കനത്ത മഴയിൽ മതിൽ തകർന്നു; എടപ്പാൾ വെങ്ങിനിക്കരയിൽ വൻ അപകടം ഒഴിവായി

എടപ്പാൾ: കനത്ത മഴയെത്തുടർന്ന് എടപ്പാൾ വെങ്ങിനിക്കരയിൽ മതിൽ തകർന്ന് സമീപത്തെ വീടിന് നാശനഷ്ടങ്ങളുണ്ടായെങ്കിലും ആളപായം ഒഴിവായി.

ഇന്ന് ഉച്ചയ്ക്ക് 12 മണിയോടെയാണ് അപകടം നടന്നത്. വെങ്ങിനിക്കര മണ്ണായത് വളപ്പിൽ ഷംസുദ്ദീന്റെ വീടിന്റെ മതിൽ ആണ് ശക്തമായ മഴയിൽ തകർന്നു വീണത്. ഈ മതിൽ, ഷംസുദ്ദീന്റെ വീടിന്റെ താഴെ ഭാഗത്തായി സ്ഥിതി ചെയ്യുന്ന പള്ളിയാലിൽ സൈനബയുടെ വീടിന്റെ മുകളിലേക്കാണ് പതിച്ചത്. സൈനബയുടെ വീടിന്റെ അടുക്കള ഭാഗം, ജനൽ, ചിമ്മിനിക്കൂട്, സമീപത്തുണ്ടായിരുന്ന വിറകുപുര എന്നിവയ്ക്ക് കേടുപാടുകൾ സംഭവിച്ചിട്ടുണ്ട്.

മതിലിന് വിള്ളലുണ്ടായത് ഷംസുദ്ദീന്റെ ശ്രദ്ധയിൽപ്പെട്ടതിനെത്തുടർന്ന് അദ്ദേഹം ഉടൻതന്നെ സൈനബയുടെ വീട്ടുകാരെ മാറ്റിയിരുന്നു. ആളുകളെ മാറ്റി നിമിഷങ്ങൾക്കകം തന്നെ വലിയ ശബ്ദത്തോടെ മതിൽ തകർന്നു വീഴുകയായിരുന്നു. അതുകൊണ്ട് മാത്രമാണ് ഒരു വലിയ ദുരന്തം ഒഴിവായത്.

സൈനബയുടെ വീടിനുണ്ടായ നാശനഷ്ടങ്ങൾക്ക് പുറമെ, തകർന്നു വീണ മതിൽ പുനർനിർമ്മിക്കുന്നതിന് ഏകദേശം മൂന്ന് ലക്ഷം രൂപയിലേറെ ചെലവ് വരുമെന്ന് പ്രാഥമിക കണക്കുകൾ സൂചിപ്പിക്കുന്നു. സംഭവം അറിഞ്ഞയുടൻ വാർഡ് മെമ്പർ കെ.പി. റാബിയയും സോക്കർ എഫ്.സി. ക്ലബ് അംഗങ്ങളും സ്ഥലത്തെത്തി, ഇരു വീട്ടുകാർക്കും ആവശ്യമായ സഹായങ്ങൾ നൽകി.