അഫ്ഘാനിലെ സ്പിൻ ബോൾഡാക്ക് നഗരത്തിൽ പാകിസ്താന്റെ വ്യോമാക്രമണം

 പാകിസ്താനും അഫ്ഗാനിസ്ഥാനും തമ്മിലുള്ള അതിർത്തി തർക്കങ്ങൾ കഴിഞ്ഞ ദിവസങ്ങളിൽ കൂടുതൽ രൂക്ഷമായിരിക്കുകയാണ്. ഏറ്റവും ഒടുവിലായി ബുധനാഴ്ച പാകിസ്താൻ അഫ്ഗാനിസ്ഥാനിലെ സ്പിൻ ബോൾഡാക്ക് നഗരം ലക്ഷ്യമാക്കി വ്യോമാക്രമണം നടത്തി. ചമൻ അതിർത്തിക്ക് സമീപം നടന്ന ഈ ആക്രമണത്തിൽ കുറഞ്ഞത് മൂന്ന് താലിബാൻ പോസ്റ്റുകളെങ്കിലും തകർത്തതായാണ് പ്രാദേശിക റിപ്പോർട്ടുകൾ.

ഡ്രോണുകളും വ്യോമാക്രമണങ്ങളും ദൃശ്യമായ ഈ ഏറ്റുമുട്ടലിൽ നാല് പാകിസ്താൻ സുരക്ഷാ ഉദ്യോഗസ്ഥർ കൊല്ലപ്പെടുകയും നാല് പേർക്ക് പരിക്കേൽക്കുകയും ചെയ്തു. കൂടാതെ, ആക്രമണം നടന്ന പ്രദേശത്തുനിന്ന് പത്തോളം സാധാരണക്കാരെ ചമനിലെ ആശുപത്രിയിലേക്ക് മാറ്റേണ്ടതായും വന്നു. സ്പിൻ ബോൾഡാക്കിൽ ആക്രമണം നടന്ന സ്ഥലത്തുനിന്ന് കറുത്ത പുക ഉയരുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്. ഈ രൂക്ഷമായ ആക്രമണ പരമ്പരയെത്തുടർന്ന് ഇരു രാജ്യങ്ങൾക്കുമിടയിലെ അതിർത്തികൾ അടച്ചിടുകയും നൂറുകണക്കിന് ആളുകൾ കുടുങ്ങിക്കിടക്കുകയും ചെയ്യുന്ന ഗുരുതരമായ സാഹചര്യം നിലനിൽക്കുന്നു.

ഒക്‌ടോബർ 11-ന് രാത്രി അഫ്ഗാൻ സേന പാകിസ്താൻ സൈനിക പോസ്റ്റുകൾ ആക്രമിച്ചതോടെയാണ് ഈ സംഘർഷത്തിന് തുടക്കമായത്. തങ്ങളുടെ വ്യോമാതിർത്തിയും പ്രദേശവും പാകിസ്താൻ ആവർത്തിച്ച് ലംഘിച്ചതിനുള്ള പ്രതികരണമാണിതെന്ന് അഫ്ഗാൻ അധികൃതർ അവകാശപ്പെടുന്നു. ഇതിന് മറുപടിയെന്നോണം, പാകിസ്താൻ സൈന്യം നടത്തിയ പ്രത്യാക്രമണത്തിൽ 23 സൈനികരെ നഷ്ടപ്പെട്ടതായും 200-ൽ അധികം "താലിബാൻ ഭീകരരെയും അനുബന്ധ പോരാളികളെയും" വധിച്ചതായും പാക് സൈന്യം അറിയിച്ചു. എന്നാൽ തങ്ങളുടെ ആക്രമണത്തിൽ 58 പാകിസ്താൻ സൈനികരെ കൊലപ്പെടുത്തിയെന്ന് അഫ്ഗാൻ അധികൃതർ അവകാശപ്പെടുന്നു. ഇതിന്റെയെല്ലാം പശ്ചാത്തലത്തിൽ, ചരക്ക് നീക്കത്തിനും ആളുകളുടെ സഞ്ചാരത്തിനുമായി പാകിസ്താനുമായുള്ള എല്ലാ അതിർത്തി കടന്നുള്ള വഴികളും തിങ്കളാഴ്ച അടച്ചതായി അഫ്ഗാൻ അതിർത്തി പോലീസ് വക്താവ് അബിദുള്ള ഉഖാബ് വ്യക്തമാക്കി. ചമൻ അതിർത്തിയിലെ ചരക്ക് നീക്കം നിർത്തിവെച്ചെങ്കിലും, ഞായറാഴ്ച മുതൽ അവിടെ കുടുങ്ങിക്കിടന്ന ഏകദേശം 1500 അഫ്ഗാൻ പൗരന്മാരെ തിരികെ പോകാൻ അധികൃതർ ഹ്രസ്വ സമയത്തേക്ക് അനുവദിച്ചു.

അഫ്ഗാനിസ്ഥാൻ തലസ്ഥാനമായ കാബൂളിലും കിഴക്കൻ അഫ്ഗാനിസ്ഥാനിലെ ഒരു ചന്തയിലും പാകിസ്താൻ വ്യോമാക്രമണം നടത്തിയെന്ന് താലിബാൻ ഭരണകൂടം ആരോപിച്ചതിനെത്തുടർന്നാണ് കഴിഞ്ഞ ആഴ്ച മുതൽ ഇരു രാജ്യങ്ങളും തമ്മിൽ കൂടുതൽ സംഘർഷം ഉടലെടുത്തത്. തങ്ങളുടെ പ്രദേശത്ത് ഒളിച്ചിരിക്കുന്ന തീവ്രവാദികളുടെ താവളങ്ങൾ ലക്ഷ്യമിട്ടാണ് പാകിസ്താൻ മുൻപും അഫ്ഗാൻ മണ്ണിൽ ആക്രമണം നടത്തിയിട്ടുള്ളത്. എന്നാൽ, നിലവിലെ ഏറ്റുമുട്ടലുകൾ മുൻകാല സംഘർഷങ്ങളെ അപേക്ഷിച്ച് ഏറ്റവും രക്തരൂഷിതവും ഇരു രാജ്യങ്ങളും തമ്മിലുള്ള ശത്രുതയുടെ ആഴം വ്യക്തമാക്കുന്നതുമാണ്. പാകിസ്താനിൽ നിരവധി മാരകമായ ആക്രമണങ്ങൾ നടത്തുന്ന നിരോധിത പാകിസ്താൻ താലിബാൻ സംഘടനയായ തെഹ്‍രീക്-ഇ-താലിബാൻ പാകിസ്താനെ (ടി.ടി.പി.) കാബൂൾ സംരക്ഷിക്കുന്നു എന്നാണ് ഇസ്ലാമാബാദിന്റെ പ്രധാന ആരോപണം. എന്നാൽ, തങ്ങളുടെ മണ്ണ് മറ്റൊരു രാജ്യത്തിനെതിരെ ഉപയോഗിക്കാൻ അനുവദിക്കില്ലെന്ന് പറഞ്ഞ് അഫ്ഗാനിസ്ഥാൻ ഈ ആരോപണം നിഷേധിക്കുകയാണ്.