാൽ യെല്ലോ അലർട്ട് പ്രഖ്യാപിച്ചിട്ടുണ്ട്. ജൂൺ 28 ഞായറാഴ്ചയോടു കൂടി മധ്യ-വടക്കൻ കേരളത്തിൽ മഴയുടെ തീവ്രത ഗണ്യമായി വർദ്ധിക്കും. 

അന്ന് ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നി ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. മഴയുടെ ശക്തി വീണ്ടും വർദ്ധിക്കുന്നതിനെ തുടർന്ന് ആഴ്ചയുടെ തുടക്കത്തിൽ വടക്കൻ ജില്ലകളിൽ അതീവ ജാഗ്രതാ നിർദ്ദേശമുണ്ട്. ജൂൺ 29 തിങ്കളാഴ്ച കോഴിക്കോട്, കണ്ണൂർ, കാസർകോട് എന്നീ ജില്ലകളിൽ അതിശക്തമായ മഴ പ്രവചിച്ചുകൊണ്ട് ഓറഞ്ച് അലർട്ട് പ്രഖ്യാപിച്ചു.

ഇതേദിവസം ഇടുക്കി, എറണാകുളം, തൃശൂർ, പാലക്കാട്, മലപ്പുറം, വയനാട് ജില്ലകളിൽ യെല്ലോ അലർട്ടും ഉണ്ടായിരിക്കും. ജൂൺ 30 ചൊവ്വാഴ്ച വടക്കൻ ജില്ലകളായ കോഴിക്കോട്, വയനാട്, കണ്ണൂർ, കാസർകോട് എന്നിവിടങ്ങളിൽ ഓറഞ്ച് അലർട്ട് തുടരും. തുടർച്ചയായ മഴ പെയ്യുന്നതിനാൽ ഉരുൾപൊട്ടൽ, മണ്ണൊലിപ്പ് സാധ്യതയുള്ള മലയോര പ്രദേശങ്ങളിലുള്ളവർ രാത്രികാല യാത്രകൾ ഒഴിവാക്കുകയും മാറിത്താമസിക്കാൻ അധികൃതർ നിർദ്ദേശിച്ചാൽ സഹകരിക്കുകയും വേണം. ശക്തമായ കടലാക്രമണത്തിനും കാറ്റിനും സാധ്യതയുള്ളതിനാൽ കടൽതീരത്ത് പോകുന്നവർ ജാഗ്രത പാലിക്കുക. മൽസ്യത്തൊഴിലാളികൾ കടലിൽ പോകുന്നതിന് മുൻപ് ഔദ്യോഗിക നിർദ്ദേശങ്ങൾ ശ്രദ്ധിക്കണം.