കണ്ണൂർ സെൻട്രൽ ജയിലിൽ റിമാൻഡിലിരുന്ന പ്രതി ആത്മഹത്യ ചെയ്തു:ഞെട്ടലോടെ സഹതടവുകാർ

 കണ്ണൂർ: ഭാര്യയെ കൊലപ്പെടുത്തിയ കേസിൽ കണ്ണൂർ സെൻട്രൽ ജയിലിൽ റിമാൻഡിൽ കഴിഞ്ഞിരുന്ന വയനാട് സ്വദേശിയായ ജിൽസൺ ആത്മഹത്യ ചെയ്ത സംഭവം ജയിൽ ജീവനക്കാർക്കിടയിൽ ഞെട്ടലുണ്ടാക്കി. ഭാര്യയെ കൊലപ്പെടുത്തിയതിൽ കുറ്റബോധവും പശ്ചാത്താപവും ജിൽസനെ നിരന്തരം വേട്ടയാടിയിരുന്നെന്ന് ജീവനക്കാർ വെളിപ്പെടുത്തുന്നു.

ജയിൽ ബ്ലോക്കിനുള്ളിൽ നടത്തിയ വെളിപ്പെടുത്തലുകളെല്ലാം കടുത്ത മാനസിക സംഘർഷത്തിലായിരുന്ന ഒരാളുടേതായിരുന്നു. നിരന്തരമായ കൗൺസലിങ് നൽകിയിരുന്നെങ്കിലും രാത്രികാലങ്ങളിൽ പലപ്പോഴും അദ്ദേഹം ഉറങ്ങിയില്ല. ഭാര്യയെ കൊലപ്പെടുത്താനുള്ള കാരണം പറഞ്ഞ് പലപ്പോഴും വിതുമ്പിയിരുന്നു. മക്കളെ ഓർത്തുള്ള ദുഃഖം കാരണം നിരവധി രാത്രികൾ ഉറക്കമില്ലാതെ കഴിച്ചുകൂട്ടിയിരുന്നതായി സഹതടവുകാർ പറയുന്നു.

ന്യൂ ബ്ലോക്കിൽ നടന്നത്: ഒരു ഞരക്കം പോലും കേട്ടില്ല

ജയിലിലെ ന്യൂ ബ്ലോക്കിലെ തടവുകാരനായിരുന്നു ജിൽസൺ. 150-ഓളം തടവുകാരുള്ള ബ്ലോക്കിൽ, ജിൽസൺ ആത്മഹത്യക്ക് ശ്രമിക്കുമ്പോൾ ഒരു ഞരക്കം പോലും കേട്ടില്ലെന്ന് സഹതടവുകാർ പറയുന്നു.

രാവിലെ തറയിൽ രക്തം തളംകെട്ടി കിടക്കുന്നത് കണ്ടപ്പോഴാണ് ജയിൽ അധികൃതരെ വിവരമറിയിച്ചത്. മറ്റുള്ളവർ കാണാതിരിക്കാനായി പുതപ്പ് തലവഴി മൂടിപ്പുതച്ച് ചെരിഞ്ഞു കിടന്ന നിലയിലായിരുന്നു ജിൽസൺ. കഴുത്ത് മുറിച്ചാണ് ഇയാൾ ജീവനൊടുക്കാൻ ശ്രമിച്ചത്. ആത്മഹത്യാപ്രവണത പ്രകടിപ്പിച്ചിരുന്ന ഇദ്ദേഹത്തിന് പ്രത്യേക കൗൺസലിങ് നൽകിയിരുന്നുവെങ്കിലും ആത്മഹത്യ തടയാനായില്ല.

കൊലപാതകത്തിന്റെ കാരണം: കടബാധ്യതയും ഭാര്യയുടെ രോഗവും

വിഷുപ്പുലരിയിൽ നാടിനെ ഞെട്ടിച്ച കൊലപാതകമായിരുന്നു വയനാട് കേണിച്ചിറയിൽ നടന്നത്. കടബാധ്യതയും ഭാര്യ ലിഷയുടെ അസുഖവുമാണ് കൊലപാതകത്തിലേക്ക് നയിച്ചതെന്നാണ് കണ്ടെത്തൽ.

കൊലപാതകം നടന്ന ദിവസം അർധരാത്രിയിൽ, ഭാര്യയെ കൊലപ്പെടുത്തിയ ശേഷം സ്വയം ജീവനൊടുക്കാൻ തീരുമാനിച്ചതായി ജിൽസൺ സുഹൃത്തുക്കൾക്ക് ശബ്ദസന്ദേശം അയച്ചിരുന്നു. സന്ദേശം കണ്ട സുഹൃത്ത് അയൽവാസികളെ വിവരമറിയിച്ചതിനെ തുടർന്നാണ് ഞെട്ടിക്കുന്ന സംഭവം പുറത്തറിയുന്നത്. ഭാര്യയെ കൊലപ്പെടുത്തിയ ശേഷം ജിൽസണും ആത്മഹത്യക്ക് ശ്രമിച്ചിരുന്നു. മുറിയിൽനിന്ന് ആത്മഹത്യാക്കുറിപ്പും കണ്ടെടുത്തിരുന്നു.

ഫോണിന്റെ ചാർജിങ് കേബിൾ കഴുത്തിൽ മുറുക്കിയാണ് ജിൽസൺ ഭാര്യ ലിഷയെ കൊലപ്പെടുത്തിയത്. ഈ സമയം ഇവരുടെ രണ്ട് മക്കൾ വീട്ടിലുണ്ടായിരുന്നു. മക്കളെ മറ്റൊരു മുറിയിലാക്കി പുറത്തുനിന്ന് പൂട്ടിയിട്ട ശേഷമായിരുന്നു ക്രൂരകൃത്യം.

ഭാര്യയെ കൊലപ്പെടുത്തിയ ശേഷം തൂങ്ങിമരിക്കാനായി മരത്തിൽ കയറിയെങ്കിലും താഴെ വീണു. തുടർന്ന് വിഷം കുടിച്ച ശേഷം ബ്ലേഡ് ഉപയോഗിച്ച് കൈഞരമ്പ് മുറിച്ചു. അതിനുശേഷം മരം മുറിക്കുന്ന യന്ത്രമുപയോഗിച്ചും കൈക്ക് പരിക്കേൽപ്പിച്ചു. ലിഷയ്ക്ക് അർബുദമാണെന്ന് അറിഞ്ഞതോടെ ചികിത്സാ ചിലവിനായി ഭീമമായ തുക വായ്പയെടുത്തതോടെയാണ് ജിൽസൺ മാനസികമായി തകർന്നതെന്ന് സുഹൃത്തുക്കൾ വെളിപ്പെടുത്തിയിരുന്നു.

കൊലപാതകശ്രമത്തിന് ശേഷം ആശുപത്രിയിൽ പ്രവേശിപ്പിച്ച ജിൽസന് ആദ്യ ഘട്ടത്തിൽ കഴിഞ്ഞ സംഭവങ്ങളൊന്നും ഓർമ്മയുണ്ടായിരുന്നില്ല, ആരെയും തിരിച്ചറിയാനും കഴിഞ്ഞിരുന്നില്ല. പിന്നീട് കൗൺസലിങ്ങിലൂടെയാണ് ഇദ്ദേഹം സാധാരണ ജീവിതത്തിലേക്ക് തിരികെയെത്തിയത്.

ബ്ലേഡ് എവിടെനിന്ന് ലഭിച്ചു? അന്വേഷണം ആരംഭിച്ചു

സെൻട്രൽ ജയിലിലെ പുതിയ ബ്ലോക്കിൽ അതീവ സുരക്ഷയിലായിരുന്ന ജിൽസണ് ബ്ലേഡ് പോലുള്ള ചെറിയ ആയുധം എവിടെനിന്ന് ലഭിച്ചെന്ന കാര്യത്തിൽ പോലീസ് അന്വേഷണം ആരംഭിച്ചു. സെല്ലിനുള്ളിൽ ഇത്തരത്തിലുള്ള ആയുധങ്ങൾ എങ്ങനെ എത്തി എന്നത് സംബന്ധിച്ച് ജയിൽ അധികൃതർ വിശദീകരണം നൽകേണ്ടതുണ്ട്. മാസങ്ങൾക്കുമുമ്പ് കൊടും കുറ്റവാളിയായ ഗോവിന്ദച്ചാമി ചെറിയ ആയുധം ഉപയോഗിച്ച് സെല്ലിന്റെ അഴി മുറിച്ച് രക്ഷപ്പെട്ട സംഭവം ഉണ്ടായിട്ടുണ്ട്.

ജിൽസൺ ആത്മഹത്യക്ക് ഉപയോഗിച്ച ആയുധം ഇതുവരെ കണ്ടെത്താനായിട്ടില്ലെന്നാണ് പോലീസ് നൽകുന്ന വിവരം.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ദ്ധരുടെ സഹായം തേടുക, അതിജീവിക്കാൻ ശ്രമിക്കുക. അത്തരം ചിന്തകളുളളപ്പോൾ 'ദിശ' ഹെൽപ് ലൈനിൽ വിളിക്കുക. Toll free helpline number: 1056, 0471-2552056.)