കോഴിക്കോട് വൻ തീപിടുത്തം, അഗ്നിരക്ഷാ സേനയുടെ വിവിധ സംഘങ്ങളെത്തിയാണ് തീയണച്ചത്

കോഴിക്കോട്: പെരുവയലില്‍ പെയിന്റുകട പ്രവര്‍ത്തിക്കുന്ന കെട്ടിടത്തിന് തീപ്പിടിച്ചു. അഗ്നിരക്ഷാ സേനയുടെ വിവിധ സംഘങ്ങളെത്തിയാണ് തീയണച്ചത്.

തീപ്പിടിത്തം ശ്രദ്ധയില്‍പ്പെട്ടയുടന്‍ ജീവനക്കാര്‍ ഓടി രക്ഷപ്പെട്ടതിനാല്‍ ആളപായമോ പരിക്കുകളോ ഇല്ല. തീപ്പിടിത്തത്തിന്റെ കാരണം വ്യക്തമല്ല.കളര്‍ മാര്‍ട്ട് എന്നു പേരുള്ള പെയിന്റ് ഉത്പന്നങ്ങള്‍ വില്‍ക്കുന്ന സ്ഥാപനത്തിലാണ് തീപ്പിടിത്തമുണ്ടായത്.

ആദ്യം വെള്ളിമാടുകുന്ന് അഗ്നിരക്ഷാ സേനയെത്തി തീയണയ്ക്കാനുള്ള ശ്രമം നടത്തിയെങ്കിലും നിയന്ത്രണവിധേയമാക്കാന്‍ കഴിഞ്ഞില്ല. തുടര്‍ന്ന് മുക്കത്തുനിന്നും മീഞ്ചന്തയില്‍നിന്നുമെല്ലാം കൂടുതല്‍ അഗ്നിരക്ഷാസേനാ യൂണിറ്റുകളെ എത്തിച്ചാണ് തീ നിയന്ത്രണവിധേയമാക്കിയത്.

പെയിന്റുകടയുടെ തൊട്ടടുത്തുള്ള കടകളിലേക്ക് തീ പടരാതിരിക്കാന്‍ അഗ്നിരക്ഷാസേന നടത്തിയ ശ്രമം വിജയിച്ചു. എന്നാല്‍, പെയിന്റുകടയെ പൂര്‍ണമായും തീ വിഴുങ്ങി.