മുൻ ജി.എ.എ. റഫറിക്ക് മരുമകളെ ലൈംഗികമായി പീഡിപ്പിച്ച കേസിൽ ആറ് വർഷത്തിലധികം തടവ്

 പോർട്ട്‌ലീഷ് (അയർലൻഡ്): ജി.എ.എ. (ഗാലിക് അത്‌ലറ്റിക് അസോസിയേഷൻ) മുൻ റഫറിക്ക് മരുമകളെ ലൈംഗികമായി പീഡിപ്പിച്ച കേസിൽ ആറു വർഷത്തിലധികം തടവ് ശിക്ഷ വിധിച്ച് കോടതി. മൂന്നോ നാലോ വയസ്സുള്ളപ്പോൾ മുതൽ പ്രായപൂർത്തിയാകുന്നതുവരെയാണ് പ്രതി മരുമകളെ ലൈംഗികമായി പീഡിപ്പിച്ചത്.

മേവ് ലീഹി

ധൈര്യശാലിയായ മേവ് ലീഹി തൻ്റെ അമ്മാവനായ തോമസ് ഹോവാർഡിന്റെ പേര് പുറത്തുപറയുന്നതിന് വേണ്ടി അജ്ഞാതത്വം വെടിയാൻ (anonymity) തയ്യാറായെന്ന് ആർ.ടി.ഇ. റിപ്പോർട്ട് ചെയ്യുന്നു. ശിക്ഷാവിധിക്ക് ശേഷം പോർട്ട്‌ലീഷ് സർക്യൂട്ട് കോടതിക്ക് പുറത്ത് മാധ്യമങ്ങളോട് സംസാരിച്ച മേവ്, തനിക്ക് നീതി ലഭിച്ചതായി അറിയിക്കുകയും, താൻ മുന്നോട്ട് വന്നത് സമാനമായ അതിക്രമങ്ങൾക്ക് ഇരയായ മറ്റുള്ളവർക്ക് സംസാരിക്കാൻ പ്രചോദനമാകുമെന്ന് പ്രതീക്ഷ പ്രകടിപ്പിക്കുകയും ചെയ്തു.

“എനിക്ക് സന്തോഷമുണ്ട്,” ശിക്ഷാവിധിക്ക് ശേഷം മേവ് ആർ.ടി.ഇ.യോട് പറഞ്ഞു. “എന്താണ് പ്രതീക്ഷിക്കേണ്ടതെന്ന് എനിക്കറിയില്ലായിരുന്നു, പക്ഷേ ഈ വിധിയിൽ ഞാൻ തീർച്ചയായും സന്തുഷ്ടയാണ്.” “ഇന്ന് എനിക്ക് നീതി ലഭിച്ചതായി തോന്നുന്നു,” അവർ കൂട്ടിച്ചേർത്തു. “നീതി ലഭിച്ച ഈ അനുഭവം എൻ്റെ ജീവിതം മെച്ചപ്പെടുത്താൻ സഹായിക്കുമെന്ന് ഞാൻ വിശ്വസിക്കുന്നു. സമാനമായ അതിക്രമങ്ങളിലൂടെ കടന്നുപോകുന്ന ഒരാൾക്കെങ്കിലും മുന്നോട്ട് വരാൻ എൻ്റെ ഈ വെളിപ്പെടുത്തൽ സഹായകമാകുമെങ്കിൽ അത് മഹത്തായ കാര്യമായിരിക്കും.”

79-കാരനായ പ്രതി കുറ്റം സമ്മതിച്ചു

79 വയസ്സുള്ള മുൻ ജി.എ.എ. റഫറിയാണ് തോമസ് ഹോവാർഡ്. 80-കളുടെ മധ്യത്തിൽ നടന്ന അതിക്രമങ്ങളുമായി ബന്ധപ്പെട്ട നിരവധി കുറ്റങ്ങൾ ഇയാൾ സമ്മതിച്ചതിനെ തുടർന്നാണ് ആറു വർഷവും ഒൻപത് മാസവും തടവിന് ശിക്ഷിച്ചത്. മൂന്നോ നാലോ വയസ്സുമുതൽ പ്രായപൂർത്തിയാകുന്നതുവരെ മേവിനെ ലൈംഗികമായി പീഡിപ്പിക്കുകയും ലൈംഗിക ബന്ധത്തിന് നിർബന്ധിക്കുകയും ചെയ്ത കുറ്റകൃത്യങ്ങളിൽ ഇയാൾ കുറ്റക്കാരനാണെന്ന് കണ്ടെത്തി.

ഹോവാർഡ് ജി.എ.എ. റഫറിയായി ജോലി ചെയ്യുന്ന സമയത്താണ് ചില അതിക്രമങ്ങൾ നടന്നതെന്നാണ് വിവരം. 1993-ലെ ഡെറി, കോർക്ക് ടീമുകൾ തമ്മിലുള്ള ഓൾ-അയർലൻഡ് ഫുട്ബോൾ ഫൈനലിലും, 1991-ൽ മീത്ത്, ഡബ്ലിൻ ടീമുകൾ തമ്മിൽ നടന്ന നിരവധി മത്സരങ്ങളിലും ഹോവാർഡ് ആയിരുന്നു റഫറി.