‘മദ്യപിച്ച് ലക്കുകെട്ട അപകടം’ എന്ന പരാമർശം; സന്ദീപ് വാര്യർക്കെതിരെ നിയമനടപടിക്കൊരുങ്ങി ശങ്കു ടി. ദാസ്

പൊന്നാനി: ടെലിവിഷൻ ചർച്ചക്കിടെയുണ്ടായ വാക്കുതർക്കങ്ങളുടെ തുടർച്ചയായി, മുൻ ബിജെപി നേതാവും നിലവിൽ കോൺഗ്രസ് നേതാവുമായ സന്ദീപ് വാര്യർ തനിക്കെതിരെ നടത്തിയ അപകീർത്തികരമായ ഫേസ്ബുക്ക് പരാമർശത്തിനെതിരെ നിയമനടപടി സ്വീകരിക്കുമെന്ന് സാമൂഹ്യ-രാഷ്ട്രീയ നിരീക്ഷകനായ ശങ്കു ടി. ദാസ്. താൻ നേരിട്ട വാഹനാപകടത്തെ "മദ്യപിച്ച് ലക്കുകെട്ട് സംഭവിച്ചത്" എന്ന് സന്ദീപ് വാര്യർ വിശേഷിപ്പിച്ചതിനെതിരെയാണ് ശങ്കു ടി. ദാസ് രംഗത്തെത്തിയത്. ഫേസ്ബുക്കിൽ പങ്കുവെച്ച വിശദമായ കുറിപ്പിലൂടെയാണ് അദ്ദേഹം തന്‍റെ ഭാഗം വിശദീകരിച്ചതും സന്ദീപ് വാര്യർക്ക് വക്കീൽ നോട്ടീസ് അയക്കുമെന്നും അറിയിച്ചത്.

മൂന്ന് ദിവസം മുൻപ് മാതൃഭൂമി ന്യൂസ് ചാനലിൽ നടന്ന ഒരു ചർച്ചയാണ് സംഭവങ്ങളുടെ തുടക്കം. ചർച്ചയിൽ ബിജെപി പ്രതിനിധിയായി പങ്കെടുത്ത ശങ്കു ടി. ദാസ്, കോൺഗ്രസ് പ്രതിനിധിയായ സന്ദീപ് വാര്യരുടെ രാഷ്ട്രീയ നിലപാടുകളിലെ ആദർശമില്ലായ്മയെ രൂക്ഷമായി വിമർശിച്ചിരുന്നു. ഈ ചർച്ചയുടെ വീഡിയോ ദൃശ്യങ്ങൾ സാമൂഹ്യ മാധ്യമങ്ങളിൽ വൈറലാവുകയും സന്ദീപ് വാര്യർക്കെതിരെ വലിയ രീതിയിലുള്ള പരിഹാസങ്ങൾ ഉയരുകയും ചെയ്തിരുന്നു. ഇതിലുള്ള പ്രതികാരം തീർക്കാനാണ് സന്ദീപ് വാര്യർ വ്യക്തിഹത്യ നടത്തുന്ന തരത്തിലുള്ള ഫേസ്ബുക്ക് പോസ്റ്റ് ഇട്ടതെന്ന് ശങ്കു ടി. ദാസ് ആരോപിക്കുന്നു.

താൻ സാധാരണയായി വ്യക്തിപരമായ അധിക്ഷേപങ്ങളോട് പ്രതികരിക്കാറില്ലെന്നും എന്നാൽ ഈ വിഷയം വ്യത്യസ്തമാണെന്നും ശങ്കു ടി. ദാസ് കുറിപ്പിൽ പറയുന്നു. "മദ്യപിച്ച് ലക്കുകെട്ട് വാഹനാപകടത്തിൽ പെട്ടപ്പോൾ" എന്ന പരാമർശം, തനിക്ക് അപകടം പറ്റിയതറിഞ്ഞ് വേദനിച്ച, താൻ ജീവിതത്തിലേക്ക് മടങ്ങിവരാൻ പ്രാർത്ഥനകളും വഴിപാടുകളും നടത്തിയ ആയിരക്കണക്കിന് മനുഷ്യരുടെ വിശ്വാസത്തെക്കൂടിയാണ് മുറിവേൽപ്പിക്കുന്നതെന്ന് അദ്ദേഹം ചൂണ്ടിക്കാട്ടി. ആ മനുഷ്യരെ പ്രതിനിധീകരിച്ചാണ് താൻ ഇതിനെതിരെ പ്രതികരിക്കുന്നതെന്നും അദ്ദേഹം കൂട്ടിച്ചേർത്തു.

ഏറെ വിചിത്രമെന്ന് പറയട്ടെ, അപകടം നടന്ന 2022 ജൂൺ 23-ന് സന്ദീപ് വാര്യർ ആവശ്യപ്പെട്ടതനുസരിച്ച് മാതൃഭൂമി ന്യൂസിനെതിരെ ഒരു വക്കീൽ നോട്ടീസ് തയ്യാറാക്കിയ ശേഷം രാത്രി വീട്ടിലേക്ക് മടങ്ങുമ്പോഴാണ് താൻ അപകടത്തിൽപ്പെട്ടതെന്നും ശങ്കു ടി. ദാസ് വെളിപ്പെടുത്തി. സുഖമില്ലാതിരുന്നിട്ടും സന്ദീപിന്റെ നിർബന്ധപ്രകാരമാണ് താൻ അന്ന് ഓഫീസിൽ പോയതെന്നും അദ്ദേഹം ഓർക്കുന്നു.

സന്ദീപ് വാര്യരുടെ ആരോപണങ്ങൾ പൂർണ്ണമായും അടിസ്ഥാനരഹിതമാണെന്ന് തെളിവുകൾ നിരത്തി ശങ്കു ടി. ദാസ് വ്യക്തമാക്കുന്നു. താൻ മദ്യപിച്ചിരുന്നില്ല എന്ന് തെളിയിക്കാൻ പോലീസിന്റെ എഫ്.ഐ.ആർ, ആശുപത്രി രേഖകൾ എന്നിവയെല്ലാം പര്യാപ്തമാണെന്നും അദ്ദേഹം പറഞ്ഞു.

അപകടം നടന്നയുടൻ പ്രവേശിപ്പിച്ച ഇമ്പിച്ചി ബാവ മെമ്മോറിയൽ ആശുപത്രിയിലെയോ പിന്നീട് ചികിത്സിച്ച കോട്ടക്കൽ, കോഴിക്കോട് മിംസ് ആശുപത്രികളിലെയോ രേഖകളിൽ രക്തത്തിൽ മദ്യത്തിന്റെ അംശം ഉണ്ടായിരുന്നതായി പറയുന്നില്ല.

അപകടവുമായി ബന്ധപ്പെട്ട് തിരൂർ പോലീസ് രജിസ്റ്റർ ചെയ്ത എഫ്.ഐ.ആറിൽ (FIR No: 546/2022) മദ്യപിച്ച് വാഹനമോടിച്ചെന്ന കുറ്റം (MV Act Section 185) ചേർത്തിട്ടില്ല.

ഇതുമായി ബന്ധപ്പെട്ട് തിരൂർ MACT കോടതിയിലുള്ള നഷ്ടപരിഹാര കേസിലും താൻ മദ്യപിച്ചിരുന്നതായി പരാതിക്കാരൻ പോലും ആരോപിച്ചിട്ടില്ല.

ഈ മൂന്ന് വർഷത്തിനിടെ ഒരു ഔദ്യോഗിക രേഖയിലും ഇല്ലാത്ത ആരോപണം സന്ദീപ് വാര്യർ ഇപ്പോൾ ഉന്നയിക്കുന്നത് വ്യക്തിവിരോധം തീർക്കാൻ മാത്രമാണെന്നും ശങ്കു ടി. ദാസ് പറയുന്നു.

*നിയമനടപടിയിലേക്ക്*

തന്റെ സൽപ്പേരിന് കളങ്കം വരുത്താനും രാഷ്ട്രീയ ഭാവിയെ തകർക്കാനും ഉദ്ദേശിച്ചുള്ള ഈ വ്യാജ ആരോപണത്തിനെതിരെ സിവിൽ, ക്രിമിനൽ നിയമനടപടികൾ സ്വീകരിക്കുമെന്ന് ശങ്കു ടി. ദാസ് അറിയിച്ചു. ഇതിന്റെ ആദ്യപടിയായി സന്ദീപ് വാര്യർക്ക് വക്കീൽ നോട്ടീസ് അയക്കും. നോട്ടീസ് കൈപ്പറ്റി 48 മണിക്കൂറിനകം ആരോപണം പിൻവലിച്ച് പരസ്യമായി മാപ്പ് പറഞ്ഞില്ലെങ്കിൽ നിയമനടപടികളുമായി മുന്നോട്ട് പോകുമെന്നും അദ്ദേഹം വ്യക്തമാക്കി. ഇത് വ്യക്തിപരമായ അഭിമാനപ്രശ്നമല്ല, മറിച്ച് തന്നെ വിശ്വസിക്കുകയും സ്നേഹിക്കുകയും ചെയ്ത ഒരു സമൂഹത്തോടുള്ള തന്റെ കടമ നിർവഹിക്കലാണെന്നും പറഞ്ഞുകൊണ്ടാണ് ശങ്കു ടി. ദാസ് തന്റെ കുറിപ്പ് അവസാനിപ്പിക്കുന്നത്.