പാലോടിന് പണി ഉറപ്പ്,കോൺഗ്രസിലല്ലന്ന് നേതാക്കൾ..വിഷയം പരിശോധിക്കുന്നതായി കെപിസിസി പ്രസിഡന്റ്

കൊച്ചി ; തിരുവനന്തപുരം ഡിസിസി പ്രസിഡന്റ് പാലോട് രവിയുടെ പ്രസ്താവന ഗൗരവമുള്ള വിഷയമെന്ന് കെപിസിസി പ്രസിഡന്റ് സണ്ണി ജോസഫ്.

വിഷയം കേരളത്തിലെ മുതിർന്ന നേതാക്കളുമായും എഐസിസി നേതൃത്വവുമായും ചർച്ച ചെയ്യുന്നുണ്ടെന്നും ഇതിന്റെ അടിസ്ഥാനത്തിൽ തുടർ നടപടി സ്വീകരിക്കുമെന്നും അദ്ദേഹം പറഞ്ഞു. സംസ്ഥാന കോൺഗ്രസ് നേതൃത്വത്തെ പൂർണമായി പ്രതിരോധത്തിലാക്കിയ പ്രസ്താവനയ്ക്ക് പാലോട് രവിക്കെതിരെ കടുത്ത നടപടി ഉണ്ടാവുമെന്ന സൂചനയാണ് കോൺഗ്രസ് നേതൃത്വം നൽകുന്നത്.തദ്ദേശ തിരഞ്ഞെടുപ്പോടെ കോൺഗ്രസ്‌ എടുക്കാച്ചരക്കായി മാറുമെന്നും എൽഡിഎഫിനു മൂന്നാമതും തുടർഭരണം ലഭിക്കുമെന്നും തദ്ദേശ തിരഞ്ഞെടുപ്പിൽ തിരുവനന്തപുരം നഗരസഭയിലടക്കം കോൺഗ്രസിനു തിരിച്ചടി ഉണ്ടാകുമെന്നുമുള്ള പാലോട് രവിയുടെ  ഫോൺ സംഭാഷണമാണ് പുറത്തു വന്നത്. 

തദ്ദേശ തിരഞ്ഞെടുപ്പും നിയമസഭാ തിരഞ്ഞെടുപ്പും അടുത്തു വന്നിരിക്കെ ഒരു ഡിസിസി പ്രസിഡന്റിൽ നിന്നു തന്നെ ഇത്തരമൊരു പ്രസ്താവന ഉണ്ടായത് അത്യന്തം ഗൗരവത്തോടെയാണ് കോൺഗ്രസ് നേതൃത്വം കാണുന്നത്. അന്തരിച്ച മുൻ എംപി ജോർജ് ഈഡന്റെ വാർഷികാനുസ്മരണത്തോട് അനുബന്ധിച്ച് കൊച്ചിയിലെത്തിയ സണ്ണി ജോസഫ് സംസ്ഥാനത്തെ മുതിര്‍ന്ന കോൺഗ്രസ് നേതാക്കളുമായി വിഷയം ചർച്ച ചെയ്യുന്നുണ്ട്. 

എഐസിസി നേതൃത്വവുമായുമുള്ള കൂടിയാലോചനകൾക്കു ശേഷമായിരിക്കും പാലോട് രവിക്കെതിരെ എന്തു നടപടി സ്വീകരിക്കണമെന്ന കാര്യത്തിൽ തീരുമാനമുണ്ടാവുക എന്നാണ് പാർട്ടി നേതൃത്വം നൽകുന്ന സൂചന.