പ്രായപൂർത്തിയാകാത്ത മൂന്ന് പെൺകുട്ടികളെ പീഡിപ്പിച്ച പതിനേഴുകാരൻ അറസ്റ്റിൽ.

പത്തനംതിട്ട: പ്രായപൂർത്തിയാകാത്ത മൂന്ന് പെൺകുട്ടികളെ പീഡിപ്പിച്ച കേസിൽ പതിനേഴുകാരൻ അറസ്റ്റിൽ. പത്തനംതിട്ട മൂഴിയാറിലാണ് ഞെട്ടിക്കുന്ന സംഭവം. 9, 12, 13 വയസ്സുകളുള്ള മൂന്ന് പെൺകുട്ടികളാണ് പീഡനത്തിന് ഇരയായത്.

പെൺകുട്ടികളുടെ അയൽവാസിയാണ് 17-കാരൻ. കഴിഞ്ഞ വർഷം വേനലവധിക്ക് വീട്ടിലെത്തിയപ്പോൾ ഇവരെ പീഡിപ്പിക്കുകയായിരുന്നുവെന്നാണ് പരാതി. പെൺകുട്ടികളുടെ അമ്മ വീട്ടിലില്ലാത്ത സമയം നോക്കിയായിരുന്നു പീഡനം. ബാലികാസദനത്തിൽ കൗൺസിലിങ്ങിനിടെ മൂത്തപെൺകുട്ടി പീഡന വിവരം തുറന്ന് പറയുകയായിരുന്നു.

ഇതോടെ അധികൃതർ ഈ വിവരം സിഡബ്ല്യൂസിയെ അറിയിക്കുകയും അവർ പൊലീസിനെ അറിയിക്കുകയുമായിരുന്നു. വെള്ളിയാഴ്ച രാവിലെ 17-കാരനെ കസ്റ്റഡിയിലെടുത്തു. അറസ്റ്റ് ചെയ്തതിന് ശേഷം ജുവനൈൽ ജസ്റ്റിസ് ഹോമിലേക്ക് മാറ്റി.