പാരമിക്‌സോ വൈറസ് എന്ന രോഗാണുവിലൂടെ വായുവിലൂടെ പകരുന്ന മുണ്ടി നീര് മുൻകരുതലോടെ തടയാം.

മുണ്ടി നീര്, പാരമിക്‌സോ വൈറസ് രോഗാണുവിലൂടെയാണ് പകരുന്നത്. വായുവിലൂടെ പകരുന്ന ഈ രോഗം ഉമിനീര്‍ ഗ്രന്ഥികളെ ആണ് പ്രധാനമായും ബാധിക്കുത്. ചെവിയുടെ താഴെ കവിളിന്റെ വശങ്ങളിലാണ് പ്രധാനമായും വീക്കം ഉണ്ടാകുന്നത്. ഇത് ചെവിക്ക് താഴെ മുഖത്തിന്റെ ഒരു വശത്തെയോ രണ്ടു വശങ്ങളെയുമോ ബാധിക്കും

നീരുള്ള ഭാഗത്ത് വേദന അനുഭവപ്പെട്ടേക്കാം. ചെറിയ പനിയും തലവേദനയും ആണ് പ്രാരംഭ ലക്ഷണങ്ങള്‍. വായ തുറക്കുതിനും ചവക്കുന്നതിനും വെള്ളമിറക്കുതിനും പ്രയാസമനുഭവപ്പെടുന്നു. വിശപ്പില്ലായ്മയും ക്ഷീണവും, വേദനയുംപേശി വേദനയുമാണ് മറ്റു ലക്ഷണങ്ങള്‍ . നീര്,തൊണ്ടവേദന എന്നൊക്കെ തെറ്റിദ്ധരിച്ച് ചികിത്സ സ്വീകരിക്കുന്നതിന് വൈകരുത്.

*രോഗ* *പകർച്ച* *ഒഴിവാക്കാൻ* *ശ്രദ്ധിക്കുക* .

അസുഖ ബാധിതര്‍ പൂര്‍ണമായും രോഗം ഭേദമാകുന്നത് വരെ വീട്ടിൽ വിശ്രമിക്കുക. മറ്റുള്ളവരുമായുള്ള സമ്പര്‍ക്കം ഒഴിവാക്കുക. 

രോഗികളായ കുട്ടികളെ സ്‌കൂളില്‍ വിടരുത്.

രോഗി ഉപയോഗിച്ച വസ്തുക്കള്‍ അണുവിമുക്തമാക്കുക.

*അധ്യാപകരും രക്ഷിതാക്കളും പ്രത്യേകം ശ്രദ്ധിക്കുക* 

മുണ്ടിനീരിൻ്റെ ലക്ഷണങ്ങൾ ശ്രദ്ധയിൽപ്പെട്ടാൽ അധ്യാപകർ രക്ഷിതാക്കളെയും ആരോഗ്യപ്രവർത്തകരെയും വിവരമറിയിക്കാൻ ശ്രദ്ധിക്കുക. 

സാധാരണയായി രണ്ട് ആഴ്ചകൊണ്ട് രോഗം ഭേദമാകാറുണ്ട്.എങ്കിലും രോഗത്തിൻ്റെ ഇൻകുബേഷൻ കാലയളവ് (രോഗികളുമായി സമ്പർക്കത്തിലായവർക്ക് രോഗ ലക്ഷണം പ്രകടമാകാൻ സാദ്ധ്യത ഉള്ള സമയം) 12 മുതൽ 25 ദിവസം വരെ ആയതിനാൽ രോഗമുള്ളവരുമായി സമ്പർക്കത്തിലായവർ ശ്രദ്ധ പുലർത്തുന്നത് രോഗവ്യാപനം തടയുന്നതിന് സഹായകമാണ്.

രോഗം സ്ഥിരീകരിച്ച വരും രോഗികളുമായി അടുത്ത സമ്പർക്കത്തിൽ ഉള്ളവരും മറ്റുള്ളവരിലേക്ക് രോഗ പകർച്ച ഒഴിവാക്കാനുള്ള കരുതലുകൾ എടുക്കേണ്ടതാണ്. പൊതു ഇടങ്ങൾ, മേളകൾ ,ചടങ്ങുകൾ എന്നിവിടങ്ങളിൽ പോകരുത്. രോഗികളായ കുഞ്ഞുങ്ങൾ അയൽപക്കത്തും മറ്റുള്ള കുട്ടികളുമായി കളിക്കാനും മറ്റും ഇടയാകുന്നത് രോഗവ്യാപനം ഉണ്ടാക്കും. 

ആരോഗ്യ പ്രവർത്തകരുടെ നിർദ്ദേശങ്ങൾ കർശനമായി പാലിക്കുക. രോഗം റിപ്പോർട്ട് ചെയ്ത കുഞ്ഞുങ്ങൾ പഠിക്കുന്ന ക്ലാസുകൾ നിർദിഷ്ട ദിവസങ്ങൾ നിർത്തിവെക്കേണ്ടതുമായി ബന്ധപ്പെട്ട നിർദ്ദേശങ്ങൾ കർശനമായും പാലിക്കുക. രോഗമുള്ള കുഞ്ഞുങ്ങൾ സ്കൂളിൽ മാത്രമല്ല മദ്രസ /സൺഡേ സ്കൂൾ /ട്യൂഷൻ സെൻറർ തുടങ്ങിയ സ്ഥാപനങ്ങളിലും പോകരുത്.

രോഗം റിപ്പോർട്ട് ചെയ്ത പ്രദേശങ്ങളിലെ സ്കൂളുകളിൽ, ആഹാരം പങ്കിട്ട് കഴിക്കുന്നതിന്റെയും മറ്റൊരാളുടെ വാട്ടർബോട്ടിൽ ഉപയോഗിക്കുന്നതിന്റെയും റിസ്ക് അധ്യാപകർ കുട്ടികളെയും രക്ഷകർത്താക്കളെയും ബോധ്യപ്പെടുത്തുക. തുമ്മുമ്പോഴും ചുമയ്ക്കുമ്പോഴും മൂക്കും വായും മറച്ചു പിടിക്കുക, കൈകൾ സോപ്പിട്ട് കഴുകുക തുടങ്ങി ആരോഗ്യ സന്ദേശങ്ങൾ സാധ്യമായ അവസരങ്ങളിൽ ഒക്കെ നൽകുക.