മോഷണം പിടിക്കപ്പെടുമെന്നായപ്പോൾ തെളിവ് 'വിഴുങ്ങി'; മനില വിമാനത്താവളത്തിൽ സുരക്ഷാ ഉദ്യോഗസ്ഥയുടെ സാഹസം.

 മനില:ഫിലിപ്പീൻസിലെ മനില വിമാനത്താവളത്തിൽ യാത്രക്കാരന്റെ പണം മോഷ്ടിച്ച സുരക്ഷാ ഉദ്യോഗസ്ഥ തെളിവ് നശിപ്പിക്കാൻ നോട്ട് വിഴുങ്ങിയ സംഭവം രാജ്യാന്തര തലത്തിൽ ചർച്ചയാകുന്നു.

നിനോയ് അക്വിനോ അന്താരാഷ്ട്ര വിമാനത്താവളത്തിലെ ഒന്നാം ടെർമിനലിൽ സെപ്റ്റംബർ എട്ടിനാണ് നാടകീയമായ ഈ സംഭവം അരങ്ങേറിയത്. ചൈനീസ് യാത്രക്കാരന്റെ ബാഗിൽ നിന്ന് കവർന്ന 300 യുഎസ് ഡോളറാണ് സുരക്ഷാ ഉദ്യോഗസ്ഥ വിഴുങ്ങിയത്.

A security officer at a Philippine airport stole money from a passenger during a search. When the man reported the theft, she tried to swallow it to avoid detection. However, reviewing the camera footage revealed the shocking truth. pic.twitter.com/UtznKwCQ7W

— GPX (@GPX_Press) January 30, 2026

തെളിവ് നശിപ്പിക്കാൻ വിഫലശ്രമം

ബാഗേജ് പരിശോധനയ്ക്കിടെയാണ് ഉദ്യോഗസ്ഥ പണം കൈക്കലാക്കിയത്. തുടർന്ന് തന്റെ പക്കലുള്ള തുവാല കൊണ്ട് മറച്ചുപിടിച്ച് നോട്ടുകൾ വായിലേക്ക് തിരുകുന്നതും, വെള്ളം കുടിച്ച് അത് വിഴുങ്ങാൻ ശ്രമിക്കുന്നതുമായ ദൃശ്യങ്ങൾ വിമാനത്താവളത്തിലെ സിസിടിവി ക്യാമറകളിൽ വ്യക്തമായി പതിഞ്ഞിട്ടുണ്ട്. പണം പൂർണ്ണമായും വിഴുങ്ങാൻ ഇവർ വിരലുകൾ ഉപയോഗിച്ച് ശ്രമിക്കുന്നതും ദൃശ്യങ്ങളിൽ കാണാം. ഈ ദൃശ്യങ്ങൾ സോഷ്യൽ മീഡിയയിൽ വൈറലായതോടെയാണ് അധികൃതർ കർശന നടപടിയിലേക്ക് നീങ്ങിയത്.

നിയമനടപടികൾ ആരംഭിച്ചു

സംഭവം വിവാദമായതോടെ ഓഫീസ് ഫോർ ട്രാൻസ്പോർട്ടേഷൻ സെക്യൂരിറ്റി (OTS) അന്വേഷണത്തിന് ഉത്തരവിട്ടു. കുറ്റാരോപിതയായ ഉദ്യോഗസ്ഥയെയും കൂടെയുണ്ടായിരുന്ന മൂന്ന് പരിശോധനാ ഉദ്യോഗസ്ഥരെയും നിലവിൽ സസ്പെൻഡ് ചെയ്തിട്ടുണ്ട്. ഇവർക്കെതിരെ ഭരണപരമായ നടപടികൾക്ക് പുറമെ ക്രിമിനൽ കേസ് ഫയൽ ചെയ്യുന്നതിനെക്കുറിച്ചും ആലോചിക്കുന്നതായി ഒടിഎസ് അഡ്മിനിസ്ട്രേറ്റർ മാവോ അപ്ലാസ്ക വ്യക്തമാക്കി. വിമാനത്താവളത്തിലെ ഇത്തരം സംഭവങ്ങൾ സിവിൽ സർവീസിന്റെ മൂല്യങ്ങൾക്ക് വിരുദ്ധമാണെന്നും അദ്ദേഹം കൂട്ടിച്ചേർത്തു.

വിമാനത്താവളത്തിലെ തുടർക്കഥയാകുന്ന മോഷണങ്ങൾ

മനില വിമാനത്താവളത്തിൽ സുരക്ഷാ ഉദ്യോഗസ്ഥർ യാത്രക്കാരുടെ സാധനങ്ങൾ മോഷ്ടിക്കുന്നത് ഇതാദ്യമായല്ല. ഈ വർഷം ആദ്യം തായ്‌ലൻഡിൽ നിന്നുള്ള വിനോദസഞ്ചാരിയുടെ പണം മോഷ്ടിച്ചതിനും, ചൈനീസ് യാത്രക്കാരന്റെ വാച്ച് കവർന്നതിനും വിമാനത്താവളത്തിലെ ഉദ്യോഗസ്ഥർ പിടിയിലായിരുന്നു. തുടർച്ചയായുണ്ടാകുന്ന ഇത്തരം സംഭവങ്ങൾ രാജ്യത്തെ വിനോദസഞ്ചാര മേഖലയെയും സുരക്ഷാ സംവിധാനങ്ങളുടെ വിശ്വാസ്യതയെയും പ്രതികൂലമായി ബാധിക്കുമെന്ന ആശങ്കയും ഉയരുന്നുണ്ട്.