വിനയത്തിൻ്റെയും നവോത്ഥാനത്തിന്റെയും പാരമ്പര്യം: ഫ്രാൻസിസ് മാർപാപ്പയ്ക്ക് യാത്രാമൊഴി

വത്തിക്കാൻ സിറ്റി, 2025 ഏപ്രിൽ 21 - ഇരുപത്തിയൊന്നാം നൂറ്റാണ്ടിൽ കത്തോലിക്കാ സഭയുടെ ദൗത്യത്തെ പുനർനിർവചിച്ച ഫ്രാൻസിസ് മാർപാപ്പയുടെ നിര്യാണത്തിൽ ലോകം ദുഃഖമഗ്നമായിരിക്കുന്നു. കരുണയുടെയും വിനയത്തിൻ്റെയും അതുല്യ മാതൃകയായ അദ്ദേഹം സഭയിൽ പരിവർത്തനങ്ങൾക്ക് തുടക്കം കുറിച്ചു. തിങ്കളാഴ്ച രാവിലെ 7:35 ന് കാസ സാന്താ മാർത്തയിലെ വസതിയിൽ വെച്ചായിരുന്നു അദ്ദേഹത്തിൻ്റെ അന്ത്യം. അദ്ദേഹത്തിന് 88 വയസ്സായിരുന്നു.

വത്തിക്കാൻ വൃത്തങ്ങൾ പറയുന്നതനുസരിച്ച് മസ്തിഷ്കാഘാതത്തെ തുടർന്നുണ്ടായ ഹൃദയസ്തംഭനമാണ് മരണകാരണം. അദ്ദേഹത്തിൻ്റെ ജീവിതത്തിലെ ലാളിത്യവും വിനയവും എടുത്തുപറയേണ്ട ഒന്നാണ്. തൻ്റെ അടുത്ത സഹപ്രവർത്തകർ പ്രാർത്ഥനകളോടെ അദ്ദേഹത്തിനരികെ ഉണ്ടായിരുന്നു.

ചരിത്രം കുറിച്ച വ്യക്തിത്വം

ജോർജ്ജ് മരിയോ ബെർഗോഗ്ലിയോ എന്ന പേരിൽ അർജൻ്റീനയിലെ ബ്യൂണസ് ഐറിസിൽ ജനിച്ച ഫ്രാൻസിസ് മാർപാപ്പ 2013-ൽ കത്തോലിക്കാ സഭയുടെ തലവനായി തിരഞ്ഞെടുക്കപ്പെട്ടപ്പോൾ അതൊരു ചരിത്ര മുഹൂർത്തമായി. സഭയെ നയിച്ച ആദ്യത്തെ ജസ്യൂട്ട് വംശജനും ലാറ്റിനമേരിക്കക്കാരനും തെക്കൻ അർദ്ധഗോളത്തിൽ നിന്നുള്ള ആദ്യത്തെ മാർപാപ്പയുമായിരുന്നു അദ്ദേഹം. 12 വർഷം നീണ്ട ഭരണത്തിൽ കരുണയുടെയും ഉൾക്കൊള്ളലിൻ്റെയും നവീകരണത്തിൻ്റെയും പ്രതീകമായി ഫ്രാൻസിസ് മാർപാപ്പ അറിയപ്പെട്ടു. കൂടാതെ മാറ്റങ്ങൾ ഏറെ നടക്കുന്ന ഈ കാലഘട്ടത്തിൽ സഭയെ കൂടുതൽ തുറന്ന സമീപനത്തിലേക്ക് അദ്ദേഹം നയിച്ചു.സെൻ്റ് പീറ്റേഴ്‌സ് ബസിലിക്കയുടെ ബാൽക്കണിയിൽ ആദ്യമായി പ്രത്യക്ഷപ്പെട്ടപ്പോഴും ആഡംബര വസ്ത്രങ്ങൾ ഒഴിവാക്കിയപ്പോഴും സ്വന്തമായി ആശീർവാദം നൽകുന്നതിനുമുൻപ് ജനങ്ങളെ ആശീർവദിക്കാൻ ആവശ്യപ്പെട്ടപ്പോഴുമെല്ലാം ഫ്രാൻസിസ് മാർപാപ്പ എളിമയും ലാളിത്യവുമാണ് ഉയർത്തിക്കാണിച്ചത്. മാർപാപ്പയുടെ ശൈലിയിൽ ഇതൊരു പുതിയ തുടക്കമായിരുന്നു.

പാർശ്വവൽക്കരിക്കപ്പെട്ടവരുടെ ശബ്ദം

ഫ്രാൻസിസ് മാർപാപ്പയുടെ ഭരണകാലത്ത് പാവപ്പെട്ടവർക്കും അഭയാർത്ഥികൾക്കും തടവിലാക്കപ്പെട്ടവർക്കും വേണ്ടി അദ്ദേഹം വാദിച്ചു. യുദ്ധമേഖലകൾ സന്ദർശിക്കുകയും അന്തേവാസികളുടെയും കുടിയേറ്റക്കാരുടെയും പാദങ്ങൾ കഴുകുകയും സാമ്പത്തിക അസമത്വത്തിനും പാരിസ്ഥിതിക ചൂഷണത്തിനുമെതിരെ നിരന്തരം സംസാരിക്കുകയും ചെയ്തു.

മുറിവേറ്റവരെയും കഷ്ടപ്പെടുന്നവരെയും പരിചരിക്കുന്ന ഒരു "ഫീൽഡ് ഹോസ്പിറ്റൽ" ആയി സഭയെ മാറ്റണമെന്നും കരുണയാണ് സുവിശേഷത്തിൻ്റെ കാതൽ എന്നും അദ്ദേഹം ഓർമ്മിപ്പിച്ചു.

സഭാ പരിഷ്കർത്താവ്

ആധുനിക സഭാ ചരിത്രത്തിലെ സുപ്രധാനമായ ചില പരിഷ്കാരങ്ങൾക്ക് അദ്ദേഹം തുടക്കമിട്ടു. വത്തിക്കാനിലെ സാമ്പത്തിക കാര്യങ്ങളിൽ മാറ്റം വരുത്താനും റോമൻ കൂരിയയെ കൂടുതൽ സുതാര്യവും ഉത്തരവാദിത്തമുള്ളതുമാക്കാനും അദ്ദേഹം ശ്രമിച്ചു. പുരോഗമന വാദികളുടെയും യാഥാസ്ഥിതികരുടെയും വിമർശനങ്ങൾക്കിടയിലും ലൈംഗിക അതിക്രമങ്ങൾ പോലുള്ള വിഷയങ്ങളിൽ ശക്തമായ നടപടികൾ അദ്ദേഹം സ്വീകരിച്ചു.2015-ൽ കാലാവസ്ഥാ വ്യതിയാനവും പരിസ്ഥിതി സംരക്ഷണവും ധാർമ്മിക വിഷയങ്ങളാണെന്ന് വ്യക്തമാക്കിക്കൊണ്ടുള്ള "ലൗദാത്തോ സി" എന്ന ചാക്രികലേഖനം അദ്ദേഹം പുറത്തിറക്കി. ആഗോള ഐക്യത്തിനും സാഹോദര്യത്തിനും ആഹ്വാനം ചെയ്യുന്ന "ഫ്രത്തേല്ലി തൂത്തി" 2020-ൽ പ്രസിദ്ധീകരിച്ചു. ദേശീയതയെയും സാമ്പത്തിക ചൂഷണത്തെയും ഈ ലേഖനത്തിൽ മാർപാപ്പ അപലപിച്ചു.സഭാ ഭരണത്തിൽ അദ്ദേഹം സിനഡൽ സമീപനം സ്വീകരിച്ചു. ഇത് ശ്രേണിപരമായ അധികാരത്തിൽ നിന്ന് കൂട്ടായ ചർച്ചകളിലേക്കും തീരുമാനങ്ങളിലേക്കുമുള്ള മാറ്റമായിരുന്നു.

ജനങ്ങളുടെ മാർപാപ്പ

ഫ്രാൻസിസ് മാർപാപ്പ പരമ്പരാഗത മാർപ്പാപ്പയുടെ കൊട്ടാരത്തിൽ താമസിക്കാൻ വിസമ്മതിക്കുകയും സാധാരണ രീതിയിലുള്ള ഒരു അതിഥി മന്ദിരത്തിൽ താമസിക്കുകയും ചെയ്തു. ലളിതമായ രീതിയിലുള്ള ജീവിത ശൈലിയാണ് മാർപാപ്പ പിന്തുടർന്നത്. രോഗികളെയും പാവപ്പെട്ടവരെയും സന്ദർശിക്കാൻ അദ്ദേഹം പലപ്പോഴും സാധാരണക്കാരനായി സഞ്ചരിച്ചു. സാധാരണക്കാരനുമായി അടുത്തിടപഴകുന്ന ഒരു ശൈലിയാണ് മാർപാപ്പ സ്വീകരിച്ചത്.സാധാരണ ജനങ്ങളിലേക്ക് ഇറങ്ങിച്ചെല്ലാൻ ട്വിറ്റർ പോലുള്ള സാമൂഹിക മാധ്യമങ്ങൾ അദ്ദേഹം ഉപയോഗപ്പെടുത്തി. ആധുനിക ജീവിതത്തിലെ പ്രശ്നങ്ങളെക്കുറിച്ച് തുറന്നു സംസാരിക്കുന്ന അഭിമുഖങ്ങൾ നൽകി. എൽജിബിടിക്യു പ്രശ്നങ്ങളിലും വിവിധ മതങ്ങളെ ഒരുമിപ്പിക്കേണ്ടതിൻ്റെ പ്രാധാന്യത്തെക്കുറിച്ചും അദ്ദേഹം സംസാരിച്ചു.

ആഗോള നേതാക്കളുടെ ശ്രദ്ധാഞ്ജലി

പ്രധാനമന്ത്രി നരേന്ദ്ര മോദി തിങ്കളാഴ്ച പോപ്പ് ഫ്രാൻസിസിന്റെ നിര്യാണത്തിൽ അനുശോചനം രേഖപ്പെടുത്തി. സഹാനുഭൂതി, വിനയം, ആത്മീയ ധൈര്യം എന്നിവയുടെ ആഗോള പ്രതീകമായിരുന്നു ഈ വിശുദ്ധ പിതാവെന്ന് അദ്ദേഹം പറഞ്ഞു."പോപ്പ് ഫ്രാൻസിസുമായി ഉണ്ടായിരുന്ന എന്റെ കൂടിക്കാഴ്ചകൾ ഞാൻ സ്നേഹത്തോടെ ഓർക്കുന്നു. സമഗ്രവും സമവായപരവുമായ വികസനത്തിന് അദ്ദേഹം നൽകിയ പ്രതിബദ്ധത എന്നെ അതിയായി പ്രചോദിപ്പിച്ചിരുന്നു. ഇന്ത്യയിലെ ജനങ്ങളോടുള്ള അദ്ദേഹത്തിന്റെ സ്നേഹവും സ്‌നേഹബാധ്യതയും എപ്പോഴും ഞങ്ങൾ കണക്കാക്കി സൂക്ഷിക്കും. അദ്ദേഹത്തിന്റെ ആത്മാവ് ദൈവത്തിന്റെ കീഴിൽ ശാശ്വതമായ സമാധാനം പ്രാപിക്കട്ടെ," പ്രധാനമന്ത്രി മോദി അനുശോചന സന്ദേശത്തിൽ പറഞ്ഞു.

ലോക നേതാക്കളും മതമേലധ്യക്ഷന്മാരും സാധാരണക്കാരും ഫ്രാൻസിസ് മാർപാപ്പയ്ക്ക് ആദരാഞ്ജലികൾ അർപ്പിച്ചു. ഐക്യരാഷ്ട്രസഭയുടെ സെക്രട്ടറി ജനറൽ അൻ്റോണിയോ ഗുട്ടെറസ് അദ്ദേഹത്തെ "ഈ കാലഘട്ടത്തിലെ ധാർമ്മിക വഴികാട്ടി" എന്ന് വിശേഷിപ്പിച്ചു. വത്തിക്കാനുമായി പലപ്പോഴും വിയോജിപ്പുകൾ ഉണ്ടായിരുന്ന യുഎസ് പ്രസിഡൻ്റ് ഡൊണാൾഡ് ട്രംപ് അദ്ദേഹത്തെ "ദൈവത്തെയും മനുഷ്യരാശിയെയും സേവിച്ച സമാധാനത്തിൻ്റെ മനുഷ്യൻ" എന്ന് പ്രകീർത്തിച്ചു.വത്തിക്കാനിലെ സ്റ്റേറ്റ് സെക്രട്ടറി കർദ്ദിനാൾ പിയട്രോ പരോളിൻ അദ്ദേഹത്തെ വിശേഷിപ്പിച്ചത് "ആളുകളിലേക്ക് ഇറങ്ങിച്ചെല്ലുന്ന ഒരു ഇടയനും പാരമ്പര്യങ്ങളെ പരിഷ്കരിക്കുന്ന നവോത്ഥാന നായകനുമാണ്" എന്നാണ്.പുതിയ മാർപാപ്പയെ തിരഞ്ഞെടുക്കാൻ കർദിനാൾമാരുടെ കൂട്ടായ്മ ഉടൻ സമ്മേളിക്കും. 

ഫ്രാൻസിസ് മാർപാപ്പയുടെ ദർശനത്തിൽ പ്രചോദനം ഉൾക്കൊണ്ട ഒരു സഭയെയാണ് അദ്ദേഹം ലോകത്തിന് നൽകിയത്. .ലക്ഷക്കണക്കിന് ആളുകൾ സെൻ്റ് പീറ്റേഴ്‌സ് സ്‌ക്വയറിലേക്ക് അദ്ദേഹത്തിന് യാത്രാമൊഴിയേകാൻ എത്തുമെന്നാണ് പ്രതീക്ഷിക്കുന്നത്. വിവിധ മത നേതാക്കളും രാഷ്ട്രീയ നേതാക്കളും ചടങ്ങിൽ പങ്കെടുക്കും.

ലോകം ഫ്രാൻസിസ് മാർപാപ്പയോട് വിടപറയുമ്പോൾ അദ്ദേഹം പറഞ്ഞ വാക്കുകൾ ഇവിടെ ഓർമ്മിക്കാം: "ഞാനാരാണ് വിധിക്കാൻ?" - ഇത് ഒരു നിമിഷത്തെ വാക്കുകളായിരുന്നില്ല, ഒരു പ്രസ്ഥാനത്തെ തന്നെ നിർവചിച്ച ചോദ്യമായിരുന്നു അത്. അദ്ദേഹം വെറുമൊരു മാർപാപ്പ ആയിരുന്നില്ല, മറിച്ച് സത്യസന്ധതയോടും ധൈര്യത്തോടും കൂടി ജീവിച്ച ഒരു സുവിശേഷ പ്രചാരകനായിരുന്നു.