പാകിസ്താനിൽ ഭീകരസംഘടനകളുടെ 'ആധുനിക ഭിക്ഷാടനം'; ഗാസയുടെ പേരിൽ പിരിക്കുന്നത് കോടികൾ.

 ഇസ്ലാമബാദ് : പാകിസ്താനിലെ നിലവിലെ ഭരണകൂടത്തിന് കീഴിൽ ഭീകരവാദ സംഘടനകൾ ഫണ്ട് ശേഖരണത്തിനായി പുതിയ മാർഗ്ഗങ്ങൾ അവലംബിക്കുന്നതായി ഞെട്ടിക്കുന്ന റിപ്പോർട്ട്.

രാജ്യാന്തര നിരീക്ഷണങ്ങളിൽ നിന്നും സാമ്പത്തിക ഉപരോധങ്ങളിൽ നിന്നും രക്ഷപ്പെടാൻ 'ആധുനിക ഭിക്ഷാടന' ശൈലിയാണ് ഈ സംഘടനകൾ പിന്തുടരുന്നതെന്ന് അമേരിക്കൻ മാധ്യമമായ 'പി.ജെ. മീഡിയ' റിപ്പോർട്ട് ചെയ്യുന്നു.

തുർക്കിഷ് പത്രപ്രവർത്തകനായ ഉസായ് ബുലൂട്ട് തയ്യാറാക്കിയ റിപ്പോർട്ടിൽ, പാകിസ്താൻ കേന്ദ്രീകരിച്ച് പ്രവർത്തിക്കുന്ന നിരോധിത സംഘടനകൾ ഗാസയിലെ ദുരിതാശ്വാസം, പള്ളികളുടെ നിർമ്മാണം തുടങ്ങിയ പേരുകളിലാണ് ആഗോളതലത്തിൽ പണം പിരിക്കുന്നതെന്ന് വ്യക്തമാക്കുന്നു.

'ആധുനിക ഭിക്ഷാടനവും' ഗാസയുടെ പേരും

നിരോധിത സംഘടനയായ ജെയ്‌ഷെ മുഹമ്മദ് ഗാസയിലെ മാനുഷിക സഹായത്തിനെന്ന പേരിൽ വൻതോതിൽ ഫണ്ട് ശേഖരിക്കുന്നുണ്ടെന്ന് റിപ്പോർട്ടിൽ പറയുന്നു. സംഘടനയുടെ തലവൻ മസൂദ് അസ്ഹർ തന്റെ മകൻ ഹമ്മദ് അസ്ഹറിനെ മുൻനിർത്തിയാണ് ഈ പ്രചാരണങ്ങൾ നടത്തുന്നത്. "ഖൈസർ അഹമ്മദ്" എന്ന പേരിൽ സോഷ്യൽ മീഡിയയിൽ സജീവമായ ഹമ്മദ്, ഗാസയിലെ സ്ത്രീകളുടെ വീഡിയോകൾ പ്രചരിപ്പിച്ചാണ് ആളുകളുടെ സഹതാപം പിടിച്ചുപറ്റുന്നത്. പാകിസ്താനിൽ നിന്നല്ലാതെ ഗൾഫ് രാജ്യങ്ങളിൽ നിന്നും അമേരിക്കയിൽ നിന്നും ഇത്തരത്തിൽ പണം ഒഴുകുന്നതായാണ് സൂചന. ബാങ്ക് അക്കൗണ്ടുകൾക്ക് പകരം 'Easypaisa' പോലുള്ള ഡിജിറ്റൽ വാലറ്റുകളാണ് പണം സ്വീകരിക്കാൻ പ്രധാനമായും ഉപയോഗിക്കുന്നത്.

പള്ളി നിർമ്മാണത്തിന്റെ പേരിൽ കോടികളുടെ പിരിവ്

മറ്റൊരു പ്രധാന തട്ടിപ്പ് നടക്കുന്നത് പള്ളി നിർമ്മാണത്തിന്റെ പേരിലാണെന്ന് റിപ്പോർട്ട് വെളിപ്പെടുത്തുന്നു. പാകിസ്താനിലുടനീളം 313 പുതിയ 'മർക്കസുകൾ' (കേന്ദ്രങ്ങൾ) നിർമ്മിക്കാൻ ലക്ഷ്യമിട്ട് ഏകദേശം 3.91 ബില്യൺ പാകിസ്താനി രൂപയാണ് ജെയ്‌ഷെ മുഹമ്മദ് പിരിച്ചെടുത്തത്. അന്താരാഷ്ട്ര ധനകാര്യ നിരീക്ഷണ ഏജൻസിയായ എഫ്.എ.ടി.എഫിന്റെ (FATF) കണ്ണുവെട്ടിക്കാനായി ലഷ്കർ-ഇ-തൊയ്ബ ഉൾപ്പെടെയുള്ള സംഘടനകൾ ഇപ്പോൾ പൂർണ്ണമായും ഡിജിറ്റൽ വാലറ്റുകളിലേക്ക് മാറിയിരിക്കുകയാണ്.

രാജ്യാന്തര സമൂഹത്തോടുള്ള വഞ്ചന

ഭീകരവാദത്തിനായുള്ള ധനസമാഹരണവും കള്ളപ്പണം വെളുപ്പിക്കലും തടയുന്നതിൽ പാകിസ്താൻ ഭരണകൂടം പരാജയപ്പെട്ടുവെന്ന് റിപ്പോർട്ട് കുറ്റപ്പെടുത്തുന്നു. പലപ്പോഴും അന്താരാഷ്ട്ര സമൂഹത്തെ തെറ്റിദ്ധരിപ്പിക്കുന്ന നടപടികളാണ് പാകിസ്താൻ സ്വീകരിക്കുന്നത്. ആഗോള ഇസ്ലാമിക ഖിലാഫത്ത് സ്ഥാപിക്കുക എന്ന ലക്ഷ്യത്തോടെയാണ് ഈ സംഘടനകൾ പ്രവർത്തിക്കുന്നതെന്നും, ലോകമെമ്പാടും ശരീഅത്ത് നിയമം നടപ്പിലാക്കാൻ ഇതര മതസ്ഥർക്ക് മേൽ ആധിപത്യം സ്ഥാപിക്കുകയാണ് ഇവരുടെ അന്തിമ ലക്ഷ്യമെന്നും റിപ്പോർട്ടിൽ ചൂണ്ടിക്കാട്ടുന്നു.