ഹോർമുസിൽ മരണക്കെണിയൊരുക്കി ഇറാൻ,ഒളിപ്പിച്ചിരിക്കുന്നത് ആയിരക്കണക്കിന് മൈനുകൾ..!

ടെഹ്റാൻ; ലോകത്തിന്റെ ഊർജനാഡിയെന്ന് വിശേഷിപ്പിക്കപ്പെടുന്ന ഹോർമുസ് കടലിടുക്ക് വീണ്ടും ഒരു യുദ്ധമുഖമായി മാറിയിരിക്കുന്നു.

ഇത്തവണ പോരാട്ടം മിസൈലുകൾ തമ്മിലല്ല, മറിച്ച് വെള്ളത്തിനടിയിൽ ഒളിപ്പിച്ചിരിക്കുന്ന ‘മൈനുകൾ’ തമ്മിലാണ്. പാക്കിസ്ഥാനിൽ നടന്ന സമാധാന ചർച്ചകൾ വഴിമുട്ടിയതോടെ ഇറാൻ വിതച്ച ആയിരക്കണക്കിന് മൈനുകൾ നീക്കം ചെയ്യാൻ അമേരിക്കൻ സെൻട്രൽ കമാൻഡ് അത്യാധുനിക അണ്ടർവാട്ടർ ഡ്രോണുകളെയും ഹെലികോപ്റ്ററുകളെയും രംഗത്തിറക്കിയിരിക്കുകയാണ്. 

‘ഓപ്പറേഷൻ എപ്പിക് ഫ്യൂറി’ എന്ന് പേരിട്ടിരിക്കുന്ന ഈ ദൗത്യം ആഗോള സമ്പദ്‌വ്യവസ്ഥയുടെ സുഗമമായ ഒഴുക്ക് വീണ്ടെടുക്കാനുള്ള ജീവൻമരണ പോരാട്ടമാണ്.ഉപരോധത്തിന്റെ നിഴലിൽ ഹോർമുസ് ലോകത്ത് ഉൽപാദിപ്പിക്കപ്പെടുന്ന പെട്രോളിയത്തിന്റെ 20 ശതമാനവും ദ്രാവക പ്രകൃതിവാതകത്തിന്റെ (എൽഎൻജി) 20 ശതമാനവും കടന്നുപോകുന്ന ഏക ഇടനാഴിയാണ് ഹോർമുസ്. എന്നാൽ നിലവിൽ ഈ പാത ഇറാൻ പൂർണമായും അടച്ചിട്ടിരിക്കുകയാണ്. ഏകദേശം 2,000 മുതൽ 6,000 വരെ നേവൽ മൈനുകൾ ഇറാൻ ഇവിടെ സ്ഥാപിച്ചിട്ടുണ്ടെന്നാണ് കണക്കാക്കുന്നത്. 

ഇതിൽ ഏറ്റവും ഭയാനകമായ വസ്തുത, ഈ മൈനുകൾ എവിടെയൊക്കെയാണ് സ്ഥാപിച്ചതെന്ന കൃത്യമായ വിവരം ഇറാനുപോലും നിലവിൽ അറിയില്ല എന്നതാണ്. ഈ അനിശ്ചിതത്വം കടലിടുക്കിനെ ഒരു മരണക്കെണിയാക്കി മാറ്റിയിരിക്കുന്നു. ചെറിയൊരു അബദ്ധം സംഭവിച്ചാൽ കപ്പലുകൾ വൻ ദുരന്തത്തിൽപെടും.

നിലവിൽ 800ലധികം കപ്പലുകളാണ് ഈ മേഖലയിൽ കുടുങ്ങിക്കിടക്കുന്നത്. ഇതിന്റെ ഫലമായി ആഗോള വിപണിയിൽ എണ്ണവില ബാരലിന് 100 ഡോളറിന് മുകളിലേക്ക് കുതിച്ചുയർന്നു. ഈ പ്രതിസന്ധി മറികടക്കാനാണ് അമേരിക്കൻ അഡ്മിറൽ ബ്രാഡ് കൂപ്പർ പുതിയ സുരക്ഷിത പാതയൊരുക്കുമെന്ന് പ്രഖ്യാപിച്ചത്.സാങ്കേതികവിദ്യയുടെ കരുത്തിൽ മൈൻ വേട്ട രണ്ടാം ലോകമഹായുദ്ധത്തിനുശേഷം യുദ്ധക്കപ്പലുകൾക്ക് ഏറ്റവും കൂടുതൽ നാശനഷ്ടമുണ്ടാക്കിയിട്ടുള്ളത് കടൽ മൈനുകളാണ്. അതുകൊണ്ടുതന്നെ നേരിട്ട് കപ്പലുകൾ അയക്കുന്നതിന് പകരം ഡ്രോണുകളെയും റോബോട്ടിക് സംവിധാനങ്ങളെയുമാണ് സെന്റ്കോം ആശ്രയിക്കുന്നത്.

അണ്ടർവാട്ടർ ഡ്രോണുകൾ എംകെ 18, മോഡ് 2 കിങ്ഫിഷ് തുടങ്ങി ടോർപീഡോ ആകൃതിയുള്ള ഡ്രോണുകളാണ് ഈ ദൗത്യത്തിലെ പ്രധാനികൾ. ഇവ വെള്ളത്തിനടിയിലൂടെ സ്വയം സഞ്ചരിക്കുകയും അത്യാധുനിക സോണാർ സംവിധാനം ഉപയോഗിച്ച് കടൽത്തട്ടിന്റെ മാപ്പ് തയ്യാറാക്കുകയും ചെയ്യുന്നു. ഒളിപ്പിച്ചുവച്ചിരിക്കുന്ന സ്ഫോടകവസ്തുക്കൾ കണ്ടെത്താൻ ഇവയ്ക്ക് അസാമാന്യമായ ശേഷിയുണ്ട്.ആകാശത്തെ കണ്ണുകൾ എംഎച്ച്-60എസ് ഹെലികോപ്റ്ററുകൾ ആകാശത്തുനിന്ന് കടൽ ഉപരിതലത്തെ നിരീക്ഷിക്കുന്നു. ‘എയർബോൺ ലേസർ മൈൻ ഡിറ്റക്ഷൻ സിസ്റ്റം’ ഉപയോഗിച്ച് വെള്ളത്തിന് തൊട്ടുതാഴെ കിടക്കുന്ന മൈനുകളെ ലേസർ രശ്മികൾ ഉപയോഗിച്ച് ഇവ തിരിച്ചറിയുന്നു.

സ്ഫോടനത്തിലൂടെ നിർവീര്യമാക്കൽ ഒരു മൈൻ കണ്ടെത്തിക്കഴിഞ്ഞാൽ അതിനെ നശിപ്പിക്കാൻ ‘എയർബോൺ മൈൻ ന്യൂട്രലൈസേഷൻ സിസ്റ്റം’ ഉപയോഗിക്കുന്നു. ഹെലികോപ്റ്ററിൽ നിന്ന് വിക്ഷേപിക്കുന്ന ഒരു ചെറിയ റോബോട്ടിക് ഉപകരണം മൈനിനടുത്തേക്ക് നീങ്ങുകയും അതിനടുത്ത് വച്ച് സ്വയം പൊട്ടിത്തെറിക്കുകയും ചെയ്യുന്നു. ഇതോടെ ഭീഷണി ഒഴിവാകുന്നു.എപ്പിക് ഫ്യൂറി, യുഎസ് പടയൊരുക്കം ഈ ദൗത്യത്തിനായി യുഎസ് നേവി  ഏറ്റവും മികച്ച പടക്കപ്പലുകളെയാണ് നിയോഗിച്ചിരിക്കുന്നത്. ‘യുഎസ്എസ് ഫ്രാങ്ക് ഇ. പീറ്റേഴ്സൺ’, ‘യുഎസ്എസ് മൈക്കൽ മർഫി’ എന്നീ ഗൈഡഡ് മിസൈൽ ഡിസ്ട്രോയറുകൾ നിലവിൽ ഗൾഫ് മേഖലയിൽ നിലയുറപ്പിച്ചിട്ടുണ്ട്. ഈ കപ്പലുകളിലെ ‘ഈജിസ് കോംബാറ്റ് സിസ്റ്റം’ ഇറാനിൽ നിന്നുള്ള ആകാശ-ഉപരിതല ആക്രമണങ്ങളെ പ്രതിരോധിക്കാൻ കഴിവുള്ളവയാണ്. 

കൂടാതെ, പഴയകാല മൈൻ വേട്ട കപ്പലുകൾക്ക് പകരം ‘യുഎസ്എസ് സാന്താ ബാർബറ’ (എൽസിഎസ്-32), ‘യുഎസ്എസ് കാൻബെറ’ (എൽസിഎസ്-30) എന്നീ അത്യാധുനിക ലിറ്ററൽ കോംബാറ്റ് ഷിപ്പുകളും രംഗത്തുണ്ട്. ഇവയിൽ ഘടിപ്പിച്ചിരിക്കുന്ന എക്യുഎസ്-20 സോണാറുകളും അൺമാൻഡ് സർഫസ് വാഹനങ്ങളും മൈൻ വേട്ടയെ കൂടുതൽ വേഗത്തിലാക്കുന്നു.ഇസ്രയേലിന്റെയും സ്വകാര്യ കമ്പനികളുടെയും പങ്ക് ഈ മേഖലയിലെ ഡ്രോൺ സാങ്കേതികവിദ്യയിൽ ഇസ്രയേൽ കമ്പനികളുടെ പങ്കും നിർണായകമാണ്. ഇസ്രയേൽ എയ്റോസ്പേസ് ഇൻഡസ്ട്രീസ് (ഐഎഐ) വികസിപ്പിച്ച 'ബ്ലൂ വെയിൽ' എന്ന ഡ്രോൺ അന്തർവാഹിനിയും, സ്കാന റോബോട്ടിക്സിന്റെ ‘ബുൾ ഷാർക്ക്’, ‘സ്റ്റിംഗ്രേ’ എന്നീ സ്വയംനിയന്ത്രിത സംവിധാനങ്ങളും ഇത്തരം പ്രവർത്തനങ്ങളിൽ മുൻപന്തിയിലുണ്ട്.ഹോർമുസ് കടലിടുക്കിലെ മൈൻ നീക്കം ചെയ്യൽ കേവലം ഒരു സൈനിക നീക്കമല്ല, മറിച്ച് ആഗോള സാമ്പത്തിക വ്യവസ്ഥയുടെ നിലനിൽപ്പിനായുള്ള പോരാട്ടമാണ്. 

ഇറാൻ വിരിച്ച മൈൻ വലയങ്ങളെ തകർക്കാൻ അമേരിക്കൻ ഡ്രോണുകൾക്ക് സാധിക്കുമോ എന്നത് വരും ദിവസങ്ങളിൽ ലോകം ഉറ്റുനോക്കുന്ന കാര്യമാണ്. സമാധാന ചർച്ചകൾ സ്തംഭനാവസ്ഥയിൽ തുടരുമ്പോൾ, സമുദ്രപാതയിലെ ഈ ‘റോബോട്ടിക് യുദ്ധം’ ആഗോള ഊർജ വിപണിയെ വീണ്ടും ചലിപ്പിക്കുമെന്ന പ്രതീക്ഷയിലാണ് ലോകം.