സിബിഐ അന്വേഷണവും രാഷ്ട്രീയ മാറ്റങ്ങളും: നടൻ വിജയ്ക്ക് മുന്നറിയിപ്പ് നൽകി നിരീക്ഷകർ

 ചെന്നൈ: കരൂരിലെ ദുരന്തവുമായി ബന്ധപ്പെട്ട കേസ് സിബിഐ അന്വേഷിക്കണമെന്ന സുപ്രീം കോടതി ഉത്തരവിനെ നടൻ വിജയ് സ്വാഗതം ചെയ്യുകയും 'നീതി വിജയിക്കുമെന്ന്' പ്രസ്താവിക്കുകയും ചെയ്ത പശ്ചാത്തലത്തിൽ, രാഷ്ട്രീയ നിരീക്ഷകരുടെ ശ്രദ്ധ കേന്ദ്ര ഏജൻസികളുടെ മുൻകാല പ്രവർത്തനങ്ങളിലേക്ക് തിരിയുന്നു. തമിഴ്നാട് രാഷ്ട്രീയത്തിൽ നിർണായക സ്വാധീനം നേടാൻ ശ്രമിക്കുന്ന വിജയ്, സിബിഐ അന്വേഷണത്തിന്റെ ഫലങ്ങൾ സംബന്ധിച്ച് ജാഗ്രത പാലിക്കണമെന്ന് നിരീക്ഷകർ മുന്നറിയിപ്പ് നൽകുന്നു.

ബി.ജെ.പി. നേതൃത്വത്തിലുള്ള കേന്ദ്ര സർക്കാരിന്റെ കീഴിൽ, സി.ബി.ഐ., എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി.) ഉൾപ്പെടെയുള്ള ഏജൻസികളുടെ അന്വേഷണങ്ങൾ നേരിടുന്ന നിരവധി പ്രമുഖ പ്രതിപക്ഷ നേതാക്കൾ പിന്നീട് ബി.ജെ.പിയിൽ ചേരുകയും തുടർന്ന് അവരുടെ കേസുകൾ മന്ദഗതിയിലാവുകയോ സ്തംഭിക്കുകയോ ചെയ്യുന്ന പ്രവണത ഇന്ത്യയിൽ വർധിച്ചുവരുന്നുണ്ടെന്നതാണ് ഈ മുന്നറിയിപ്പിന് പിന്നിലെ പ്രധാന കാരണം.

കേന്ദ്ര ഏജൻസികളുടെ 'തെരഞ്ഞെടുത്ത നീക്കങ്ങൾ': കണക്കുകൾ സംസാരിക്കുന്നു

2014-ൽ എൻ.ഡി.എ. സർക്കാർ അധികാരത്തിൽ വന്നതുമുതൽ, ഇ.ഡിയുടെയും സി.ബി.ഐയുടെയും നടപടികളുടെ 95 ശതമാനവും പ്രതിപക്ഷ പാർട്ടികളിലെ പ്രമുഖ രാഷ്ട്രീയ നേതാക്കൾക്കെതിരെയായിരുന്നു എന്നത് ഈ രാഷ്ട്രീയ നിരീക്ഷണത്തിന് ബലം നൽകുന്നു. 'ദി ഇന്ത്യൻ എക്‌സ്‌പ്രസ്' മുൻപ് പ്രസിദ്ധീകരിച്ച റിപ്പോർട്ട് അനുസരിച്ച്, 2014 മുതൽ അഴിമതി ആരോപണങ്ങളിൽ കേന്ദ്ര ഏജൻസികളുടെ അന്വേഷണം നേരിട്ട 25 പ്രമുഖ രാഷ്ട്രീയ നേതാക്കൾ ബി.ജെ.പി.യിൽ ചേർന്നിട്ടുണ്ട്. കോൺഗ്രസ്, എൻ.സി.പി., ശിവസേന, തൃണമൂൽ കോൺഗ്രസ് തുടങ്ങിയ വിവിധ പാർട്ടികളിൽ നിന്നുള്ളവരായിരുന്നു ഇവർ. പാർട്ടി മാറിയ ഈ 25 കേസുകളിൽ 20 എണ്ണവും ഒന്നുകിൽ തടസ്സപ്പെടുകയോ, മാറ്റിവെക്കപ്പെടുകയോ, അല്ലെങ്കിൽ നിഷ്‌ക്രിയമായി തുടരുകയോ ചെയ്യുന്നതായി റിപ്പോർട്ടുകൾ വ്യക്തമാക്കുന്നു. മഹാരാഷ്ട്രയിലെ രാഷ്ട്രീയ പരിവർത്തനമാണ് ഇതിന് ഏറ്റവും വലിയ ഉദാഹരണം; എൻ.സി.പി. നേതാക്കളായ അജിത് പവാർ, പ്രഫുൽ പട്ടേൽ എന്നിവരുൾപ്പെടെ 12 പ്രമുഖർ ബി.ജെ.പി. സഖ്യത്തിൽ ചേർന്ന ശേഷം ഇവർക്കെതിരായ കേസുകളിൽ കാര്യമായ പുരോഗതി ഉണ്ടായിട്ടില്ല.

മഹാരാഷ്ട്ര മുതൽ അസം വരെ: നിശ്ചലമായ അന്വേഷണങ്ങൾ

മഹാരാഷ്ട്രയിലെ രാഷ്ട്രീയ മാറ്റങ്ങൾ ഈ പ്രതിഭാസത്തെ അടിവരയിടുന്നു. 2022-ന് ശേഷം മാത്രം 11 പ്രമുഖ നേതാക്കളാണ് ബി.ജെ.പിയിലേക്ക് ചേക്കേറിയത്. മുൻ മഹാരാഷ്ട്ര മുഖ്യമന്ത്രി അശോക് ചവാൻ ബി.ജെ.പിയിൽ ചേർന്നതിന് ശേഷം, ആദർശ് ഭവൻ കേസിൽ അദ്ദേഹത്തിനെതിരായ സി.ബി.ഐ, ഇ.ഡി. അന്വേഷണങ്ങൾ സുപ്രീം കോടതി സ്റ്റേ ചെയ്തിട്ടുണ്ട്. പശ്ചിമ ബംഗാളിലും അസമിലും സമാനമായ രീതിയിലുള്ള നിശ്ചലാവസ്ഥ പ്രകടമാണ്. തൃണമൂൽ കോൺഗ്രസിൽ നിന്ന് ബി.ജെ.പിയിലേക്ക് മാറിയ പശ്ചിമ ബംഗാൾ പ്രതിപക്ഷ നേതാവ് സുവേന്ദു അധികാരിക്കെതിരായ നാരദ കുംഭകോണ കേസിന്റെ അന്വേഷണം വർഷങ്ങളായി സ്തംഭിച്ചിരിക്കുന്നു. അതുപോലെ, അസം മുഖ്യമന്ത്രി ഹിമന്ത ബിശ്വ ശർമ്മ ബി.ജെ.പിയിൽ ചേർന്നതിന് ശേഷം 2014-ലെ ശാരദ ചിട്ടി ഫണ്ട് കേസിൽ അദ്ദേഹത്തിനെതിരായ അന്വേഷണവും നിശ്ചലാവസ്ഥയിലാണ്. ഈ സാഹചര്യത്തിൽ, തമിഴ്നാട്ടിൽ ശക്തമായ രാഷ്ട്രീയ അടിത്തറ ലക്ഷ്യമിടുന്ന നടൻ വിജയുടെ രാഷ്ട്രീയ നീക്കങ്ങളെ കേന്ദ്ര ഏജൻസികളുടെ ഇടപെടലുകളുമായി ബന്ധപ്പെടുത്തിയാണ് രാഷ്ട്രീയ നിരീക്ഷകർ വിലയിരുത്തുന്നത്. ഇത് ഭാവിയിൽ വിജയും ബിജെപിയും തമ്മിൽ ഒരു രാഷ്ട്രീയ ബന്ധത്തിന് വഴി തുറക്കുമോ എന്ന ആകാംഷയും നിലനിൽക്കുന്നുണ്ട്.