ഐറിഷ് ‘കിനഹാൻ കാർട്ടൽ’ സംഘത്തലവൻ പിടിയിൽ..!

ദുബായ്: രാജ്യാന്തര കുറ്റകൃത്യങ്ങളിൽ പങ്കാളിയായ കുപ്രസിദ്ധ ഐറിഷ് കുറ്റവാളിയെ ദുബായ് പൊലീസ് മിന്നൽ നീക്കത്തിലൂടെ പിടികൂടി.

അയർലൻഡിലെ കുപ്രസിദ്ധമായ ‘കിനഹാൻ കാർട്ടൽ’ എന്ന ക്രിമിനൽ സംഘത്തിലെ തലവന്മാരിലൊരാളായ ഡാനിയൽ കിനഹാനെ (40)യാണ് യുഎഇ ആഭ്യന്തര മന്ത്രാലയത്തിന്റെ സഹകരണത്തോടെ പൊലീസ് വലയിലാക്കിയത്. 

രാജ്യാന്തര തലത്തിൽ പിടികിട്ടാപ്പുള്ളിയായി പ്രഖ്യാപിക്കപ്പെട്ട ഇയാളെ പിടികൂടാൻ അയർലൻഡ് അധികൃതർ യുഎഇയുടെ സഹായം തേടിയിരുന്നു.

വൻകിട ക്രിമിനൽ പശ്ചാത്തലം, അതിവേഗ ഓപ്പറേഷൻ ഐറിഷ് അധികൃതരിൽ നിന്ന് ഇയാൾക്കെതിരെയുള്ള കുറ്റപത്രവും അറസ്റ്റ് വാറന്റും ലഭിച്ച് വെറും 48 മണിക്കൂറിനുള്ളിലാണ് ദുബായ് പൊലീസ് പ്രതിയെ കണ്ടെത്തി കസ്റ്റഡിയിലെടുത്തത്. 

2026 ഏപ്രിൽ 15നാണ് ദുബായ് പബ്ലിക് പ്രോസിക്യൂഷൻ അറസ്റ്റ് ഉത്തരവ് പുറപ്പെടുവിച്ചത്. തുടർന്ന് പൊലീസ് നടത്തിയ അതീവ രഹസ്യമായ നിരീക്ഷണങ്ങൾക്കും അന്വേഷണങ്ങൾക്കുമൊടുവിൽ ഏപ്രിൽ 17ഓടെ ഇയാൾ പിടിയിലായി.

പ്രതിയെ പിടികൂടുന്നതിനായി ആധുനിക നിരീക്ഷണ സംവിധാനങ്ങളും ഇന്റലിജൻസ് വിവരങ്ങളും പൊലീസ് ഫലപ്രദമായി ഉപയോഗിച്ചു. സങ്കീർണമായ കേസുകളിൽ അതിവേഗം നടപടി സ്വീകരിക്കാനുള്ള ദുബായ് പൊലീസിന്റെ കാര്യക്ഷമത ഈ നീക്കത്തിലൂടെ ഒരിക്കൽ കൂടി തെളിയിക്കപ്പെട്ടു. 

രാജ്യാന്തര തലത്തിൽ ലഹരിമരുന്ന് കടത്ത്, സംഘടിത കുറ്റകൃത്യങ്ങൾ തുടങ്ങിയവയിൽ ഏർപ്പെടുന്ന സംഘത്തിലെ പ്രധാനിയാണ് ഡാനിയൽ കിനഹാൻ. 2022 ഏപ്രിലിൽ അമേരിക്കൻ ഭരണകൂടം ഇയാൾക്കും കുടുംബാംഗങ്ങൾക്കും എതിരെ കർശനമായ ഉപരോധങ്ങൾ ഏർപ്പെടുത്തിയിരുന്നു. 

വൻതോതിലുള്ള സാമ്പത്തിക ഇടപാടുകളും കുറ്റകൃത്യങ്ങളും ഇയാളുടെ നേതൃത്വത്തിൽ നടന്നുവരുന്നതായി രാജ്യാന്തര അന്വേഷണ ഏജൻസികൾ കണ്ടെത്തിയിട്ടുണ്ട്.അയർലൻഡിലെ സ്റ്റേറ്റ് പൊലീസ് സേനയായ ‘ഗാർഡ’ യുഎഇയിൽ നടന്ന അറസ്റ്റിനെക്കുറിച്ച് അറിവുണ്ടെന്ന് വ്യക്തമാക്കി. പ്രതിയെ അയർലൻഡിന് കൈമാറുന്നതിനുള്ള ഔദ്യോഗിക നടപടികൾക്കായി ദുബായ് പബ്ലിക് പ്രോസിക്യൂഷൻ നിയമപരമായ നീക്കങ്ങൾ ആരംഭിച്ചു കഴിഞ്ഞു.

ആഗോള സുരക്ഷയിൽ യുഎഇയുടെ പങ്ക് അതിർത്തി കടന്നുള്ള കുറ്റകൃത്യങ്ങൾ തടയുന്നതിനും രാജ്യാന്തര കുറ്റവാളികളെ നിയമത്തിന് മുന്നിൽ കൊണ്ടുവരുന്നതിനും ആഗോള ഏജൻസികളുമായി ചേർന്ന് പ്രവർത്തിക്കാൻ യുഎഇ പ്രതിജ്ഞാബദ്ധമാണെന്ന് ദുബായ് പൊലീസ് അറിയിച്ചു. 

രാജ്യത്തെയും ആഗോള സമൂഹത്തെയും കൂടുതൽ സുരക്ഷിതമാക്കാൻ ഇത്തരം സഹകരണങ്ങൾ തുടരുമെന്നും അധികൃതർ വ്യക്തമാക്കി. ഡാനിയൽ കിനഹാന്റെ അറസ്റ്റ് രാജ്യാന്തര ക്രിമിനൽ സംഘങ്ങൾക്കുള്ള ശക്തമായ മുന്നറിയിപ്പായിട്ടാണ് ലോകമെമ്പാടുമുള്ള അന്വേഷണ ഏജൻസികൾ കാണുന്നത്.