ഇന്ത്യയിൽ വലിയ ഭീകരാക്രമണം നടത്താൻ പദ്ധതിയിട്ട് ലഷ്‌കറെ തൊയ്ബ; എട്ടുപേരെ അറസ്റ്റ് ചെയ്ത് ഡൽഹി പോലീസ്;എട്ട് മൊബൈൽ ഫോണുകളും 16 സിം കാർഡുകളും കണ്ടെടുത്തു

ന്യൂഡൽഹി: പാകിസ്താൻ ആസ്ഥാനമായി പ്രവർത്തിക്കുന്ന ലഷ്‌കറെ തൊയ്ബ (LeT), പാക് ചാരസംഘടനയായ ഇന്റർ-സർവീസസ് ഇന്റലിജൻസ് (ISI), ബംഗ്ലാദേശ് ആസ്ഥാനമായുള്ള ഭീകരസംഘടനകൾ എന്നിവയുമായി ബന്ധമുണ്ടെന്ന് കരുതുന്ന ഭീകരപദ്ധതി ഡൽഹി പോലീസ് തകർത്തു.ഒരു ഏകോപിത ഓപ്പറേഷനിലൂടെ തമിഴ്നാട്ടിൽ നിന്നും പശ്ചിമ ബംഗാളിൽ നിന്നുമായി പദ്ധതിയുമായി ബന്ധമുണ്ടെന്ന് സംശയിക്കുന്ന എട്ട് പേരെ അറസ്റ്റ് ചെയ്തു. വിദേശ പ്രതിനിധികളുടെ നിർദേശപ്രകാരം ഇന്ത്യയിൽ വലിയ ഭീകരാക്രമണം നടത്താനാണ് സംഘം പദ്ധതിയിട്ടിരുന്നതെന്ന് അന്വേഷണ ഉദ്യോഗസ്ഥർ സംശയിക്കുന്നു.

തമിഴ്നാട്ടിലെ തിരുപ്പൂർ ജില്ലയിലെ വസ്ത്രശാലകളിൽ നിന്ന് മിസാനുർ റഹ്മാൻ, മുഹമ്മദ് ഷബാത്ത്, ഉമർ, മുഹമ്മദ് ലിറ്റൻ, മുഹമ്മദ് ഷാഹിദ്, മുഹമ്മദ് ഉജ്ജൽ എന്നിവരെയും പശ്ചിമ ബംഗാളിൽ നിന്ന് രണ്ടുപേരെയും ഞായറാഴ്ചയാണ് അറസ്റ്റ് ചെയ്തതെന്ന് ഉദ്യോഗസ്ഥർ അറിയിച്ചു.

അറസ്റ്റിലായ ചിലർ ബംഗ്ലാദേശ് പൗരന്മാരാണെന്നും തങ്ങളുടെ തിരിച്ചറിയൽ രഹസ്യമാക്കാൻ വ്യാജ ആധാർ കാർഡുകളാണ് ഉപയോഗിച്ചിരുന്നതെന്നും പോലീസ് പറഞ്ഞു.

പോലീസ് വൃത്തങ്ങൾ പറയുന്നതനുസരിച്ച്, ഈ സംഘം ലഷ്‌കറെ തൊയ്ബയുമായി ബന്ധപ്പെട്ടിരിക്കുന്നു, സംഘത്തിന്റെ പ്രവർത്തനങ്ങൾക്ക് നേതൃത്വം നൽകുന്നത് നിലവിൽ ബംഗ്ലാദേശിൽ പ്രവർത്തിക്കുന്ന ഒരു കശ്മീരി സ്വദേശിയാണ്. ഈ വ്യക്തി പാകിസ്താനിൽ ഭീകരപ്രവർത്തനത്തിനുള്ള പരിശീലനം നേടിയതായി സംശയിക്കുന്നു, അറസ്റ്റിലായ എട്ട് പേരും ഈ വ്യക്തിയുടെ നിർദേശപ്രകാരമാണ് പ്രവർത്തിച്ചതെന്നും ഉദ്യോഗസ്ഥർ കൂട്ടിച്ചേർത്തു. ഡൽഹി ഉൾപ്പെടെ നിരവധി നഗരങ്ങളുടെ നിരീക്ഷണ വീഡിയോകൾ കണ്ടെടുത്തതായും പോലീസ് അറിയിച്ചു.

ഡൽഹിയിലെ ജനത്തിരക്കുള്ള മതപരവും പൈതൃകപരവുമായ സ്ഥലങ്ങൾ ലക്ഷ്യമിട്ട് ലഷ്‌കറെ തൊയ്ബ ഭീകരാക്രമണം നടത്താൻ സാധ്യതയുണ്ടെന്ന രഹസ്യാന്വേഷണ വിവരത്തെത്തുടർന്ന് സുരക്ഷാ ഏജൻസികൾ ജാഗ്രതാമുന്നറിയിപ്പ് നൽകിയതിന് ഒരു ദിവസത്തിന് ശേഷമാണ് അറസ്റ്റ് നടന്നത്. ചാന്ദ്‌നി ചൗക്കിലെ ഒരു ക്ഷേത്രം ആക്രമണ സാധ്യതയുള്ള ലക്ഷ്യങ്ങളിൽ ഒന്നാണെന്ന് സൂചനകളുണ്ടായിരുന്നു. ചെങ്കോട്ടയ്ക്ക് സമീപമുള്ള പ്രദേശങ്ങൾ ഉൾപ്പെടെയുള്ള പ്രധാന സ്ഥലങ്ങളിൽ സ്ഫോടകവസ്തുക്കൾ ഉപയോഗിക്കാൻ ഭീകരർ പദ്ധതിയിട്ടിരുന്നു. വിദേശ പ്രതിനിധികളുടെ നിർദേശപ്രകാരം ഇന്ത്യയിൽ വലിയ ഭീകരാക്രമണം നടത്താനാണ് പ്രതികൾ പദ്ധതിയിട്ടിരുന്നത്.

"ഭീകര പ്രവർത്തനങ്ങളെ പിന്തുണച്ചുള്ള ഓൺലൈൻ പോസ്റ്റുകളെക്കുറിച്ചുള്ള അന്വേഷണത്തെ തുടർന്നാണ് ഈ ഓപ്പറേഷൻ. പ്രാദേശിക പോലീസിന്റെ സഹായത്തോടെ സംഘം തിരുപ്പൂരിലെത്തി. ഈ ആറ് പേരും മേഖലയിലെ വസ്ത്ര നിർമ്മാണ ഫാക്ടറികളിൽ ജോലി ചെയ്യുകയായിരുന്നെന്നും വ്യാജ ആധാർ കാർഡുകൾ ഉപയോഗിക്കുകയായിരുന്നെന്നും അന്വേഷണ ഉദ്യോഗസ്ഥർ കണ്ടെത്തി," ഡൽഹി പോലീസ് സ്പെഷ്യൽ സെൽ പറഞ്ഞു. ഈ ഓപ്പറേഷനിടെ, പോലീസ് എട്ട് മൊബൈൽ ഫോണുകളും 16 സിം കാർഡുകളും കണ്ടെടുത്തു, ഇവ ഡിജിറ്റൽ തെളിവുകളും മറ്റ് ഓപ്പറേറ്റർമാരുമായുള്ള ബന്ധങ്ങളും കണ്ടെത്താനായി പരിശോധിച്ചുവരികയാണ്.അടുത്തിടെ ഡൽഹി മെട്രോ ശൃംഖല ഉൾപ്പെടെ ദേശീയ തലസ്ഥാനത്തെ 10-ൽ അധികം സ്ഥലങ്ങളിൽ പ്രകോപനപരമായ പോസ്റ്ററുകൾ പ്രത്യക്ഷപ്പെട്ടതിനെത്തുടർന്നാണ് ഈ സംഘം ശ്രദ്ധയിൽപ്പെട്ടത്. ഈ പോസ്റ്ററുകളിൽ കശ്മീരിനെക്കുറിച്ചുള്ള പ്രകോപനപരമായ ഉള്ളടക്കങ്ങളും 'ഫ്രീ കശ്മീർ' പോലുള്ള മുദ്രാവാക്യങ്ങളും ഉൾപ്പെട്ടിരുന്നു. പോസ്റ്ററുകളുടെ ഉത്ഭവം സംബന്ധിച്ച് സ്പെഷ്യൽ സെൽ നടത്തിയ വിശദമായ അന്വേഷണം, തമിഴ്നാട്ടിൽ നിന്ന് പ്രവർത്തിക്കുന്ന ഒരു ശൃംഖലയിലേക്ക് അന്വേഷണ ഉദ്യോഗസ്ഥരെ നയിക്കുകയും ഒടുവിൽ അറസ്റ്റിലേക്ക് എത്തുകയും ചെയ്തു.