മെക്സിക്കൻ സൈനിക നടപടിയിൽ കുപ്രസിദ്ധ ലഹരിമരുന്ന് രാജാവ് 'എൽ മെഞ്ചോ' കൊല്ലപ്പെട്ടു; പടിഞ്ഞാറൻ മെക്സിക്കോയിൽ വ്യാപക സംഘർഷം

 മെക്സിക്കോ സിറ്റി: ലോകം തിരയുന്ന ഏറ്റവും അപകടകാരിയായ ലഹരിമരുന്ന് മാഫിയ തലവൻ നെമെസിയോ ഒസെഗ്വേര സെർവാന്റസ് (എൽ മെഞ്ചോ) കൊല്ലപ്പെട്ടു.

പടിഞ്ഞാറൻ മെക്സിക്കോയിലെ ജാലിസ്കോ സംസ്ഥാനത്ത് മെക്സിക്കൻ സൈന്യം നടത്തിയ അതിശക്തമായ സൈനിക നീക്കത്തിനൊടുവിലാണ് 'ജാലിസ്കോ ന്യൂ ജനറേഷൻ കാർട്ടൽ' (CJNG) തലവനായ എൽ മെഞ്ചോ (59) കൊല്ലപ്പെട്ടത്. മെക്സിക്കൻ പ്രതിരോധ മന്ത്രാലയത്തെ ഉദ്ധരിച്ച് സി.എൻ.എൻ ആണ് ഈ വാർത്ത പുറത്തുവിട്ടത്.

സൈനിക നീക്കവും അന്ത്യവും

ജാലിസ്കോയിലെ തപാൽപയിൽ വെച്ചുണ്ടായ ഏറ്റുമുട്ടലിൽ എൽ മെഞ്ചോയ്ക്ക് ഗുരുതരമായി പരിക്കേറ്റിരുന്നു. തുടർന്ന് ഇയാളെ വിമാനമാർഗ്ഗം മെക്സിക്കോ സിറ്റിയിലേക്ക് മാറ്റുന്നതിനിടെയാണ് മരണം സംഭവിച്ചത്. അമേരിക്കൻ രഹസ്യാന്വേഷണ വിഭാഗത്തിന്റെ സഹായത്തോടെ നടത്തിയ ഈ ഓപ്പറേഷനിൽ പ്രത്യേക സേനാ വിഭാഗവും വ്യോമസേനയും പങ്കെടുത്തു. ഏറ്റുമുട്ടലിൽ ആറ് കാർട്ടൽ അംഗങ്ങൾ കൊല്ലപ്പെടുകയും മൂന്ന് സൈനികർക്ക് പരിക്കേൽക്കുകയും ചെയ്തു. റോക്കറ്റ് ലോഞ്ചറുകൾ ഉൾപ്പെടെയുള്ള വൻ ആയുധശേഖരം സംഭവസ്ഥലത്തുനിന്ന് സൈന്യം പിടിച്ചെടുത്തിട്ടുണ്ട്.

കത്തുന്ന ജാലിസ്കോ: വിനോദസഞ്ചാരികൾ കുടുങ്ങി

എൽ മെഞ്ചോയുടെ മരണവാർത്ത പുറത്തുവന്നതോടെ കാർട്ടൽ അംഗങ്ങൾ തെരുവിലിറങ്ങി വ്യാപക അക്രമം അഴിച്ചുവിട്ടു. ജാലിസ്കോ, മിച്ചോവാക്കൻ സംസ്ഥാനങ്ങളിൽ വാഹനങ്ങൾ തീയിട്ടും റോഡുകൾ ഉപരോധിച്ചും ഭീകരാന്തരീക്ഷം സൃഷ്ടിച്ചിരിക്കുകയാണ്. വരാനിരിക്കുന്ന ഫിഫ ലോകകപ്പിന് വേദിയാകേണ്ട ഗൗഡലഹാര നഗരത്തിൽ പലയിടത്തും പുകപടലങ്ങൾ ഉയരുന്ന ദൃശ്യങ്ങൾ പുറത്തുവന്നു.

 നഗരത്തിലെ പൊതുഗതാഗതം നിർത്തിവെച്ചു.പ്രശസ്ത വിനോദസഞ്ചാര കേന്ദ്രമായ ഇവിടെ ആയിരക്കണക്കിന് വിനോദസഞ്ചാരികൾ കുടുങ്ങിക്കിടക്കുകയാണ്. യുണൈറ്റഡ് എയർലൈൻസ്, അമേരിക്കൻ എയർലൈൻസ്, എയർ കാനഡ തുടങ്ങിയ വിമാനക്കമ്പനികൾ ഇവിടേക്കുള്ള സർവീസുകൾ റദ്ദാക്കി. ജാലിസ്കോ ഗവർണർ പാബ്ലോ ലെമസ് നവാരോ സംസ്ഥാനത്ത് 'റെഡ് അലേർട്ട്' പ്രഖ്യാപിക്കുകയും ജനങ്ങൾ വീടിന് പുറത്തിറങ്ങരുതെന്ന് നിർദ്ദേശിക്കുകയും ചെയ്തു.

ഇന്ത്യൻ പൗരന്മാർക്ക് ജാഗ്രതാ നിർദ്ദേശം

സ്ഥിതിഗതികൾ കണക്കിലെടുത്ത് മെക്സിക്കോയിലെ ഇന്ത്യൻ എംബസി അടിയന്തര ജാഗ്രതാ നിർദ്ദേശം (Advisory) പുറപ്പെടുവിച്ചു.

"ജാലിസ്കോ, തമൗലിപാസ്, മിച്ചോവാക്കൻ, ഗ്വിറേറോ, ന്യൂവോ ലിയോൺ തുടങ്ങിയ മേഖലകളിലുള്ള ഇന്ത്യൻ പൗരന്മാർ അത്യാവശ്യ കാര്യങ്ങൾക്കല്ലാതെ പുറത്തിറങ്ങരുത്. പ്രാദേശിക മാധ്യമങ്ങൾ ശ്രദ്ധിക്കാനും സുരക്ഷാ ഉദ്യോഗസ്ഥരുടെ നിർദ്ദേശങ്ങൾ കർശനമായി പാലിക്കാനും അഭ്യർത്ഥിക്കുന്നു. അടിയന്തര സാഹചര്യങ്ങളിൽ 911 എന്ന നമ്പറിൽ ബന്ധപ്പെടുക." - ഇന്ത്യൻ എംബസി

ആരായിരുന്നു എൽ മെഞ്ചോ?

1966-ൽ ജനിച്ച നെമെസിയോ ഒസെഗ്വേര, 2009-ൽ രൂപീകരിച്ച CJNG എന്ന ലഹരിമരുന്ന് മാഫിയയെ ലോകത്തിലെ തന്നെ ഏറ്റവും വലിയ കുറ്റകൃത്യ ശൃംഖലയായി വളർത്തിയെടുത്ത വ്യക്തിയാണ്. കൊക്കെയ്ൻ, ഹെറോയിൻ, ഫെന്റാനിൽ തുടങ്ങിയ മയക്കുമരുന്നുകൾ അമേരിക്കയിലേക്ക് വൻതോതിൽ കടത്തുന്നതിൽ ഇയാൾ പ്രധാന പങ്കുവഹിച്ചു. എൽ മെഞ്ചോയെ പിടികൂടാൻ സഹായിക്കുന്നവർക്ക് 15 മില്യൺ ഡോളർ (ഏകദേശം 125 കോടി രൂപ) പ്രതിഫലമാണ് അമേരിക്ക പ്രഖ്യാപിച്ചിരുന്നത്.

മെക്സിക്കൻ പ്രസിഡന്റ് ക്ലോഡിയ ഷെയ്ൻബോം രാജ്യത്ത് സമാധാനം നിലനിർത്താൻ ജനങ്ങളോട് അഭ്യർത്ഥിച്ചു. എൽ മെഞ്ചോയുടെ മരണം മെക്സിക്കൻ മയക്കുമരുന്ന് മാഫിയയ്ക്കെതിരെയുള്ള പോരാട്ടത്തിലെ ഏറ്റവും വലിയ വിജയമായാണ് വിലയിരുത്തപ്പെടുന്നത്.