കറൂർ ദുരന്തം: ഇരകളുടെ കുടുംബങ്ങളെ വിജയ ചെന്നൈയിൽ വച്ച് കാണും

 ചെന്നൈ: കറൂരിൽ തിക്കിലും തിരക്കിലും പെട്ട് 41 പേർ മരിച്ച സംഭവത്തിലെ ഇരകളുടെ കുടുംബങ്ങളെ ടി.വി.കെ. (തമിഴ് വെട്രി കഴകം) നേതാവ് വിജയ് ഒക്ടോബർ 27-ന് ചെന്നൈയിൽ വെച്ച് കാണുമെന്ന്  ടി.വി.കെ അടുത്ത വൃത്തങ്ങൾ അറിയിച്ചു.

കഴിഞ്ഞ സെപ്റ്റംബർ 27-ന് നടൻ-രാഷ്ട്രീയ നേതാവായ വിജയ് പങ്കെടുത്ത ടി.വി.കെ.യുടെ യോഗത്തിലാണ് തിക്കിലും തിരക്കിലും പെട്ട് 41 പേർക്ക് ജീവൻ നഷ്ടമായത്.

“ഞങ്ങളുടെ നേതാവ് ദുരിതബാധിതരുടെ കുടുംബങ്ങളുമായി അർത്ഥവത്തായ കൂടിക്കാഴ്ചയാണ് ആഗ്രഹിക്കുന്നത്. അദ്ദേഹം അഞ്ചോ ആറോ മണിക്കൂർ അവർക്കൊപ്പം ചെലവഴിച്ചേക്കും. ചെന്നൈ താരതമ്യേന സുരക്ഷിതമായ ഒരിടമാണ്, വേദിയുടെ കാര്യത്തിൽ അവസാനവട്ട ഒരുക്കങ്ങളിലാണ് ഞങ്ങൾ,” ഒരു ടി.വി.കെ. വൃത്തം അറിയിച്ചു.

 കറൂർ ഒഴിവാക്കിയതെന്തിന്?

കറൂരിൽ വെച്ച് കൂടിക്കാഴ്ച നടത്താൻ സാധിക്കാത്തതിന് കാരണവും ടി.വി.കെ. വൃത്തങ്ങൾ വെളിപ്പെടുത്തി. കറൂരിൽ അനുയോജ്യമായ ഒരു വേദി കണ്ടെത്തുന്നത് 'ഹിമാലയൻ ദൗത്യം' പോലെ പ്രയാസകരമായിരുന്നുവെന്ന് ഉന്നത ടി.വി.കെ. വൃത്തങ്ങൾ സൂചിപ്പിച്ചു.

“ഞങ്ങൾ കറൂരിൽ പല വേദികളും ശ്രമിച്ചു, പക്ഷേ ഒരിടത്തും ലഭിച്ചില്ല. കറൂർ പോലീസ് നിർദ്ദേശിച്ച വേദി, നേതാവിൻ്റെയും ഇരകളുടെ കുടുംബങ്ങളുടെയും സുരക്ഷയ്ക്ക് അനുയോജ്യമായിരുന്നില്ല. അവിടെ മതിൽക്കെട്ടുകൾ ഉണ്ടായിരുന്നില്ല, അതൊരു ഗോഡൗൺ പോലെയായിരുന്നു. അവിടെ ഇത്രയധികം ആളുകളെ എങ്ങനെ ഉൾക്കൊള്ളാൻ സാധിക്കും? മാത്രമല്ല, അവിടെ തിരക്ക് നിയന്ത്രിക്കാൻ പ്രയാസമായിരുന്നു. അതുകൊണ്ട് ഞങ്ങൾ ആ വേദി ഒഴിവാക്കി,” ഒരു ടി.വി.കെ. നേതാവ് വ്യക്തമാക്കി.

ഒരു കുടുംബം ഒഴികെ മറ്റെല്ലാവരും നേതാവിനെ കാണാൻ എവിടേക്കും യാത്ര ചെയ്യാൻ തയ്യാറാണെന്നും ടി.വി.കെ. വൃത്തങ്ങൾ കൂട്ടിച്ചേർത്തു.

വിജയ് കറൂർ സന്ദർശിക്കുന്നത് വൈകിയതിൻ്റെ പേരിൽ പാർട്ടിക്ക് വലിയ വിമർശനം നേരിടേണ്ടിവന്നിരുന്നു. എന്നാൽ, കറൂരിൽ ഒരു സ്ഥലം നിശ്ചയിക്കുമ്പോഴെല്ലാം ഏതാനും മണിക്കൂറുകൾക്കുള്ളിൽ അത് റദ്ദാക്കപ്പെടുകയായിരുന്നെന്നും അതിനാൽ മറ്റ് ജില്ലകളെ ആശ്രയിക്കേണ്ടി വന്നുവെന്നും പാർട്ടി വ്യക്തമാക്കി.

പോലീസ് 10,000 പേർക്ക് മാത്രമാണ് അനുമതി നൽകിയിരുന്നതെങ്കിലും പതിനായിരക്കണക്കിന് പ്രവർത്തകരാണ് റാലിക്കായി തടിച്ചുകൂടിയത്. നിശ്ചയിച്ച സമയത്തേക്കാൾ ആറ് മണിക്കൂർ വൈകിയാണ് വിജയ് വേദിയിലെത്തിയത്, ഇത് സ്ഥിതിഗതികൾ കൂടുതൽ വഷളാക്കി. അദ്ദേഹം പ്രസംഗം തുടങ്ങിയതോടെ അക്ഷമരായ ജനക്കൂട്ടം സ്റ്റേജിലേക്ക് ഇരച്ചുകയറുകയും ബാരിക്കേഡുകൾ തകർത്ത് തിക്കിലും തിരക്കിലും പെടുകയുമായിരുന്നു.

കറൂർ ദുരിതബാധിതരുടെ കുടുംബങ്ങളെ കണ്ടതിന് ശേഷം മാത്രമേ ടി.വി.കെ.യുടെ അടുത്ത നീക്കങ്ങൾ എന്തായിരിക്കണമെന്ന് വിജയ് തീരുമാനിക്കൂ. കറൂർ സംഭവത്തെ തുടർന്ന് പാർട്ടി താൽക്കാലികമായി യാത്ര നിർത്തിവെച്ചിരിക്കുകയാണ്. 2026-ലെ തമിഴ്‌നാട് നിയമസഭാ തിരഞ്ഞെടുപ്പിനായുള്ള വിജയ്യുടെയും പാർട്ടിയുടെയും തന്ത്രങ്ങളിലേക്കാണ് എല്ലാവരുടെയും ശ്രദ്ധ.