ചൈനീസ് ഇടപെടലുകൾ നാവികസേനയുടെ നിരീക്ഷണത്തിൽ: വൈസ് അഡ്മിറൽ സമീർ സക്സേന

 തിരുവനന്തപുരം: ഇന്ത്യൻ തീരങ്ങളിലെ ചൈനീസ് ഇടപെടലുകൾ നാവികസേനയുടെ കർശന നിരീക്ഷണത്തിലാണെന്ന് വൈസ് അഡ്മിറൽ സമീർ സക്സേന വ്യക്തമാക്കി. ശ്രീലങ്കൻ തീരമുൾപ്പെടെയുള്ള പ്രദേശങ്ങളിൽ ചൈന അവരുടെ സാന്നിധ്യം വർദ്ധിപ്പിക്കുന്നുണ്ട്. മാറിയ ലോക സാഹചര്യത്തിൽ, എല്ലാവിധ വെല്ലുവിളികളെയും നേരിടാൻ ഇന്ത്യൻ നാവികസേന സജ്ജമാണെന്നും അദ്ദേഹം കൂട്ടിച്ചേർത്തു.

'ആത്മനിർഭർ ഭാരത്' പദ്ധതിയുടെ ഭാഗമായി യുദ്ധക്കപ്പലുകളുടെ നിർമ്മാണം ഉൾപ്പെടെയുള്ള കാര്യങ്ങളിൽ സ്വയംപര്യാപ്തത കൈവരിക്കാനുള്ള തീവ്രശ്രമത്തിലാണ് നാവികസേന.

തീരദേശ സുരക്ഷ ഉറപ്പാക്കുന്നതിനായി സംസ്ഥാന സർക്കാരുകളുമായും മറ്റ് സൈനിക വിഭാഗങ്ങളുമായും ചേർന്നുള്ള സുരക്ഷാ സംവിധാനങ്ങൾ നാവികസേന ഒരുക്കും. അടുത്തിടെ 'എൽസാ-3' ചരക്കുകപ്പൽ മുങ്ങിയ സംഭവത്തിൽ നാവികസേന കൃത്യമായ രക്ഷാപ്രവർത്തനത്തിൽ പങ്കാളികളായി എന്നും അദ്ദേഹം അറിയിച്ചു.

തിരുവനന്തപുരത്ത് തിയേറ്റർ കമാൻഡ് പരിഗണനയിൽ

തിരുവനന്തപുരത്ത് തിയേറ്റർ കമാൻഡ് സ്ഥാപിക്കുന്നത് കേന്ദ്രസർക്കാരിന്റെ പരിഗണനയിലുള്ള വിഷയമാണ്. ഇക്കാര്യത്തിൽ പ്രതിരോധ മന്ത്രാലയമാണ് അന്തിമ തീരുമാനമെടുക്കേണ്ടതെന്നും വൈസ് അഡ്മിറൽ സമീർ സക്സേന വ്യക്തമാക്കി.

നാവികസേനാ ദിനാഘോഷത്തിന് ഇന്ന് തുടക്കം: രാഷ്ട്രപതി ഉദ്ഘാടനം ചെയ്യും

നാവികസേനാ ദിനാഘോഷങ്ങളുടെ ഭാഗമായി തിരുവനന്തപുരം ശംഖുമുഖം തീരം ഇന്ന് സൈനിക ശക്തിപ്രകടനത്തിന് വേദിയാകും. ബുധനാഴ്ച വൈകീട്ട് 4.30-ന് നടക്കുന്ന ദിനാഘോഷം രാഷ്ട്രപതി ദ്രൗപദി മുർമു ഉദ്ഘാടനം ചെയ്യും.

ഗവർണർ ആരിഫ് മുഹമ്മദ് ഖാൻ, മുഖ്യമന്ത്രി പിണറായി വിജയൻ, നാവികസേനാ മേധാവി അഡ്മിറൽ ദിനേശ് കെ. ത്രിപാഠി, വൈസ് അഡ്മിറൽ സമീർ സക്സേന തുടങ്ങിയവർ ചടങ്ങിൽ പങ്കെടുക്കും.

പ്രധാന ആകർഷണങ്ങൾ:

• ഇന്ത്യ തദ്ദേശീയമായി നിർമ്മിച്ച വിമാനവാഹിനിക്കപ്പലായ ഐ.എൻ.എസ്. വിക്രാന്ത് ഉൾപ്പെടെയുള്ളവ പങ്കെടുക്കുന്ന സൈനികാഭ്യാസ പ്രകടനമുണ്ടാകും.
  
  
• നാവിക ദിനാഘോഷത്തിന് ആദ്യമായാണ് തിരുവനന്തപുരം ആതിഥേയത്വം വഹിക്കുന്നത്.
• 
  
• സൈനികാഭ്യാസ പ്രകടനം പൊതുജനങ്ങൾക്ക് വീക്ഷിക്കുന്നതിനായി വെട്ടുകാട് തീരത്ത് പ്രത്യേക സൗകര്യങ്ങൾ ഒരുക്കിയിട്ടുണ്ട്. സാംസ്കാരിക പരിപാടികളും ഇതിന്റെ ഭാഗമായി നടക്കും.

നാവികസേനാ ദിനമായ ഡിസംബർ നാലിനായിരുന്നു ശക്തിപ്രകടനം നിശ്ചയിച്ചിരുന്നത്. എന്നാൽ, രാഷ്ട്രപതിക്ക് അന്നേ ദിവസം തിരുവനന്തപുരത്ത് എത്താൻ കഴിയാത്തതിനാലാണ് ആഘോഷങ്ങൾ ഇന്ന് നടത്തുന്നത്.

സൈനിക പ്രകടനത്തിൽ അണിചേരുന്നത്

19 കപ്പലുകളും ഒരു അന്തർവാഹിനിയും 32 യുദ്ധവിമാനങ്ങളും സൈനിക ശക്തിപ്രകടനത്തിൽ അണിചേരുമെന്ന് ദക്ഷിണ നാവികസേനാ മേധാവി കൂടിയായ വൈസ് അഡ്മിറൽ സമീർ സക്സേന പത്രസമ്മേളനത്തിൽ അറിയിച്ചു.

പ്രധാനമായും, മിഗ് 29, ഐ.എൻ.എസ്. ഇംഫാൽ, ഐ.എൻ.എസ്. കൊൽക്കത്ത, ഐ.എൻ.എസ്. ത്രിശൂൽ, ഐ.എൻ.എസ്. തൽവാർ എന്നിവയുൾപ്പെട്ട പടക്കപ്പലുകൾ തിരുവനന്തപുരം തീരത്ത് എത്തിച്ചേർന്നിട്ടുണ്ട്. പായ്ക്കപ്പലുകളായ ഐ.എൻ.എസ്. തരംഗിണി, ഐ.എൻ.എസ്. സുദർശിനി എന്നിവയും പ്രകടനത്തിന്റെ ഭാഗമാകും. ചേതക് ഹെലികോപ്റ്ററുകളും ഹോക്‌സ് ഫൈറ്റർ ജെറ്റ് വിമാനങ്ങളും ശക്തിപ്രകടനത്തിന് മാറ്റ് കൂട്ടും