മെക്സിക്കോ ഇറക്കുമതി തീരുവ 50% വരെ വർദ്ധിപ്പിച്ചു; ഇന്ത്യയുമായി FTA ചർച്ചകൾക്ക് കളമൊരുങ്ങുന്നു

 ന്യൂഡൽഹി: വ്യാപാര ഉടമ്പടികളില്ലാത്ത രാജ്യങ്ങളിൽ നിന്നുള്ള ഇറക്കുമതിക്ക് 50% വരെ അധിക തീരുവ ചുമത്താൻ മെക്സിക്കോ തീരുമാനിച്ചു. 2026 ജനുവരി 1 മുതൽ ഇത് പ്രാബല്യത്തിൽ വരും.

ഇന്ത്യ ഉൾപ്പെടെയുള്ള രാജ്യങ്ങളെ ഈ തീരുമാനം നേരിട്ട് ബാധിക്കും. ഈ സാഹചര്യത്തിൽ ഇരു രാജ്യങ്ങളും ഒരു സ്വതന്ത്ര വ്യാപാര കരാറിനായുള്ള (FTA) ചർച്ചകൾക്ക് തുടക്കം കുറിച്ചിട്ടുണ്ട്.മെക്സിക്കോയുടെ ഈ ഏകപക്ഷീയമായ തീരുവ വർദ്ധനവിന്റെ പ്രധാന ലക്ഷ്യങ്ങൾ ഓട്ടോമൊബൈൽസ്, വാഹന ഭാഗങ്ങൾ, തുണിത്തരങ്ങൾ, വസ്ത്രങ്ങൾ, പ്ലാസ്റ്റിക്, സ്റ്റീൽ, ലോഹങ്ങൾ, പാദരക്ഷകൾ തുടങ്ങിയ ഉൽപ്പന്നങ്ങളാണെന്ന് സാമ്പത്തിക വിദഗ്ധർ വിലയിരുത്തുന്നു.

വിശദാംശങ്ങൾ:

മെക്സിക്കോയുമായി സ്വതന്ത്ര വ്യാപാര കരാറുകളില്ലാത്ത രാജ്യങ്ങളായ ഇന്ത്യ, ചൈന, ദക്ഷിണ കൊറിയ, തായ്‌ലൻഡ്, ഇന്തോനേഷ്യ തുടങ്ങിയ രാജ്യങ്ങളിൽ നിന്നുള്ള 1,463 ഓളം ഇനം ഉൽപ്പന്നങ്ങൾക്ക് 5% മുതൽ 50% വരെ ഇറക്കുമതി തീരുവ ചുമത്തും. ഈ ഇനങ്ങളുടെ ഔദ്യോഗിക പട്ടിക ഇതുവരെ പ്രസിദ്ധീകരിച്ചിട്ടില്ല. വർധിപ്പിച്ച തീരുവ 2026 ജനുവരി 1 മുതൽ നിലവിൽ വരും.

പ്രധാന ലക്ഷ്യം ഓട്ടോമൊബൈൽ മേഖല:

"മെക്സിക്കോയുടെ സെനറ്റ് പാസാക്കിയ പുതിയ സംരക്ഷണ തീരുവ പാക്കേജ് അനുസരിച്ച്, FTA ഇല്ലാത്ത രാജ്യങ്ങളിൽ നിന്നുള്ള 1,400-ൽ അധികം ഉൽപ്പന്നങ്ങൾക്ക് 5% മുതൽ 50% വരെ തീരുവ ചുമത്തും. ഓട്ടോമൊബൈൽ, ഓട്ടോ ഭാഗങ്ങൾ, ടെക്സ്റ്റൈൽസ്, സ്റ്റീൽ തുടങ്ങിയവയാണ് പ്രധാന ലക്ഷ്യങ്ങൾ. മിക്ക ഉൽപ്പന്നങ്ങളുടെയും തീരുവ 35% പരിധിയിലായിരിക്കുമെങ്കിലും, പാസഞ്ചർ വാഹനങ്ങളുടെ തീരുവ 20% ൽ നിന്ന് 50% ആയി കുതിച്ചുയരും," സാംകോ സെക്യൂരിറ്റീസിലെ ഗവേഷണ വിശകലന വിദഗ്ദ്ധനായ ജാഹോൾ പ്രജാപതി പറഞ്ഞു.

2024-25 സാമ്പത്തിക വർഷത്തിൽ ഇന്ത്യ മെക്സിക്കോയിലേക്ക് ഏകദേശം 5.7 ബില്യൺ യുഎസ് ഡോളറിന്റെ സാധനങ്ങളാണ് കയറ്റുമതി ചെയ്തത്. ഇതിൽ ഏകദേശം മൂന്നിലൊന്ന് ഓട്ടോമൊബൈൽസ് മേഖലയിൽ നിന്നായിരുന്നു.

വോക്‌സ്‌വാഗൺ/സ്‌കോഡ, ഹ്യുണ്ടായ്, മാരുതി സുസുക്കി, നിസ്സാൻ തുടങ്ങിയ കമ്പനികളുടെ ഇന്ത്യൻ കാർ കയറ്റുമതിക്ക് ഈ തീരുമാനം നേരിട്ട് ഭീഷണിയാണ്. ഇന്ത്യയുടെ ആഗോള ഓട്ടോമൊബൈൽ കയറ്റുമതിയുടെ ഏകദേശം 9% വരുന്ന മെക്സിക്കൻ വിപണിയിലെ വിറ്റുവരവിനെയും ലാഭത്തെയും ഇത് ബാധിക്കും. ഓട്ടോമൊബൈൽസ് കൂടാതെ, എഞ്ചിനീയറിങ് സാധനങ്ങൾ, ഇലക്ട്രോണിക്സ്, ലോഹങ്ങൾ എന്നിവയുടെ ഉയർന്ന തീരുവ ഡിമാൻഡിനെ ബാധിക്കാൻ സാധ്യതയുണ്ട്.

FTA ചർച്ചകളിലേക്ക്:

ആഭ്യന്തര ഉൽപ്പാദനം വർദ്ധിപ്പിക്കാനും വ്യാപാരത്തിലെ അസന്തുലിതാവസ്ഥ കുറയ്ക്കാനും ലക്ഷ്യമിട്ടാണ് മെക്സിക്കൻ കോൺഗ്രസിന്റെ ഇരുസഭകളും ഈ പുതിയ തീരുവ നിയമം ഡിസംബർ 11, 2025-ന് അംഗീകരിച്ചത്.

ഇതുമായി ബന്ധപ്പെട്ട ബിൽ ആദ്യം അവതരിപ്പിച്ച ഘട്ടത്തിൽ തന്നെ ഇന്ത്യ മെക്സിക്കോയുമായി ചർച്ചകളിൽ ഏർപ്പെട്ടിരുന്നു. 2025 സെപ്റ്റംബർ 30-ന് തന്നെ മെക്സിക്കോയിലെ ഇന്ത്യൻ എംബസി ഈ വിഷയം അവിടുത്തെ സാമ്പത്തിക മന്ത്രാലയവുമായി ചർച്ച ചെയ്യുകയും ഇന്ത്യൻ ഉൽപ്പന്നങ്ങൾക്ക് പ്രത്യേക ഇളവുകൾ തേടുകയും ചെയ്തിരുന്നു.

പുതിയ സാഹചര്യത്തിൽ, ഇരു രാജ്യങ്ങളും സ്വതന്ത്ര വ്യാപാര കരാറിനായുള്ള ചർച്ചകൾക്ക് തുടക്കമിടാൻ ഒരുങ്ങുകയാണ്. ചർച്ചകൾ ഔപചാരികമായി ആരംഭിക്കുന്നതിനുള്ള ടേംസ് ഓഫ് റഫറൻസ് (ToR) ഉടൻ അന്തിമമാക്കുമെന്നാണ് പ്രതീക്ഷ.