പുതുവത്സര ദിനത്തിൽ പ്രവാസികളിൽ വേദന നിറച്ച് ജർമനിയിൽ ഇന്ത്യൻ വിദ്യാർത്ഥിക്ക് ദാരുണാന്ത്യം

ബർലിൻ ;ഉന്നത പഠനത്തിനായി ജർമനിയിലേക്ക് പോയ ഇന്ത്യൻ വിദ്യാർഥിക്ക് പുതുവത്സര ദിനത്തിൽ ദാരുണാന്ത്യം.

തെലങ്കാനയിലെ ജങ്കാവ് ജില്ലയിലെ മൽകാപൂർ ഗ്രാമത്തിൽ നിന്നുള്ള ടോക്കല ഹൃത്വിക് റെഡ്ഡി (22) ആണ് മരിച്ചത്.യുവാവ് താമസിച്ചിരുന്ന കെട്ടിടത്തിൽ പെട്ടെന്ന് തീപിടിത്തം ഉണ്ടാവുകയായിരുന്നു.

അപ്പാർട്മെന്റിനുള്ളിൽ ആളിപ്പടർന്ന തീയിൽ നിന്ന് രക്ഷപ്പെടാനുള്ള തീവ്രശ്രമത്തിനിടെ ഹൃത്വിക് കെട്ടിടത്തിൽ നിന്ന് താഴേക്ക് ചാടി. വീഴ്ചയുടെ ആഘാതത്തിൽ തലയ്ക്ക് ഗുരുതരമായി പരുക്കേറ്റു. ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണം സംഭവിക്കുകയായിരുന്നു.

ഉപരിപഠനത്തിനായി വിദേശത്തേക്ക് പോയ യുവാവിന്റെ അപ്രതീക്ഷിത മരണം നാടിനെയും ബന്ധുക്കളെയും വലിയ ദുഃഖത്തിലാഴ്ത്തിയിരിക്കുകയാണ്. മൃതദേഹം നാട്ടിലെത്തിക്കുന്നതിനുള്ള നടപടികൾ പുരോഗമിക്കുകയാണ്. സംഭവത്തെക്കുറിച്ചുള്ള കൂടുതൽ വിവരങ്ങൾക്കായി അധികൃതർ അന്വേഷണം നടത്തിവരികയാണെന്ന് റിപ്പോർട്ട്.