തിരുവനന്തപുരം നഗരസഭയിൽ ഭരണമാറ്റം, മുൻ ഭരണസമിതിയിലെ അഴിമതികാൾ പൊടിതട്ടി എടുക്കാൻ ബി ജെ പി

 തിരുവനന്തപുരം: നാൽപ്പത് വർഷത്തെ എൽഡിഎഫ് ഭരണത്തിന് അന്ത്യം കുറിച്ച് ബിജെപി നഗരസഭയുടെ അമരത്തെത്തുമ്പോൾ, പഴയകാല അഴിമതി ആരോപണങ്ങൾ ഇടതുമുന്നണിക്ക് കടുത്ത തലവേദനയാകുന്നു.

തിരഞ്ഞെടുപ്പ് പരാജയത്തിന് പിന്നാലെ സിപിഎം ആഭ്യന്തര യോഗങ്ങളിൽ തന്നെ മുൻ ഭരണസമിതിക്കെതിരെ വിമർശനം ഉയർന്ന സാഹചര്യത്തിൽ, അഴിമതിക്കേസുകൾ ശക്തമായി പൊടിതട്ടിയെടുക്കാനാണ് ബിജെപി നീക്കം.

അന്വേഷണമുനയിൽ പ്രധാന കേസുകൾ

കഴിഞ്ഞ ഭരണകാലത്ത് വിവാദമായ പല കേസുകളും സംസ്ഥാന ഭരണത്തിന്റെ സ്വാധീനത്താൽ അട്ടിമറിക്കപ്പെട്ടുവെന്നാണ് ബിജെപിയുടെ ആക്ഷേപം. പുതിയ ഭരണസമിതി അധികാരമേൽക്കുന്നതോടെ താഴെ പറയുന്ന വിഷയങ്ങളിൽ നിർണ്ണായകമായ പുനരന്വേഷണത്തിന് സാധ്യതയുണ്ട്:

കത്ത് വിവാദം: നഗരസഭയിലെ ആരോഗ്യവിഭാഗം നിയമനത്തിനായി സിപിഎം ജില്ലാ സെക്രട്ടറിക്ക് മുൻ മേയർ ഔദ്യോഗിക ലെറ്റർ പാഡിൽ കത്ത് നൽകിയ സംഭവം ക്രൈംബ്രാഞ്ച് അന്വേഷിച്ചെങ്കിലും തെളിവില്ലെന്നു കണ്ട് അവസാനിപ്പിച്ചിരുന്നു. ഈ ഫയലുകൾ വീണ്ടും പരിശോധിക്കപ്പെട്ടേക്കാം.

ഫണ്ട് തട്ടിപ്പുകൾ: പട്ടികജാതി വികസന ഫണ്ട് തട്ടിപ്പ്, സ്വയംതൊഴിൽ വായ്പാ സബ്‌സിഡി തട്ടിപ്പ് എന്നിവയിൽ ഉന്നത രാഷ്ട്രീയ ബന്ധമുള്ളവർ പ്രതിക്കൂട്ടിലായിരുന്നു. വ്യാജ ജാതി സർട്ടിഫിക്കറ്റുകൾ ഉപയോഗിച്ച് നടന്ന തട്ടിപ്പുകളിൽ ഡിജിറ്റൽ തെളിവുകൾ ശേഖരിക്കാനാണ് ബിജെപിയുടെ നീക്കം.

വ്യാജ പെർമിറ്റുകൾ: ഉദ്യോഗസ്ഥരുടെ ലോഗിൻ ഐഡികൾ ദുരുപയോഗം ചെയ്ത് കെട്ടിട നിർമ്മാണ പെർമിറ്റുകൾ നൽകിയ സംഭവത്തിൽ താൽക്കാലിക ജീവനക്കാരുടെ പങ്കും അന്വേഷണ പരിധിയിൽ വരും.

മറ്റ് അഴിമതികൾ: കിച്ചൺ ബിൻ വിതരണം, സ്വകാര്യ കമ്പനിക്ക് പോസ്റ്റുകൾ സ്ഥാപിക്കാൻ നൽകിയ അനുമതി തുടങ്ങിയവയിൽ സാമ്പത്തിക ക്രമക്കേട് നടന്നതായി തിരഞ്ഞെടുപ്പ് പ്രചാരണ വേളയിൽ തന്നെ ബിജെപി ആരോപിച്ചിരുന്നു.

താൽക്കാലിക നിയമനങ്ങളിൽ അനിശ്ചിതത്വം

നഗരസഭയിലെ ജീവനക്കാരിൽ ബഹുഭൂരിപക്ഷവും താൽക്കാലികക്കാരാണ് എന്നത് പുതിയ ഭരണസമിതിക്ക് മുന്നിലുള്ള വലിയ വെല്ലുവിളിയാണ്.

ആകെ 3,000 ജീവനക്കാരിൽ വെറും 850 പേർ മാത്രമാണ് പിഎസ്‌സി വഴി നിയമിതരായവർ.ശുചീകരണ തൊഴിലാളികളുൾപ്പെടെ ഏകദേശം 1,200 ഓളം പേർ താൽക്കാലിക/കരാർ അടിസ്ഥാനത്തിൽ ജോലി ചെയ്യുന്നു. 'ഡേറ്റ എൻട്രി' എന്ന പേരിൽ വർഷങ്ങളായി കരാർ പുതുക്കി നൽകുന്ന രാഷ്ട്രീയ നിയമനങ്ങൾ അവസാനിപ്പിക്കാനാണ് ബിജെപി നേതൃത്വത്തിന്റെ തീരുമാനം. സാധാരണക്കാരായ തൊഴിലാളികളെയും രാഷ്ട്രീയ ചായവില്ലാത്തവരെയും സംരക്ഷിക്കുമെങ്കിലും, വഴിവിട്ട രീതിയിൽ നിയമിതരായ രാഷ്ട്രീയ ബന്ധുക്കളുടെ കരാർ പുതുക്കേണ്ടതില്ലെന്നാണ് ബിജെപിയുടെ പ്രാഥമിക ധാരണ.

ഡിജിറ്റൽ തെളിവുകളിലേക്ക്

ഭരണമാറ്റത്തിന് പിന്നാലെ ഫയലുകൾ നശിപ്പിക്കാൻ നീക്കം നടക്കുന്നതായി ആരോപണമുയർന്നിരുന്നു. എന്നാൽ ഫയലുകളേക്കാൾ ഉപരിയായി ബാങ്ക് സ്റ്റേറ്റ്‌മെന്റുകൾ, ഓൺലൈൻ പണമിടപാടുകൾ തുടങ്ങിയ ഡിജിറ്റൽ തെളിവുകൾ വഴി അഴിമതി പുറത്തുകൊണ്ടുവരാനാകും പുതിയ ഭരണസമിതി ശ്രമിക്കുക.