ലക്ഷപ്രഭുക്കളായി മലയാളി; വീടുകളിലെ സ്വർണശേഖരം 25 ലക്ഷം കോടി കടന്നു

കൊച്ചി: സ്വർണവില പവന് ഒരു ലക്ഷം രൂപ എന്ന മാന്ത്രിക സംഖ്യ തൊട്ടതോടെ കേരളത്തിലെ സാധാരണ കുടുംബങ്ങൾ പോലും വൻ ആസ്തിയുടെ ഉടമകളായി മാറുന്നു.

100 പവൻ കൈവശമുള്ള ഒരു കുടുംബത്തിന്റെ സ്വർണ്ണ ആസ്തി ഇതോടെ ഒരു കോടി രൂപയായി ഉയർന്നു. ഇന്ത്യയിലെ തന്നെ ഏറ്റവും വലിയ സ്വർണ്ണ വിപണികളിലൊന്നായ കേരളത്തിലെ വീടുകളിൽ മാത്രം ഏകദേശം 2,000 ടൺ സ്വർണമുണ്ടെന്നാണ് അനൗദ്യോഗിക കണക്കുകൾ സൂചിപ്പിക്കുന്നത്.

മലയാളിയുടെ ആസ്തി: ഒരു ലഘുചിത്രം

കേരളത്തിലെ വീടുകളിലായുള്ള 25 കോടി പവൻ സ്വർണത്തിന്റെ ആകെ മൂല്യം നിലവിലെ വിപണി വിലയനുസരിച്ച് ഏകദേശം 25.40 ലക്ഷം കോടി രൂപ വരും. റിസർവ് ബാങ്കിന്റെ പക്കലുള്ള ഇന്ത്യയുടെ ആകെ സ്വർണ്ണശേഖരം 880 ടൺ മാത്രമാണെന്നിരിക്കെ, അതിന്റെ ഇരട്ടിയിലേറെയാണ് മലയാളിയുടെ പക്കലുള്ളത് എന്നത് ശ്രദ്ധേയമാണ്. ഇതിൽ വലിയൊരു ഭാഗം ബാങ്ക് ലോക്കറുകളിലും, സ്വർണ്ണപ്പണയമായും, ചിട്ടി ഈടുകളായും വിപണിയിൽ ചംക്രമണം ചെയ്യപ്പെടുന്നുണ്ട്.

18 കാരറ്റിലേക്കും 9 കാരറ്റിലേക്കും ചുവടുമാറ്റം

വില കുതിച്ചുയർന്നതോടെ ആഭരണ വിപണിയിൽ ഉപഭോക്താക്കളുടെ മുൻഗണനകളിൽ കാര്യമായ മാറ്റം ദൃശ്യമാണ്. 22 കാരറ്റിന് പകരം വില കുറഞ്ഞ 18, 14, 9 കാരറ്റുകളിലുള്ള ആഭരണങ്ങളിലേക്ക് പലരും ചുവടുമാറുന്നു. എന്നാൽ 22 കാരറ്റിന്റെ വർദ്ധനവിന് ആനുപാതികമായി ഇവയുടെ വിലയും ഉയരുകയാണ്.

വിപണിയിലെ നിലവിലെ നിരക്കുകൾ:

കാരറ്റ്	ഗ്രാമിന് (രൂപ)	പവന് (രൂപ)
18 കാരറ്റ്	10,440	83,520
14 കാരറ്റ്	8,130	65,040
9 കാരറ്റ്	5,245	41,960

വരും വർഷങ്ങളിലും കുതിപ്പ് തുടരും

സുരക്ഷിത നിക്ഷേപം എന്ന നിലയിൽ ആഗോളതലത്തിൽ സ്വർണത്തിന് ലഭിക്കുന്ന സ്വീകാര്യത വില ഇനിയും വർദ്ധിക്കാൻ കാരണമാകുമെന്ന് വിദഗ്ധർ വിലയിരുത്തുന്നു. ഒരു വർഷത്തിനിടെ രാജ്യാന്തര വിപണിയിൽ 2,000 ഡോളറിന്റെ വർദ്ധനവാണ് രേഖപ്പെടുത്തിയത്.

"സ്വർണം വെറുമൊരു ലോഹം എന്ന നിലയിൽ നിന്ന് ഒരു 'ആഗോള കറൻസി' എന്ന പദവിയിലേക്ക് മാറിക്കൊണ്ടിരിക്കുകയാണ്. വരും വർഷങ്ങളിൽ രാജ്യാന്തര വില 6,000 മുതൽ 8,000 ഡോളർ വരെ ഉയർന്നേക്കാം. അടിസ്ഥാന ഘടനയിലുണ്ടാകുന്ന ഈ മാറ്റം സ്വർണത്തെ കൂടുതൽ കരുത്തുറ്റതാക്കും."

— അഡ്വ. എസ്. അബ്ദുൽ നാസർ, സംസ്ഥാന ജനറൽ സെക്രട്ടറി, ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ.