ഇഡി ഉദ്യോഗസ്ഥരെ ആക്രമിച്ച സംഭവം: നിര്‍ണായക ഹര്‍ജികള്‍ ഇന്ന് ഹൈക്കോടതിയിലും സെഷൻസ് കോടതിയിലും

തിരുവനന്തപുരം: ഇഡി ഉദ്യോഗസ്ഥരെ ആക്രമിച്ച കേസുമായി ബന്ധപ്പെട്ട നിർണായക ഹർജികള്‍ ഇന്ന് ഹൈക്കോടതിയിലും തിരുവനന്തപുരം പ്രിൻസിപ്പല്‍ സെഷൻസ് കോടതിയിലും പരിഗണിക്കും.

കേസിലെ ഒമ്പതാം പ്രതിയായ ഹരീഷ് കുമാറിന് ജാമ്യം അനുവദിച്ച ഉത്തരവിനെതിരെയാണ് പോലീസും ഇഡിയും വിവിധ കോടതികളെ സമീപിച്ചിരിക്കുന്നത്.

ഹരീഷ് കുമാറിനെ ജാമ്യത്തില്‍ വിട്ട സെഷൻസ് കോടതി ഉത്തരവ് ചോദ്യം ചെയ്ത് പോലീസും ഇഡിയും നല്‍കിയ അപ്പീലുകളാണ് ഹൈക്കോടതി ഇന്ന് പരിഗണിക്കുന്നത്. പോലീസ് സമർപ്പിച്ച അപ്പീലില്‍, സെഷൻസ് കോടതിയില്‍ പ്രതിക്ക് അനുകൂലമായി നിലപാട് എടുത്ത പ്രോസിക്യൂട്ടർ ഗീന കുമാരിയെയും എതിർകക്ഷിയാക്കിയിട്ടുണ്ട്.

അതേസമയം, പ്രതിക്ക് ജാമ്യം അനുവദിച്ച നടപടി ചോദ്യം ചെയ്ത് ഇഡി സമർപ്പിച്ച ഹർജി തിരുവനന്തപുരം പ്രിൻസിപ്പല്‍ സെഷൻസ് കോടതിയും ഇന്ന് പരിഗണിക്കും. ഈ ഹർജിയില്‍ പോലീസിന് വേണ്ടി സ്പെഷ്യല്‍ പ്രോസിക്യൂട്ടറാണ് കോടതിയില്‍ ഹാജരാകുക. കേസിന്റെ തുടർനടപടികളില്‍ ഇന്നത്തെ കോടതി നടപടികള്‍ നിർണായകമാകുമെന്നാണ് വിലയിരുത്തല്‍.