തുർക്കി: മനുഷ്യനും നായയും തമ്മിലുള്ള സൗഹൃദം കേവലം ഒരു ഉടമയും വളർത്തുമൃഗവും തമ്മിലുള്ള ബന്ധമല്ലെന്നും, അത് പതിനാറായിരം വർഷങ്ങള്ക്ക് മുൻപേ ഗോത്രസംസ്കാരത്തിന്റെ ഭാഗമായി മാറിയ ഒന്നാണെന്നും പുതിയ പഠനങ്ങള് വെളിപ്പെടുത്തുന്നു.
മഞ്ഞുയുഗത്തിന്റെ അവസാന നാളുകളില്, കൃഷിയും സ്ഥിരതാമസവും തുടങ്ങുന്നതിനും എത്രയോ മുൻപ് തന്നെ മനുഷ്യൻ നായയെ കൂടെക്കൂട്ടിയിരുന്നു. ചെന്നായകളില് നിന്നാണ് നായ്ക്കളുടെ ഉത്ഭവം എന്ന് നേരത്തെ തന്നെ ശാസ്ത്രലോകം അംഗീകരിച്ചിരുന്നെങ്കിലും, ഇത് എന്നാണെന്നും എവിടെ വെച്ചാണെന്നും വ്യക്തമായ ധാരണയുണ്ടായിരുന്നില്ല.
പുരാതന കാലത്തെ ചെന്നായകളുടെയും നായ്ക്കളുടെയും അസ്ഥികള്ക്ക് കാഴ്ചയില് സാമ്യമുള്ളതിനാല് ഇവയെ വേർതിരിച്ചറിയുക അസാധ്യമായിരുന്നു. എന്നാല് ആധുനിക ഡിഎൻഎ പരിശോധന രീതികള് വന്നതോടെ ഈ സമസ്യയ്ക്ക് ഇപ്പോള് ഉത്തരമായിരിക്കുകയാണ്.
തുർക്കിയിലെ പിനാർബാഷി എന്ന പുരാതന ശിലായുഗ കേന്ദ്രത്തില് നിന്ന് ലഭിച്ച അവശിഷ്ടങ്ങളാണ് ചരിത്രത്തിലെ ഏറ്റവും പഴയ നായയുടേതെന്ന് സ്ഥിരീകരിക്കപ്പെട്ടിരിക്കുന്നത്. ഏകദേശം 15,800 വർഷങ്ങള്ക്ക് മുൻപ് ജീവിച്ചിരുന്ന ഈ നായയെ മനുഷ്യർ വലിയ ആദരവോടെയാണ് സംസ്കരിച്ചിരുന്നത്. വെറുമൊരു മൃഗം എന്നതിലുപരി ഒരു കുടുംബാംഗത്തിന് നല്കുന്ന പരിഗണനയോടെ കുഴിച്ചിട്ടിരിക്കുന്ന ശവകുടീരങ്ങള്, അക്കാലത്ത് തന്നെ നായ്ക്കള്ക്ക് മനുഷ്യർ നല്കിയിരുന്ന സ്ഥാനം എത്രത്തോളമായിരുന്നു എന്ന് വ്യക്തമാക്കുന്നു.
ഗവേഷകർ നടത്തിയ രാസപരിശോധനകളില് അക്കാലത്തെ മനുഷ്യരും നായ്ക്കളും ഒരേ തരം ഭക്ഷണമാണ് കഴിച്ചിരുന്നതെന്ന് തെളിഞ്ഞു. പുഴയില് നിന്നുള്ള ചെറിയ മത്സ്യങ്ങള് മുതല് വേട്ടയാടി കിട്ടുന്ന മാംസം വരെ ഇവർ പങ്കിട്ടു കഴിച്ചിരുന്നു. നായ്ക്കളെ വെറും പുറമ്പോക്കില് അലയാൻ വിടാതെ സ്വന്തം താവളങ്ങളില് അവർക്ക് ഭക്ഷണവും പാർപ്പിടവും നല്കി സംരക്ഷിച്ചു പോന്നിരുന്നു എന്നതിന്റെ വലിയ തെളിവുകൂടിയാണിത്.
എന്തിനായിരിക്കും മനുഷ്യൻ അന്ന് നായ്ക്കളെ മെരുക്കിയെടുത്തത് എന്ന ചോദ്യത്തിന് പ്രധാനമായും രണ്ട് ഉത്തരങ്ങളാണ് ഗവേഷകർ നല്കുന്നത്. മനുഷ്യൻ വലിയ മൃഗങ്ങളെ വേട്ടയാടാൻ ഇറങ്ങുമ്പോള് നായ്ക്കള് അവരുടെ സഹായികളായി പ്രവർത്തിച്ചു.
ചെന്നായകളും മറ്റ് വന്യമൃഗങ്ങളും നിറഞ്ഞ അപകടകരമായ ആ പഴയ ലോകത്ത് മനുഷ്യ കോളനികള്ക്കും കുട്ടികള്ക്കും കാവല് നില്ക്കാൻ നായ്ക്കളുടെ സഹായം അനിവാര്യമായിരുന്നു. കൂർമ്മമായ കേള്വിശക്തിയും മണക്കാനുള്ള കഴിവും നായ്ക്കളെ മികച്ച കാവല്ക്കാരാക്കി മാറ്റി.
മനുഷ്യർ ഒരിടത്തുനിന്ന് മറ്റൊരിടത്തേക്ക് കുടിയേറിയപ്പോള് തങ്ങളുടെ പ്രിയപ്പെട്ട കൂട്ടുകാരെയും ഒപ്പം കൂട്ടിയിരുന്നു. ഇതിന്റെ അടയാളങ്ങള് യൂറോപ്പിലുടനീളം കാണാം. തുർക്കിയിലെ നായ്ക്കളുടെ അതേ ജനിതകഘടനയുള്ള അസ്ഥികള് ബ്രിട്ടനിലെ ഗുഫ്സ് കേവില് നിന്ന് കണ്ടെത്തിയത്
ഗവേഷകരെ അത്ഭുതപ്പെടുത്തിയിട്ടുണ്ട്. ഏകദേശം 14,300 വർഷങ്ങള്ക്ക് മുൻപ് തന്നെ യൂറേഷ്യയില് നിന്ന് യൂറോപ്പിന്റെ അങ്ങേ അറ്റം വരെ മനുഷ്യരോടൊപ്പം ഈ നായ്ക്കളും സഞ്ചരിച്ചിരുന്നു എന്നതിന്റെ ജനിതക രേഖയാണിത്.
ഏകദേശം 8,500 വർഷങ്ങള്ക്ക് മുൻപ് തുർക്കിയില് നിന്ന് കർഷകർ യൂറോപ്പിലേക്ക് കുടിയേറിയപ്പോഴും നായ്ക്കള് അവർക്കൊപ്പം ഉണ്ടായിരുന്നു. ഈ കുടിയേറ്റം നായ്ക്കളുടെ വർഗ്ഗത്തില് വലിയ മാറ്റങ്ങളുണ്ടാക്കി. കുടിയേറി വന്ന നായ്ക്കള് യൂറോപ്പിലെ പ്രാദേശിക ചെന്നായകളുമായി സങ്കരയിനം ഉണ്ടാവുകയും ഇത് ഇന്നത്തെ കാലത്ത് നാം കാണുന്ന വ്യത്യസ്ത ഇനങ്ങളിലുള്ള നായ്ക്കളുടെ പൂർവ്വികരായി മാറുകയും ചെയ്തു. ഈ പരിണാമ പ്രക്രിയയാണ് നായ്ക്കളെ ഇത്രയേറെ ഇനങ്ങളായി മാറ്റിയത്.
ഓഡിനെപ്പോലെയുള്ള നായ്ക്കള് തങ്ങളുടെ യജമാനന്റെ സങ്കടവും സന്തോഷവും ഒരുപോലെ തിരിച്ചറിയുന്നത് ഈ പുരാതന ബന്ധത്തിന്റെ ജനിതകപരമായ തുടർച്ചയാണ്.
മനുഷ്യവംശത്തിന്റെ അതിജീവന ചരിത്രത്തില് നായ്ക്കള് വഹിച്ച പങ്ക് സമാനതകളില്ലാത്തതാണ്. മൃഗങ്ങളെ മെരുക്കിയെടുക്കുന്ന പ്രക്രിയയില് മനുഷ്യൻ കൈവരിച്ച ആദ്യ വിജയമായിരുന്നു നായ്ക്കളുടെ ഇണക്കം. മഞ്ഞുയുഗത്തിന്റെ അതിശൈത്യത്തിലും വന്യജീവികളുടെ ഭീഷണിയിലും മനുഷ്യൻ തളരാതെ മുന്നോട്ട് പോയതിന് പിന്നില് ഈ വിശ്വസ്തരായ കൂട്ടുകാരുടെ സാന്നിധ്യമുണ്ടായിരുന്നു. ഇന്നും നമ്മുടെ വീടുകളില് ഓടിക്കളിക്കുന്ന ഓരോ നായക്കുട്ടിയും 16,000 വർഷം നീണ്ട വലിയൊരു സൗഹൃദത്തിന്റെ ജീവിക്കുന്ന അടയാളമാണ്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.