ബെംഗളൂരുവിൽ നാല് ലക്ഷം രൂപ കൈക്കൂലി വാങ്ങുന്നതിനിടെ പോലീസ് ഇൻസ്‌പെക്ടർ പിടിയിൽ; അറസ്റ്റ് രേഖപ്പെടുത്തിയപ്പോൾ പൊട്ടിക്കരഞ്ഞ് ഉദ്യോഗസ്ഥൻ

 ബെംഗളൂരു: വഞ്ചനാക്കേസിൽ നിന്നും ഒഴിവാക്കി നൽകാമെന്ന വാഗ്ദാനം നൽകി ബിൽഡറിൽ നിന്ന് കൈക്കൂലി വാങ്ങിയ പോലീസ് ഇൻസ്‌പെക്ടറെ ലോകായുക്ത പോലീസ് അറസ്റ്റ് ചെയ്തു.

കെ.പി. അഗ്രഹാര പോലീസ് സ്റ്റേഷൻ ഇൻസ്‌പെക്ടർ ഗോവിന്ദരാജുവിനെയാണ് കൈയ്യോടെ പിടികൂടിയത്. അറസ്റ്റ് നടപടികൾക്കിടെ ഇൻസ്‌പെക്ടർ പൊട്ടിക്കരയുന്നതിന്റെ ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്.

बेंगलुरु | कर्नाटक लोकायुक्त पुलिस ने इंस्पेक्टर गोविंद राजू को 4 लाख रुपए रिश्वत लेते रंगे हाथ पकड़ा। बिल्डर मोहम्मद अरकम ने चिट फंड फ्रॉड से जुड़ी शिकायत दर्ज कराई थी। अकरम की मदद करने के बदले इंस्पेक्टर ने ये घूस ली थी। pic.twitter.com/zQFdkCXPBf

— Sachin Gupta (@SachinGuptaUP) January 30, 2026

അഞ്ചു ലക്ഷം രൂപയുടെ ഇടപാട്

ബെംഗളൂരുവിലെ ബിൽഡറായ മുഹമ്മദ് അക്ബറിനെതിരെയുള്ള വഞ്ചനാക്കേസിൽ അനുകൂലമായ നടപടികൾ സ്വീകരിക്കാമെന്ന് ഉറപ്പുനൽകിയാണ് ഗോവിന്ദരാജു അഞ്ചു ലക്ഷം രൂപ കൈക്കൂലി ആവശ്യപ്പെട്ടത്. കേസിൽ അക്ബറിനെ കൂടാതെ മറ്റ് രണ്ട് പേർ കൂടി പ്രതികളായിരുന്നു. ഇതിൽ ആദ്യ ഗഡുവായി ജനുവരി 24-ന് ഒരു ലക്ഷം രൂപ ഇൻസ്‌പെക്ടർ കൈപ്പറ്റിയിരുന്നു.

ലോകായുക്തയുടെ തന്ത്രപരമായ നീക്കം

ബാക്കി തുക വ്യാഴാഴ്ച നൽകാമെന്ന് ഏറ്റ അക്ബർ, വിവരം ലോകായുക്ത പോലീസിനെ അറിയിക്കുകയായിരുന്നു. തുടർന്ന് ലോകായുക്ത ഉദ്യോഗസ്ഥരുടെ നിർദ്ദേശപ്രകാരം ചാമരാജ്‌പേട്ടിലെ സിറ്റി ആംഡ് റിസർവ് (CAR) ഗ്രൗണ്ടിലേക്ക് പണം വാങ്ങാൻ ഇൻസ്‌പെക്ടറെ വിളിച്ചുവരുത്തി. വൈകുന്നേരം 4:30-ഓടെ ഔദ്യോഗിക വാഹനത്തിൽ യൂണിഫോമിലെത്തിയ ഗോവിന്ദരാജു, ഫിനോൾഫ്തലിൻ പൗഡർ പുരട്ടിയ നോട്ടുകൾ വാങ്ങിയ ഉടൻ തന്നെ ഒളിച്ചിരുന്ന ലോകായുക്ത സംഘം ഇയാളെ വളയുകയായിരുന്നു.

തുടർനടപടികൾ

അഴിമതി നിരോധന നിയമപ്രകാരം അറസ്റ്റ് രേഖപ്പെടുത്തിയ ഇൻസ്‌പെക്ടറെ കോടതിയിൽ ഹാജരാക്കും. ഈ അഴിമതിയിൽ മറ്റ് ഉദ്യോഗസ്ഥർക്കോ സ്റ്റേഷനിലെ മറ്റ് അംഗങ്ങൾക്കോ പങ്കുണ്ടോ എന്നതിനെക്കുറിച്ച് ലോകായുക്ത പോലീസ് വിശദമായ അന്വേഷണം ആരംഭിച്ചിട്ടുണ്ട്.