ട്രെയിനിന് തീപിടിച്ചെന്ന വ്യാജപ്രചാരണം: പരിഭ്രാന്തരായി ട്രാക്കിലേക്ക് ഇറങ്ങിയ യാത്രക്കാര്‍ക്ക് എതിര്‍ദിശയില്‍ വന്ന ട്രെയിനിടിച്ച്‌ ദാരുണാന്ത്യം,

ഭോപ്പാല്‍: ട്രെയിനിന് തീപിടിച്ചെന്ന വ്യാജപ്രചാരണത്തെ തുടർന്ന് പരിഭ്രാന്തരായി ട്രാക്കിലേക്ക് ഇറങ്ങിയ നാല് യാത്രക്കാർ എതിർദിശയില്‍ വന്ന ട്രെയിനിടിച്ച്‌ മരിച്ചു.മധ്യപ്രദേശിലെ ഹെതംപൂർ റെയില്‍വേ സ്റ്റേഷന് സമീപമാണ് സംഭവം.

ഖജുരാഹോ - ഉദയ്പൂർ ഇന്റർസിറ്റി എക്സ്പ്രസിലെ (19665) യാത്രക്കാരാണ് അപകടത്തില്‍പ്പെട്ടത്.യാത്രക്കാരില്‍ ആരോ ചങ്ങല വലിച്ചതിനെ തുടർന്ന് ഇന്റർസിറ്റി എക്സ്പ്രസ് ഹെതംപൂർ സ്റ്റേഷന് സമീപം നിർത്തിയിട്ടിരിക്കുകയായിരുന്നു. ഈ സമയത്താണ് ട്രെയിനിന് തീപിടിച്ചെന്ന തരത്തിലുള്ള അഭ്യൂഹം ചിലർ പരത്തിയത്. ഇതോടെ ഭയന്നുവിറച്ച യാത്രക്കാർ കംപാർട്ടുമെന്റുകളില്‍ നിന്ന് പുറത്തേക്ക് ചാടുകയും സമീപത്തെ ട്രാക്കിലേക്ക് മാറുകയും ചെയ്തു.

ഈ സമയം തൊട്ടടുത്ത ട്രാക്കിലൂടെ അതിവേഗത്തില്‍ വന്ന ഫിറോസ്പൂർ - സീനി പാടല്‍കോട്ട് എക്സ്പ്രസ് യാത്രക്കാരുടെ ഇടയിലേക്ക് പാഞ്ഞുകയറുകയായിരുന്നു. നാല് പേരും സംഭവസ്ഥലത്തുതന്നെ മരിച്ചു.

അതേസമയം, ട്രെയിനില്‍ തീപിടിത്തം ഉണ്ടായിട്ടില്ലെന്ന് റെയില്‍വേ അധികൃതർ സ്ഥിരീകരിച്ചു. ഏതോ ഒരു യാത്രക്കാരൻ അനാവശ്യമായി ചങ്ങല വലിച്ചതിനെ തുടർന്നാണ് ട്രെയിൻ നിർത്തിയത്.